រាជធានីភ្នំពេញ ៖ ក្រសួងសុខាភិបាល និងភាគីពាក់ព័ន្ធបានព្រមានចាត់វិធានការដល់ម្ចាស់ឱសថស្ថាន និងអ្នកលក់គ្រឿងសម្អាង ពិសេសនោះនៅតាមបណ្តាញសង្គមដែលគ្មានច្បាប់អនុញ្ញាតតាមផ្លូវច្បាប់ ។ នេះបើតាមមន្ត្រីជាន់ខ្ពស់ក្រសួងសុខាភិបាល ។ លោក…
រាជធានីភ្នំពេញ ៖ ក្រសួងសុខាភិបាល និងភាគីពាក់ព័ន្ធបានព្រមានចាត់វិធានការដល់ម្ចាស់ឱសថស្ថាន និងអ្នកលក់គ្រឿងសម្អាង ពិសេសនោះនៅតាមបណ្តាញសង្គមដែលគ្មានច្បាប់អនុញ្ញាតតាមផ្លូវច្បាប់ ។ នេះបើតាមមន្ត្រីជាន់ខ្ពស់ក្រសួងសុខាភិបាល ។
លោក ង៉ែត វ៉ាន់ថូក ប្រធានសេវនាឯកជននៃមន្ទីសុខាភិបាលរាជធានីភ្នំពេញបានឲ្យដឹង ក្រោយពិធីផ្សព្វផ្សាយច្បាប់ និងការអនុវត្តឲ្យមានប្រសិទ្ធភាពខ្ពស់ក្នុងវិស័យសុខាភិបាលកាលពីរសៀលថ្ងៃទី២ កញ្ញា ថាក្រសួងសុខាភិបាល និងអគ្គស្នងការនគបាលជាតិ និងភាគីពាក់ព័ន្ធ នឹងចាត់វិធានការចំពោះអ្នកផ្សព្វផ្សាយចែកចាយឱសថដែលគ្មានច្បាប់អនុញ្ញាត ពិសេសនោះគឺគ្រឿងសម្អាតលើបណ្តាញសង្គម ។
លោកបានឱ្យដឹងថា បច្ចុប្បន្ននេះ មានឱសថស្ថានជាច្រើនបានបើកលក់ឱសថដោយសារតែសេដ្ឋកិច្ចនៅក្នុងប្រទេសមានភាពល្អប្រសើរទើបធ្វើឲ្យអ្នករកស៊ីទាំងក្នុងស្រុក និងក្រៅប្រទេសមករកស៊ីច្រើន ។ លោកបានបញ្ជាក់ថា«ចំនួនដ៏ច្រើននៃអ្នករកស៊ីផ្នែកឱសថ ថាចាំបាច់ណាស់ត្រូវមានការសុំច្បាប់អនុញ្ញាតពីរាជរដ្ឋាភិបាលជាមុនសិន ដើម្បីងាយស្រួលក្នុងការគ្រប់គ្រង ។ ពិសេសនោះកន្លែងដែលផ្តល់ឲ្យគឺនៅច្រកចេញចូលតែមួយតែម្តង» ។
លោកក៏បានអះអាងថា សព្វថ្ងៃបញ្ហាប្រឈមបានកើតឡើងចំពោះឱសថមួយចំនួនផងដែរ ប៉ុន្តែអ្វីដែលខ្លាំងនោះគឺជាគ្រឿងសម្អាងដែលបានកំពុងផ្សព្វផ្សាយនៅលើបណ្តាញសង្គមដោយគ្មានប្រភពច្បាស់លាស់ និងគ្មានច្បាប់អនុញ្ញាត នេះក្រសួងពាក់ព័ន្ធនឹងរឹតបណ្តឹង និងចាត់វិធានការដើម្បីកុំឲ្យខូចកិត្តយសដល់ប្រទេស ។
ចំណែកលោកឧត្តមសេនីយ៍ទោ ជា ប៊ុកថុល អនុប្រធាននាយកដ្ឋានកណ្តាល នគបាលយុត្តិធម៌ នៃអគ្គស្នងការនគបាលជាតិបានឲ្យដឹងថា ក្រសួងមហាផ្ទៃនឹងធ្វើវិធានរដ្ឋបាល ដោយទី១-ចេញលិខិតទៅក្រសួងសុខភិបាល, ទី២-សុំការសហការជាមួយអាជ្ញាធរ ក្នុងការផ្សព្វផ្សាយពីបញ្ហាទប់ស្កាត់ការលក់ឱសថ និងគ្រឿងសម្អាង និងទី៣-ត្រួតពិនិត្យទីតាំងទាំងឡាយដែលធ្វើការចែកចាយតែម្តង ។
លោកឧត្តមសេនីយ៍ទោបានអះអាងថា សម្រាប់អាណត្តិទី៦នេះក្រសួងនឹងខិតខំធ្វើយ៉ាងណាដឹកនាំវិស័យមួយឲ្យមានសក្តានុពលរឹងមាំដើម្បីពង្រើនការទុកចិត្តពីប្រជាជន ។ លោកបានសម្តែងក្តីសង្ឃឹមថា នឹងធ្វើកំណែទម្រង់លើវិស័យសុខាភិបាលឲ្យមានភាពល្អប្រសើរមកវិញដើម្បីផ្តល់ជំនឿចិត្តពីប្រជាពលរដ្ឋ ។
