ប្រទេសមីយ៉ាន់ម៉ា ៖ អ្នកយកព័ត៌មានរបស់ទីភ្នាក់ងារព័ត៌មានរ៉យទ័រ២នាក់ ដែលជាប់ចោទពីបទធ្វើឲ្យប៉ះពាល់ដល់សន្តិសុខរដ្ឋ ព្រោះតែធ្វើការអង្គេតតាមដានលើរឿងសម្លាប់រង្គាល ពួកអ៊ិស្លាមរ៉ូហ៊ីងយ៉ា ត្រូវទទួលការកាត់ទោសកាលពីថ្ងៃទី៣ កញ្ញា ដាក់គុកដល់ទៅ៧ឆ្នាំ។
ការកាត់ទោសអ្នកកាសែតទាំង២នាក់នោះ ធ្វើឲ្យប៉ះពាល់ថែមទៀតដល់មុខមាត់លោកស្រី អ៊ួងសាន់ស៊ូជី ជ័យលាភីពានរង្វាន់ណូបែលសន្តិភាព។
ចៅក្រមលោក YE LWIN នៅមុខសាលសវនាការមួយចោមរោមដោយបណ្ដាអ្នកកាសែត និងបណ្ដាអ្នកការទូតថ្លែងថា ដោយអ្នកទាំង២ធ្វើឲ្យប៉ះពាល់ដល់ការសម្ងាត់របស់រដ្ឋ ពួកគេត្រូវទទួលការកាត់ទោសដាក់ពន្ធគារក្នុងម្នាក់ៗ៧ឆ្នាំ។
ចំណែកលោក KNUT OSTBY តំណាងអង្គការសហប្រជាជាតិប្រចាំមីយ៉ាន់ម៉ា ក្រោយការប្រកាសសាលក្រមកាត់ទោសនោះបន្តិចមានប្រតិកម្មថា យើងបន្តទាមទារឲ្យដោះលែងពួកគេ។
អ្នកយកព័ត៌មានរបស់រ៉យទ័រជាជនជាតិមីយ៉ាន់ម៉ាទាំង២នាក់នោះ ទទួលការចោទប្រកាន់ ដើរប្រមូលបណ្ដាឯកសារទាក់ទិននឹងប្រតិបត្តិការរបស់កងកម្លាំងសន្តិសុខ ក្នុងរដ្ឋរ៉ាឃីន តំបន់ភាគពាយ័ព្យមីយ៉ាន់ម៉ា ជាទីលាននៃសោកនាដកម្មរបស់ពួករ៉ូហ៊ីងយ៉ា។អ្នកទាំង២នាក់នេះ លោក WA LONE អាយុ៣២ឆ្នាំ និងលោក KYAW SOE OO អាយុ២៨ឆ្នាំ ជាប់ឃុំឃាំងបណ្ដោះអាសន្នចាប់តាំងពីខែធ្នូឆ្នាំ២០១៧មក៕ វីដេអូដកស្រង់ចេញពី ៖ euronews (en français)
ចែករំលែកព័តមាននេះ