ខេត្តប៉ៃលិន ៖ លោកអនុប្រធានមន្ទីរសុខាភិបាលខេត្តបានរបួសធ្ងន់ ចំណែកភរិយារបស់លោកស្លាប់នៅតាមផ្លូវ ពេលបញ្ជូនទៅសង្គ្រោះនៅមន្ទីរពេទ្យខេត្តចាន់បូរី ប្រទេសថៃ បន្ទាប់ពីមានគ្រោះថ្នាក់ត្រូវរថយន្តថៃបុករថយន្តខ្មែរនៅទឹកដីថៃ ។ ក្នុងឧបទ្ទវហេតុនេះ អ្នកបើកបររថយន្តថៃរងរបួសស្រាល…
ខេត្តប៉ៃលិន ៖ លោកអនុប្រធានមន្ទីរសុខាភិបាលខេត្តបានរបួសធ្ងន់ ចំណែកភរិយារបស់លោកស្លាប់នៅតាមផ្លូវ ពេលបញ្ជូនទៅសង្គ្រោះនៅមន្ទីរពេទ្យខេត្តចាន់បូរី ប្រទេសថៃ បន្ទាប់ពីមានគ្រោះថ្នាក់ត្រូវរថយន្តថៃបុករថយន្តខ្មែរនៅទឹកដីថៃ ។ ក្នុងឧបទ្ទវហេតុនេះ អ្នកបើកបររថយន្តថៃរងរបួសស្រាល និងបានរត់គេចខ្លួនបាត់ស្រមោល ។
ហេតុការណ៍រថយន្តថៃបុកជាមួយរថយន្តខ្មែរ ដែលបណ្តាលឱ្យប្រពន្ធអនុប្រធានមន្ទីរសុខាភិបាលខេត្តស្លាប់ដ៏គួរឱ្យរន្ធត់នេះ បានកើតឡើងកាលពីវេលាម៉ោង៨និង២០នាទីយប់ថ្ងៃទី៣១ សីហាកន្លងទៅ នៅតាមផ្លូវជាតិ ក្នុងស្រុកពោងណាំរ៉ន ខេត្តចាន់បូរី ប្រទេសថៃ ។
ប្រភពព័ត៌មានបានឱ្យដឹងថា ភរិយាលោកអនុប្រធានមន្ទីរសុខាភិបាលដែលស្លាប់ឈ្មោះ ឃាង ធារ៉ាថន អាយុ៤១ឆ្នាំ ជានាយិកាស្តីទីចាត់ការហិរញ្ញវត្ថុសាលាខេត្ត និងលោកអនុប្រធានមន្ទីរឈ្មោះ សៀក រតន: អាយុ៥០ឆ្នាំ រងរបួសធ្ងន់ កំពុងសង្គ្រោះបន្ទាន់នៅមន្ទីរពេទ្យខេត្តចាន់បូរី ។ រីឯរថយន្តម៉ាកសុីអវី ពណ៌ទឹកប្រាក់ មិនស្គាល់ផ្លាកលេខ រងការខូចខាតទាំងស្រុង ។
ប្រភពព័ត៌មានឲ្យដឹងទៀតថា ជនរងគ្រោះទាំង២នាក់ប្តីប្រពន្ធ បានបើកបររថយន្តរបស់ខ្លួនម៉ាកសុីអវី ពណ៌ទឹកប្រាក់ ពីខាងកើតទៅខាងលិច ដោយឆ្លងព្រំដែនខេត្តប៉ៃលិនឆ្ពោះទៅខេត្តចាន់បូរី ប្រទេសថៃ ។
ពេលកំពុងធ្វើដំណើរ តាមដងផ្លូវ ស្រាប់តែមានរថយន្តថៃ១គ្រឿងម៉ាកមីតសុ៊យប៊ីស៊ី ពណ៌ស បានបើកជែងគ្នាក៏ជ្រុលទៅបុករថយន្តលោក សៀក រតនៈ ពេញទំហឹង ។ ក្នុងគ្រោះថ្នាក់នេះ បណ្តាលឲ្យរថយន្តទាំង២គ្រឿងរងការខូចខាតយ៉ាងដំណំ ហើយត្រូវបានសមត្ថកិច្ចថៃស្ទូចយកចេញពីផ្លូវទៅរក្សាទុក រង់ចាំធ្វើការដោះស្រាយនៅពេលក្រោយ ។
សពលោកស្រី ឃាង ធារ៉ាថន ត្រូវបានសាច់ញាតិទាក់ទងទៅខាងភាគីថៃ ដើម្បីដឹកត្រឡប់យកមកខេត្តប៉ៃលិន ដើម្បីរៀបចំធ្វើបុណ្យតាមប្រពៃណី ។ រីឯលោក សៀក រតន: អនុប្រធានមន្ទីរសុខាភិបាលខេត្តជាប្តី កំពុងស្ថិតនៅក្នុងការសង្គ្រោះបន្ទាន់នៅប្រទេសថៃ ៕
ចែករំលែកព័តមាននេះ