ខេត្តកំពង់ស្ពឺ ៖ ប្រជាពលរដ្ឋ៧៣គ្រួសាររស់នៅភូមិ៣ ឃុំត្រែងត្រយឹង ស្រុកភ្នំស្រួច បាននាំគ្នាស្វែងរកការជួយអន្តរាគមន៍ពីក្រសួង យុត្តិធម៌ ប្រមុខដឹកនាំ ដើម្បីសុំបន្តការរស់នៅខណៈពេលពួកគាត់ទទួលបានសេចក្តីសម្រេចរបស់តុលាការខេត្តឱ្យរុះរើផ្ទះពីដីដែលកំពុងរស់នៅសព្វថ្ងៃត្រឹមថ្ងៃទី១៥ មីនា ជាកំណត់ ។
អ្នកដែលត្រូវរុះរើផ្ទះនិយាយឱ្យដឹងថា ពួកគាត់ទាំង៧៣គ្រួសារនេះ មកកាប់ឆ្ការព្រៃរស់នៅតាំងពីឆ្នាំ១៩៩៣មកម្ល៉េះ ឯគ្រួសារខ្លះបានទិញដីបន្ត ។ គ្រួសារទាំងនោះមានទំហំផ្ទៃដីពី២អា ទៅ៣អា ។ នៅឆ្នាំ២០០០-២០០១ លោកជឹម សាវុង តំណាងឱ្យក្រុមហ៊ុនមួយប្រាប់ឱ្យពួកគាត់រុះរើផ្ទះចេញពីដីនោះ ។ លោកម៉ម មៅ អាយុ៦៣ឆ្នាំ មុខរបរដើរលក់នំឱ្យដឹងថា គ្រួសារគាត់រស់នៅទីនោះតាំងពីឆ្នាំ១៩៩៣មក បើសិនជាគេបណ្តេញឱ្យរុះរើផ្ទះនោះសមាជិកគ្រួសារគាត់ពុំដឹងជាទៅរស់នៅទីណាទេ។ ប្រសិនគាត់ទៅភូមិកំណើតនៅឯស្រុកស្អាង ខេត្តកណ្តាលវិញ ក៏គ្មានដីធ្លីនៅដែរ ។
លោកអ៊ុំ វណ្ណា អាយុ៤៤ឆ្នាំ មុខរបរលក់ឱសថប្រាប់ឱ្យដឹងថា ដីផ្ទះគាត់កំពុងរស់នៅនោះទិញពីយោធាចំការតាសេតតាំងពីឆ្នាំ១៩៩៣ មក ។ ដល់ពេលដីធ្លីមានហាងឆេងពួកគាត់ត្រូវគេបណេ្តញឱ្យរុះរើផ្ទះចេញតែកាលពីសម័យសង្គ្រាមគ្មានបុគ្គលណាមកអះអាងសោះ ។ ស្ត្រីឈ្មោះយឹម ចិន្តា អាយុ៣២ឆ្នាំ ជាអ្នកលក់បន្លែ មានកូនក្នុងបន្ទុក៣នាក់ និងប្តីធ្វើយោធាសព្វថ្ងៃទៅបំពេញបេសកកម្មនៅសមរភូមិខេត្តព្រះវិហារបាននិយាយថា គាត់បានរស់នៅលើដីនោះតាំងពីឆ្នាំ១៩៩៣មក ដោយមានពាក្យឱ្យស្នើសុំប្រើប្រាស់ដីធ្លីទំហំ២៩ម៉ែត្រ×៤២ម៉ែត្រ ចេញដោយលោកមេឃុំ។ បើគេបណ្តេញឱ្យរុះរើផ្ទះចេញពីដីនោះគ្រួសារគាត់ពុំដឹងមានដីឯណាសម្រាប់ការរស់នៅទៀតទេ ព្រោះមកនៅទីនេះតាំងពីទើបរៀបអាពាហ៍ពិពាហ៍មកម្ល៉េះ ។
