ចាប់តាំងពីបើកដំណើរការ សាកលវិទ្យាល័យហ្សាម៉ាន់ ទទួលបានភាពជោគជ័យ និងការទទួលស្គាល់ជាច្រើន ពីសំណាក់និស្សិត មាតាបិតា និងសាធារណជនទូទៅ។ ភាពជោគជ័យទាំងនេះ ក៏ដោយសារតែការពង្រឹងគុណភាពអប់រំរបស់សាកលវិទ្យាល័យផង និងកិច្ចសហប្រតិបត្តិការរបស់សាកលវិទ្យាល័យ ជាមួយសាកលវិទ្យាល័យ និងស្ថាប័នឧត្តមសិក្សា នៅបណ្ដាប្រទេសនានាជុំវិញពិភពលោកផង។
តួយ៉ាង សាកលវិទ្យាល័យហ្សាម៉ាន់ ទើបតែប្រារព្ធខួបមួយឆ្នាំ នៃសហប្រតិបត្តិការ ជាមួយសាលាពាណិជ្ជកម្មអន្តរជាតិ Solbridge (Solbridge International School of Business) ដែលមានទីតាំងនៅ Daejeon ដែលជាទីក្រុងមានប្រជាជនច្រើនបំផុតលំដាប់លេខ៥ របស់ប្រទេសកូរ៉េខាងត្បូង។
រូបភាព ៖ សាកលវិទ្យាធិការ សាកលវិទ្យាល័យហ្សាម៉ាន់ លោកបណ្ឌិត ដេត សុខឧត្ថម ក្នុងជំនួបជាមួយថ្នាក់ដឹកនាំ របស់សាលាពាណិជ្ជកម្មអន្តរជាតិ Solbridge
កិច្ចសហប្រតិបត្តិការរវាងស្ថាប័នអប់រំទាំងពី បានផ្ដល់ឱកាសជាច្រើន ដល់និស្សិតសាកលវិទ្យាល័យហ្សាម៉ាន់។ ជាឧទាហរណ៍ សាកលវិទ្យាល័យហ្សាម៉ាន់បានបញ្ជូននិស្សិតចំនួនបីរូបហើយ ឱ្យទៅផ្លាស់ប្ដូរការសិក្សារយៈពេលមួយឆមាស នៅសាលាពាណិជ្ជកម្មអន្តរជាតិ Solbridge ខណៈដែលនិស្សិតចំនួន១៥រូបផ្សេងទៀត បានធ្វើទស្សនកិច្ចរយៈពេលខ្លីនៅប្រទេសកូរ៉េខាងត្បូង តាមរយៈសាលាជាដៃគូដដែលនេះ។
នៅខែតុលាខាងមុខ និស្សិតសាកលវិទ្យាល័យហ្សាម៉ាន់មួយក្រុម ក៏នឹងចូលរួមប្រកួតប្រជែងគំនិតអាជីវកម្មមួយ ដែលសាលាពាណិជ្ជកម្មអន្តរជាតិ Solbridge ជាអ្នករៀបចំ និងជាម្ចាស់ផ្ទះ។ បេក្ខជន បេក្ខនារីមកពីទូទាំងពិភពលោកនឹងចូលរួមក្នុងការប្រកួតគំនិតអាជីវកម្មលក្ខណៈជាសាកលនេះ។ តាមរយៈកិច្ចសហប្រតិបត្តិរវាងសាលាទាំងពីរ និស្សិតក៏អាចសិក្សានៅសាកលវិទ្យាល័យហ្សាម៉ានរយៈពេលពីរឆ្នាំ និងនៅ Solbridgeរយៈពេលពីរឆ្នាំ ព្រមទាំងទទួលបានសញ្ញាបត្របរិញ្ញាបត្រពីហ្សាម៉ាន់ផង និងពីSolbridge ផង។
រូបភាព ៖ អគារសិក្សា របស់សាលាពាណិជ្ជកម្មអន្តរជាតិSolbridge
នៅពេលខាងមុខ សាកលវិទ្យាល័យ ហ្សាម៉ាន់នឹងបន្តរឹតចំណងមិត្តភាព ក៏ដូចជាកិច្ចសហប្រតិបត្តិការជាមួយសាលាពាណិជ្ជកម្មអន្តរជាតិ Solbridge បន្ថែមទៀត តាមរយៈកាបញ្ជូននិស្សិតទៅសិក្សាថ្នាក់បរិញ្ញាបត្រជាន់ខ្ពស់ (MBA) នៅទីនោះ។
សាកលវិទ្យាល័យហ្សាម៉ាន់ក៏នឹងពង្រីកកិច្ចសហប្រតិបត្តិការជាមួយស្ថាប័នអប់រំដ៏ទៃៗទៀតជុំវិញពិភពលោក ដើម្បីឱ្យនិស្សិតរបស់ខ្លួនទទួលបានឱកាសផ្សេងៗ ដើម្បីចូលរួមចំណែកលើកកម្ពស់សមត្ថភាពធនធានមនុស្សនៅកម្ពុជា។ បើតាមការឱ្យដឹង ពីគេហទំព័ររបស់សាលាពាណិជ្ជកម្មអន្តរជាតិ Solbridge សាលាមួយនេះមានបើកបង្រៀនថ្នាក់បរិញ្ញាបត្រ និងបរិញ្ញាបត្រជាន់ខ្ពស់ជំនាញគ្រប់គ្រងពាណិជ្ជកម្ម ដែលបង្រៀនជាភាសាអង់គ្លេស។
Solbridge មាននិស្សិតមកពី៥៦ប្រទេសទូទាំងពិភពលោក ហើយនិស្សិតអាចទទួលបានអត្ថប្រយោជន៍ផ្សេងៗដូចជា ចំណេះដឹងភាសាចិន ឬកូរ៉េ និងឱកាសទទួលបានការងារពីក្រុមហ៊ុនកូរ៉េនានា ក្រោយបញ្ចប់ថ្នាក់បរិញ្ញាបត្រ។ ដោយសហការ
ចែករំលែកព័តមាននេះ