ខេត្តព្រៃវែង ៖ មន្ត្រីជំនាញកាំកុងត្រូលសាខាខេត្តព្រៃវែង កាលពីព្រឹកថ្ងៃទី០៣ កញ្ញាម្សិលមិញនេះ បានសហការជាមួយមន្ត្រីមន្ទីរពាណិជ្ជកម្មខេត្ត រួមគ្នាចុះត្រួតពិនិត្យទំនិញនៅតាមស្តង់លក់ដូរទាំងក្នុងផ្សារ និងនៅតាមផ្ទះជុំវិញផ្សារក្រុងព្រៃវែង សរុបចំនួន២៣ទីតាំង ស្វែងរកទំនិញខូចគុណភាព និងទំនិញដែលច្បាប់ហាមឃាត់ ដើម្បីដកហូតយកទៅបំផ្លាញចោល ។
លោក អ៊ុត សុភាព ប្រធានសាខាកាំកុងត្រូលខេត្តព្រៃវែងបានមានប្រសាសន៍ថា នៅក្នុងសកម្មភាពចុះត្រួតពិនិត្យនេះ មន្ត្រីជំនាញកាំកុងត្រូលបានធ្វើការណែនាំដល់អាជីវករទាំងអស់អំពីអនាម័យ និងរបៀបដាក់តាំងលក់ទំនិញឲ្យបានត្រឹមត្រូវស្របទៅតាមយថាប្រភេទនៃទំនិញនីមួយៗ ដើម្បីបញ្ជៀសនូវការឆ្លងបាក់តេរីផ្សេងៗ និងបានធ្វើការត្រួតពិនិត្យទំនិញវេចខ្ចប់ស្រាប់ក៏ដូចជា ធ្វើតេស្តបឋមរកសារធាតុគីមីដែលច្បាប់ហាមឃាត់ទៅលើចំណីអាហារប្រភេទសរសៃគុយទាវ , មី, ជ្រក់ និងគ្រឿងសមុទ្រផងដែរ ។
លោក អ៊ុត សុភាព បានបញ្ជាក់ថា ជាលទ្ធផលនៃការចុះត្រួតពិនិត្យនេះមន្ត្រីជំនាញបានរកឃើញ និងដកហូតបានទំនិញខូចគុណភាពដែលហួសកាលបរិច្ឆេទប្រើប្រាស់ចំនួន១១មុខ ស្មើនឹងទម្ងន់៧៥.១៨ គីឡូក្រាម ទុកយកទៅបំផ្លាញចោលដែលក្នុងនោះរួមមាននំចម្រុះ២៣,៧១គ.ក ស្ករគ្រាប់ ៦,៥គ.ក ទឹកត្រី៨ដប បបរកូនក្មេង១,៤៣គ.ក ទឹកដោះគោឆៅ៥,១៤គ.ក តែកំប៉ុង០,៥គ.ក ម្ស៉ៅស្រួយ ៣គ.ក ទឹកសណ្តែកប្រអប់ក្រដាស២,៧គក ទឹកផ្លែឈើលាយទឹកដោះគោ៥,៦គ.ក ភេសជ្ជ៤កំប៉ុង ទឹកដោះ ២០គ.ក ទន្ទឹម និងការចុះត្រួតពិនិត្យនេះដែរ ។
មន្ត្រីជំនាញកាំកុងត្រូលក៏បានសំណូមពរដល់ក្រុមអាជីវករទាំងអស់ ទាំងនៅក្នុងផ្សារ និងនៅតាមបណ្តាផ្ទះលក់ទំនិញទាំងអស់ សូមជួយត្រួតពិនិត្យទំនិញដោយខ្លួនឯងផង បើទំនិញណាខូចគុណភាព ឬហួសកាលបរិច្ឆេទ សូមកុំដាក់លក់ឲ្យសោះ ហើយបើមន្ត្រីជំនាញនៅតែរកឃើញមានដាក់លក់តទៅទៀតនោះ និងលែងមានការយោគយល់ដូចមុនទៀតហើយ ៕
ចែករំលែកព័តមាននេះ