លោកបន្ថែមថា ការផ្សព្វផ្សាយច្បាប់ឱសថពិតជាមានសារៈសំខាន់ណាស់ដើម្បីឲ្យម្ចាស់ឱសថស្ថានបានដឹងច្បាប់ក្នុងការលក់ឱសថ ដោយគ្មានការលក់ឱសថក្លែងក្លា្យ គ្មានឱសថខូចគុណភាព និងឱសថគ្មានច្បាប់អនុញ្ញាតជាដើម ។
ជាមួយគ្នានោះដែរលោកឧត្តមសេនីយ៍ទោក៏បានគូសបញ្ជាក់ថា«មានអាហារបំប៉នមួយចំនួនទោះបីជាធ្វើឲ្យប្រជាជនមួយចំនួនបានជឿជាក់ពីការផ្សព្វផ្សាយតាមបណ្តាញអនឡាញ តាមបណ្តាញសង្គមមួយចំនួនមានការទទួលស្គាល់ និងចុះបញ្ជីបានត្រឹមត្រូវ ប៉ុន្តែមានអនឡាញមួយចំនូនដែលផ្សព្វផ្សាយដោយឯងៗ បានធ្វើប៉ះពាល់ដល់សុខភាព និងខាតបង់ថវិការ» ។
លោកបន្តថា កន្លងមកសមត្ថកិច្ចនៃអគ្គស្នងការនគបាលជាតិបានបង្ក្រាបទីតាំងលក់គ្រឿងសម្អាងមិនស្របច្បាប់ជាច្រើនកន្លែងផងដែរ ក្នុងនោះមានរបស់ក្លែងក្លាយ និងមិនមានគុណភាព ។ គ្រឿងសម្អាងគឺជាអាវុធមុខពីរដែលបណ្តាលឲ្យស្លាប់នៅពេលប្រើប្រាស់ក៏មាន ឬក៏ធ្វើឲ្យប៉ះពាល់ដល់សុខភាពក៏មាន ។
លោកបានលើកឡើងថា ការផ្សព្វផ្សាយនៅថ្ងៃនេះដើម្បីឲ្យម្ចាស់ឱសថស្ថានទាំងអស់បានយល់ដឹងពីច្បាប់ និងមានការភ្ញាក់ដឹងចៀសវាងលក់របស់ក្លែងក្លាយ ខូចគុណភាព និងគ្មានច្បាប់អនុញ្ញាត ។
ជាមួយគ្នានោះដែរលោក ឡី សុភាព ប្រធានសហព័ន្ធវិនិយោគិន និងជាប្រធានសមាគមអ្នកលក់ឱសថកម្ពុជាក៏បានធ្វើអំពាវនាវដល់ម្ចាស់ឱសថស្ថានទាំងអស់ ពិសេសនោះអ្នកធ្វើការផ្សព្វផ្សាយលក់នៅបណ្តាញសង្គម ឬឡាយត្រូវមើលច្បាប់ឲ្យបានដឹងជាមុនសិន ដោយកុំចេះតែឡាយ ។
លោកបញ្ជាក់ថា«ខ្ញុំសូមអំពាវនាវដល់បងប្អូនយើងធ្វើការផ្សព្វផ្សាយទំនិញតាមហ្វេសប៊ុក ឬឡាយ សូមពិនិត្យមើលបទដ្ឋានគតិយុត្តិសិន កុំចេះតែទុកចិត្តចិត្តលើកក្រុមហ៊ុនដែលធ្វើឲ្យលក់នោះពេក ។ ជួលកាលវាមកបោកយើងវាចេញទៅវិញបាត់ (ទូកទៅ កំពង់នៅ) ខាងក្រុមហ៊ុនវាប្រមូលលុយទៅបាត់ ចំណែកយើងជាអ្នកចែកចាយជាអ្នកទទួលខុសត្រូវចំពោះមុខច្បាប់» ។
លោក ឡី សុភាព ក៏បានឲ្យដឹងថា សមាគមរបស់លោកនឹងបង្កើតក្រុមការងារមួយដើម្បីតាមដានចំពោះ អ្នកធ្វើការចែកចាយផលិតផលតាមអនឡាញផងដែរ ។ លោកថា នឹងធ្វើការតាមផ្លូវច្បាប់ដោយមានសហការជាមួយអគ្គស្នងការងារនគបាលជាតិចាត់វិធានការចំពោះអ្នកដែលធ្វើការចែកចាយផលិតផលដែលគ្មានច្បាប់អនុញ្ញាតរបស់ក្លែងក្លាយ ឬខូចគុណភាព ។
លោកក៏បានឲ្យដឹងថា ការផ្សព្វផ្សាយច្បាប់នៅថ្ងៃនេះដើម្បីឲ្យបានយល់ដឹងអំពីអង្គច្បាប់ពាក់ព័ន្ធនឹងផ្នែកទណ្ឌសាស្ត្រ ដែលកិច្ចការទាំងអស់ពាក់ព័ន្ធនឹងអាយុជីវិតរបស់ប្រជាពលរដ្ឋឲ្យបានយល់ដឹងច្បាស់ ។ ការផ្សព្វផ្សាយនេះបានផ្តល់សំខាន់លើឱសថ អាហារបំប៉ន់ បែបចំណីអាហារ និងគ្រឿងសម្អាងផងដែរ ៕
ចែករំលែកព័តមាននេះ