រាជធានីភ្នំពេញ៖ តារាសម្ដែងវ័យ២៣ឆ្នាំ កញ្ញាឈឹម អារីយ៉ា បានបង្ហើបឲ្យដឹងពីរឿងផលិតករមិនបើកប្រាក់ថ្លៃសម្តែងឲ្យនាងដែរ ។ នាងព្រមាននឹងបញ្ចេញឈ្មោះម្ចាស់ផលិតកម្មនោះករណីនៅតែមិនបើកប្រាក់ឲ្យនាង ហើយនាងអស់ការអត់ទ្រាំនោះ ។
តារាសម្ដែងកញ្ញាឈឹម អារីយ៉ា បានបង្ហោះសារតាមហ្វេសប៊ុកកាលពីពេល ថ្មីៗកន្លងមកថា «នាងខ្ញុំុមិនដឹងថា អ្វីៗដែលបង(ហង្ស សម្បើមស័ក្ត និយាយពិត ឬមិនពិតទេ តែបើវាជាការណ៍ពិត នាងខ្ញុំពិតជាយល់អារម្មណ៍មួយនេះព្រោះនាងខ្ញុំក៏ជាតួម្នាក់ដែរ ហើយក៏បានជួបរឿងនេះដែរ ពិបាកណាស់ផលិតកម្មមួយចំនួនតូចគឺអ៊ីចឹង ថតឲ្យហើយ រឿងចាក់ចប់ហើយ នៅមិនបើកលុយឲ្យតួទេ និយាយកុហកថ្ងៃនេះថ្ងៃនោះ ខ្ញុំមិនយល់ទេថាគាត់គិតអី ! តួដែលជួបរឿងនេះខ្លួនឯងបានយល់អារម្មណ៍មួយនេះ ហើយខ្ញុំនិយាយអ៊ីចឹងហើយបើដឹងខ្លួនគួរតែគិតគូរ ឬក៏ចង់ឲ្យនិយាយចំឈ្មោះ»។
ករណីរបស់កញ្ញាឈឹម អារីយ៉ា នេះ មិនមែនជាករណីលើកដំបូងទេ គឺកន្លងមកមានតារាសម្ដែងមួយចំនួនជួបរឿងបែបនេះ ។ ពួកគេបានត្អូញត្អែរពីករណីថតកុនហើយមិនបានទទួលលុយ សូម្បីតែភាពយន្តនោះចាក់បញ្ចាំងចប់ហើយក្តី ។ ទោះជាយ៉ាងណាក្តីអារីយ៉ា បានបដិសេធមិនទាន់សម្រេចចិត្តបញ្ចេញឈ្មោះម្ចាស់ផលិតកម្មដែលជំពាក់លុយនាងនោះទេ តែនាងរង់ចាំមើលបើមិនដោះស្រាយជាមួយនាងទេ នាងនឹងទម្លាយឈ្មោះ។
កន្លងមកកញ្ញាណាក់ ស្រីណា និងលោកហង្ស សម្បើមស័ក្ត បានទម្លាយពីរឿងមិនទទួលបានប្រាក់ថ្លៃសម្តែងពីផលិតករ ទោះបីជាការរង់ចាំអូសបន្លាយពេលជាយូរក្តី ។ ទោះជាយ៉ាងណាក្តីផលិតករមានហេតុផលតបតទៅតារាទាំងនោះវិញ ។
កញ្ញាឈឹម អារីយ៉ា ជាតារាសម្ដែងលេចធ្លោនាពេលចុងក្រោយ ក្នុងរឿង«កូនប្រសារឡឺកឺ»របស់ទូរទស្សន៍ CTN, រឿង«គ្រូពេទ្យខ្ញុំ» របស់ទូរទស្សន៍ PNN, រឿង«កន្ទោងខៀវ»របស់ ទូរទស្សន៍PNN និង រឿង«គ្មានថ្ងៃបញ្ចប់» ជាដើម។ អាជីពសិល្បៈរបស់អារីយ៉ា នាពេលចុងក្រោយនេះកំពុងលូតឡើង ។ នាងបានប្រឡូកអាជីពជាតារាសម្តែងតាំងពីចុងឆ្នាំ២០១៥មក ៕
ចែករំលែកព័តមាននេះ