រាជធានីភ្នំពេញ ៖ កម្មករសិប្បកម្មធ្វើនំពងទាចំនួន១៤នាក់ ក្នុងចំណោមកម្មករជាង៣០នាក់ ត្រូវបានថៅកែដេញចេញពីកន្លែងទាំងយប់ ថែមទាំងមិនព្រមបើកប្រាក់ខែឲ្យនិងបានប្រើប្រាស់អំពើហិង្សាថែមទៀតផង កាលពីវេលាម៉ោង១០យប់ថ្ងៃទី៣១ សីហា នៅសិប្បកម្មធ្វើនំពងទាយីហោឡាយគាងហួរ ក្បែរផ្ទះសំណាក់ស្ទឹងលាភ ស្ថិតតាមបណ្តោយផ្លូវលំ ក្រុមទី១ ភូមិមានជ័យ សង្កាត់ស្ទឹងមានជ័យទី១ ខណ្ឌមាន
ជ័យ ។
បើតាមសម្តីកម្មករថ្មីប្រុសស្រីទាំង១៤នាក់ខាងលើ បានរៀបរាប់ឲ្យដឹងថា ពួកគេទាំងអស់គ្នាគឺមានស្រុកកំណើតនៅស្រុកត្រាំកក់ ខេត្តតាកែវ ហើយពួកគេមកធ្វើការនៅសិប្បកម្មធ្វើនំខាងលើនេះ ទើបតែបានបួនថ្ងៃទេ ។ មុនពេលកើតហេតុនារីឈ្មោះ ហៃ នីតា អាយុ១៦ឆ្នាំ ជាអ្នកធ្វើការជាមួយគ្នា និងបងស្រីនាងម្នាក់ទៀត បានយកខោអាវដែលបោក រួចទៅហាលនៅខាងលើដំបូលផ្ទះក្នុងទីតាំងសិប្បកម្មខាងលើ ។
បន្ទាប់មក ក៏មានយុវជនម្នាក់ទៀតឈ្មោះ សឹង រតនៈ អាយុ១៨ឆ្នាំ ជាបុគ្គលិកធ្វើនំនៅកន្លែងកើតហេតុ ក៏បានទៅឈរនិយាយគ្នាលេងនិងជួយហាលខោអាវនារីខាងលើ ក្នុងនាមជាអ្នកភូមិផងរបងជាមួយ និងធ្វើការជាមួយគ្នា ។
ពេលនោះ ថៅកែជាម្ចាស់សិប្បកម្មធ្វើនំពងទាបានឡើងមកខាងលើដំបូលផ្ទះ ឃើញពីរនាក់នោះ កំពុងឈរនិយាយគ្នាលេង ស្រាប់តែលោកថៅកែខាងលើ បានស្ទុះមកទះកំផ្លៀងនារីម្នាក់ចំថ្ពាល់ខាងឆ្វេង បណ្តាលឲ្យហើម ដោយចោទពួកគេទាំងពីរនាក់ថា លួចលាក់ស្នេហានៅក្នុងសិប្បកម្មរបស់ខ្លួន ។ រួចក៏បានដេញពួកគេចេញពីរោងសិប្បកម្មទាំងយប់ ថែមទាំងស្រែកចោទពួកគេថា ជាចោរទៀតផង។
ហេតុការណ៍នេះ បង្កឲ្យមានការភ្ញាក់ផ្អើលដល់កម្មករដែលធ្វើការនាំគ្នាចេញមកមើលព្រោងព្រាត ។ បន្ទាប់មកថៅកែរូបនោះ បានដេញបុគ្គលិកផ្សេងទៀតឱ្យចូលទៅក្នុងសិប្បកម្មនោះវិញ រួចក៏ទាញទ្វាររបងបិទ ។ បុរសដែលជាថៅកែរូបនោះ បានស្រែកដាក់ទៅកម្មករទាំងអស់ថា បើអាណាចង់ចេញទៅវិញចេញទៅ យប់នេះឲ្យហើយតែត្រូវបង់លុយឱ្យគាត់ជាថៅកែក្នុងម្នាក់ចំនួន២០ដុល្លារ ទើបអាចចេញបាន ហើយបើអាណាហ៊ានផ្លោះរបងអញ និងប្រាប់ប៉ូលិសឲ្យចាប់ដាក់គុក ។
ការឈ្លោះប្រកែកគ្នារវាងកម្មករ ដែលទើបចូលមកធ្វើការ និងលោកថៅកែក៏បានឈានដល់ការដេញអ្នកដែលទើបចូលមកធ្វើការខាងលើឱ្យចេញទៅខាងក្រៅ រួចបិទទ្វាររបងចាក់សោជិត ដោយមិនបានយកអ្វីចេញទៅទាំងអស់ សូម្បីតែខោអាវរបស់ពួកគេ ។ ដោយឡែក កម្មករផ្សេងទៀតបាននាំគ្នាទៅសម្ងំដេកនៅខាងក្នុងបាត់អស់ទៅ ។
