ខេត្តមណ្ឌលគិរី ៖ សត្វពាហនៈរួមនឹងសត្វចិញ្ចឹមរាប់ពាន់ក្បាលរបស់កសិករ នៅបណ្តាក្រុងស្រុកទាំង៥ ក្នុងខេត្តមណ្ឌលគិរី បានទទួលវ៉ាក់សាំងការពារជំងឺនឹងការព្យាបាលពីមន្ត្រីបសុពេទ្យរបស់មន្ទីរកសិកម្ម រុក្ខប្រម៉ាញ់ និងនេសាទ ដែលជួយ ឲ្យសត្វទាំងនោះជៀសផុតពីងាប់ដោយសារជំងឺនារដូវវស្សានេះ ។
លោក សុង ឃាង ប្រធានមន្ទីរកសិកម្មបានឲ្យដឹងថា សកម្មភាពពីការចាក់វ៉ាក់សាំង និងអន្តរាគមន៍ព្យាបាលចាប់ពីដើមឆ្នាំ រហូតដល់ពាក់កណ្តាលខែសីហា ឆ្នាំ២០១៨ ក្រុមការងារបច្ចេកទេស បានចាក់វ៉ាក់សាំងជ្រូកសរុប៤២៦០ក្បាល កើន១៩៨ ក្បាលក្នុងនោះមានការពារជំងឺសារទឹក១៥៦៦ក្បាល ជំងឺប៉េស្ត១៣៤២ក្បាល រាក១៣៥២ក្បាល ។
លោកប្រធានមន្ទីរកសិកម្មបន្តថា មន្ត្រីបានវ៉ាក់សាំងមាន់សរុប៤៩៧៥ក្បាល ក្នុងនោះវ៉ាក់សាំងការពារជំងឺញូកាស១ ៨៤០ក្បាល អាសន្នរោគ១៧២៩ក្បាល អុតមាន់១៤០៦ក្បាល ។ វ៉ាក់សាំងសារទឹកគោក្របីសរុប១ ៧៨៦ក្បាល ក្នុងនោះគោចំនួន១ ៤៣៩ក្បាល ក្របីចំនួន៣៤៧ក្បាល ។
ប្រធានមន្ទីរកសិកម្មបានបញ្ជាក់ថា ដោយឡែកចំពោះសត្វឈឺមានចំនួនសរុប ១៩៦៥ក្បាល ក្របី៣៥១ក្បាល ក្នុងនោះទទួល ការព្យាបាលចំនួន ១៥៩៥ ក្បាល ក្របី៣៤៥ក្បាល ។ មានសត្វងាប់ដោយមិនបានព្យាបាលសរុប៨៣ក្បាល ក្របី២៩ក្បាល។
ចំពោះរដូវវស្សាឆ្នាំនេះផងដែរ លោកប្រធានមន្ទីរកសិកម្មបានផ្តាំផ្ញើដល់ប្រជាកសិករទាំងអស់ត្រូវចេះប្រុងប្រយ័ត្នលើការថែរក្សាសត្វចិញ្ចឹមឲ្យបានល្អ ព្រោះរដូវនេះសត្វងាយឆ្លងនូវជំងឺនានា ដែលធ្វើឲ្យខាតបង់ពេលវេលា និងប្រាក់កាក់ របស់បងប្អូន ។
ហើយនៅពេលមានសត្វឈឺ ឬងាប់ ត្រូវរាយការណ៍ជូនមន្ត្រីជំនាញដែលនៅជិតបំផុត ដើម្បីអាចឲ្យមន្ត្រីជំនាញ ចុះព្យាបាល ឬពិនិត្យពីស្ថានភាពជំងឺជៀសវាងឆ្លងរាលដាលដល់សត្វដទៃនឹងអាចធ្វើឲ្យប៉ះពាល់ដល់សុខភាពរបស់មនុស្សផងដែរ នៅពេលបរិភោគសត្វងាប់ ដោយសារជំងឺ ៕
ចែករំលែកព័តមាននេះ