លោកស្រីឯម ធី ជាអាជីវករបាននិយាយថា គាត់មករស់នៅប្រហាក់ប្រហែលគ្នានោះដែរ បើគេឱ្យរើផ្ទះចាកចេញមែនមិនដឹងទៅរស់នៅឯណាទេ ។ ចំណែកកូនចៅកំពុងតែសិក្សាក៏ប្រឈមមុខនឹងការលំបាកដែរ ។
លោកនង ឃឹម ជំទប់ទី២ឃុំត្រែងត្រយឹង ឱ្យដឹងថា ពលរដ្ឋរស់នៅចំណុចនោះមានការស្មុគស្មាញមិនស្របច្បាប់ គឺគ្មានការទទួលស្គាល់ពីអាជ្ញាធរមូលដ្ឋានទេ ។ មន្ត្រីឃុំធ្លាប់ទៅពន្យល់ណែនាំដល់ពួកគាត់ច្រើនលើកមកហើយថា ដីនោះមានការពាក់ព័ន្ធ ហើយបានជូនដំណឹង២លើក ដើម្បីឱ្យពួកគាត់នាំគ្នាចាកចេញ ។ ទោះបីជាបែបណា លោកគូសបញ្ជាក់ថា គួរតែម្ចាស់ដីដោះស្រាយគោលការណ៍រកទីតាំងណាមួយ សមរម្យ ដើម្បីផ្តល់ការរស់នៅបន្តសម្រាប់ការចាកចេញ ។
លោកទេព មាន អភិបាលស្រុកភ្នំស្រួចប្រាប់កាលពីម៉ោង៤ និង២០នាទីរសៀលថ្ងៃទី១០ មីនា នៅសាលាស្រុកថា លោកពុំទាន់ទទួលបានដំណឹងពីសេចក្តីសម្រេចឱ្យពលរដ្ឋភូមិទី៣រុះរើផ្ទះនៅឡើយទេ ។ តែចំណុចនោះធ្លាប់ប្រកាសសាលក្រមមួយលើកជា២លើករួចហើយ ។
អង្គការអាដហុកប្រចាំខេត្តកំពង់ស្ពឺឱ្យដឹងថា ទំនាស់ដីធ្លីមួយកន្លែងនេះរវាងពលរដ្ឋ និងក្រុមហ៊ុនបានកើតតាំងពីឆ្នាំ២០០០-២០០១ មក ហើយតុលាការខេត្តបានសម្រេចឱ្យក្រុមហ៊ុនឈ្នះ តែពេលនោះពលរដ្ឋប្រហែលមិនយល់ពីច្បាប់ទើបមិនជំទាស់ទៅសាលាឧទ្ធរណ៍។ប្រហែល៣ខែទៅ៤ខែ ក៏មានការប្រកាសសាលក្រម និងអនុវត្តដីកាឱ្យរុះរើផ្ទះចេញ ហើយប្រជាពលរដ្ឋនាំគ្នាធ្វើលិខិតស្នើសុំពន្យារពេលទៅក្រសួងយុត្តិធម៌ និងរដ្ឋសភាបានរហូតដល់បច្ចុប្បន្ននេះ ។ ប្រជាពលរដ្ឋត្រូវតែស្នើសុំតាមរយៈដូចមុន ប្រសិនបើស្ថាប័នទាំងនោះដោះស្រាយទៅតាមសំណើពួកគាត់នឹងអាចបន្តរស់នៅទៀតបាន ។
ប្រជាពលរដ្ឋទាំង៧៣គ្រួសារអំពាវនាវដល់ក្រសួងយុត្តិធម៌ ប្រមុខដឹកនាំរដ្ឋាភិបាល រដ្ឋសភាឱ្យជួយអន្តរាគមន៍ដល់ពួកគាត់ផង ។ សម្រាប់ភាគីក្រុមហ៊ុនកោះសន្តិភាពមិនអាចសុំការបំភ្លឺជុំវិញរឿងទំនាស់ដីទំហំជាង១ហិកតា ជាមួយពលរដ្ឋ៧៣គ្រួសារនោះបានទេ ៕
ចែករំលែកព័តមាននេះ