បន្ទាប់មក ពួកគាត់ជាកម្មករដែលត្រូវបានថៅកែដេញចេញខាងលើ បានរាយការណ៍ជូនទៅសមត្ថកិច្ចមូលដ្ឋានឲ្យចុះមកជួយអន្តរាគមន៍ ខណៈពេលដែលសមត្ថកិច្ចមូលដ្ឋានបានចុះមកដល់ចំណុចកើតហេតុ ទើបបុរសដែលជាថៅកែព្រមប្រគល់របស់របរមកឲ្យកម្មករទាំង១៤នាក់ខាងលើវិញ ប៉ុន្តែមិនព្រមបើកប្រាក់ខែដែលធ្វើការបានចំនួន៤ថ្ងៃ មកឱ្យពួកគេទាំង១៤នាក់នោះទេ ដែលគ្នាអត់មានប្រាក់សោះ ។
ក្រោយពេលកើតហេតុ ដោយក្តីអាណិតអាសូរ ក៏មានអ្នកជិតខាងខ្លះបានជួយជាលុយបន្តិចបន្តួច និងខ្លះទៀតជួយជាគ្រឿងបរិភោគទៅអ្នកដែលត្រូវថៅកែដេញចេញដូចជាសត្វធាតុខាងលើសម្រាប់ជាសោហ៊ុយទៅស្រុកវិញ ។ បន្ទាប់មក កម្មករប្រុសស្រីទាំង១៤នាក់នោះបាននាំគ្នាចាកចេញពីសិប្បកម្មខាងលើ ទៅរកកន្លែងសម្រាកមួយយប់សិនរង់ចាំព្រឹកស្អែក ទៅធ្វើការដាក់ពាក្យបណ្តឹង ហើយត្រឡប់ទៅស្រុកកំណើតវិញ។
គួរបញ្ជាក់ថា សិប្បកម្មខាងលើ គេតែងសង្កេតឃើញមានកុមារនៅតូចៗដែលមិនទាន់គ្រប់អាយុបំពេញការងារ បានមកបម្រើការងារនៅក្នុងសិប្បកម្មនេះជាច្រើននាក់ ។ ក្រោយពេលថៅកែប្រុសទះកំផ្លៀងលើក្មេងស្រី និងស្តីបន្ទោសកម្មករទាំងកណ្តាលយប់ផ្អើលដល់ក្រុមអ្នកសារព័ត៌មានចុះទៅថតរូបនិងធ្វើការLiveផ្ទាល់តាមបណ្តាញសង្គមក៏បានដឹងដល់លោកជំទាវ ហ៊ុន ចាន់ថុល បានអោយក្រុមការងារចុះទៅរំដោះយកកម្មករប្រុសស្រីចំនួន១៤នាក់ យកមកស្នាក់នៅផ្ទះសំណាក់បណ្តោះអាសន្នមួយយប់នៅឯខណ្ឌចំការមន ។
លុះនៅវេលាម៉ោង២រសៀលថ្ងៃទី១ កញ្ញា ក្មេងកម្មករប្រុសស្រីទាំង១៤នាក់ បាននាំគ្នាមកដាក់ពាក្យបណ្តឹងនៅប៉ុស្តិ៍នគរបាលស្ទឹងមានជ័យ១ ប្តឹងថៅកែប្រុសឈ្មោះ ធួក គួង អាយុ៥៥ឆ្នាំ ពីបទប្រើអំពើហិង្សា ។ក្រោយពេលដាក់ពាក្យបណ្តឹងចប់សព្វគ្រប់ហើយលោកជំទាវ ហ៊ុន ចាន់ថុល ដែលបានឈឺឆ្អាលពីសុខទុក្ខពលរដ្ឋក្រីក្រផ្តល់រថយន្តដឹកជញ្ជូនក្មេងប្រុសស្រីទាំង១៤នាក់ និងផ្តល់ប្រាក់ឱ្យក្នុងម្នាក់ៗ១០ម៉ឺនរៀល និងឱ្យក្រុមការងារដឹកជញ្ជូនពួកគេត្រឡប់ទៅស្រុកកំណើតវិញផងដែរ ។
សំណុំរឿងនេះ មិនទាន់ដឹងថា សមត្ថកិច្ចនិងចាត់វិធានការបែបណាទេ ក្រោយពីទទួលពាក្យបណ្តឹង ។ នេះ
ជាបាតុភាពលើកដំបូងហើយ ដែលសហគ្រាសខ្នាតតូចមួយបំពានលើសិទ្ធិកម្មកររបស់ខ្លួនបែបនេះ និងសង្ឃឹមថា ជនក្រីក្រនិងទទួលបានយុត្តិធម៌មិនខាន ។
មិនអាចទាក់ទងសុំការបំភ្លឺបានទេពីថៅកែសិប្បកម្មខាងលើនេះ ព្រោះគាត់មិនសហការជាមួយអ្នកកាសែតទេ ហើយបិទទ្វាររបងតែម្តង ៕
ចែករំលែកព័តមាននេះ