រាជធានីភ្នំពេញ ៖ ដើម្បីផ្សព្វផ្សាយពីតំបន់ទេសចរណ៍នានាក្នុងប្រទេសកម្ពុជា វិនិយោគិនចិនដែលវិនិយោគក្នុងវិស័យអចលនទ្រព្យនៅកម្ពុជា បានចំណាយប្រាក់២លានដុល្លារ ដើម្បីផលិតខ្សែភាពយន្តមួយដែលនិយាយពីស្នេហាឆ្លងដែន គោលបំណងដើម្បីផ្សព្វផ្សាយពីវប្បធម៌ និងតំបន់ទេសចរណ៍សំខាន់ក្នុងប្រទេសកម្ពុជាដល់ពិភពលោកបានដឹង ។
បើតាមលោក លី មីន អគ្គនាយកក្រុមហ៊ុនអចលនទ្រព្យ ព្រីនស៍ រៀលអុីស្ទេត បានឲ្យដឹងថា ការផលិតខ្សែភាពយន្តនេះឡើង ដើម្បីបង្កើនទំនាក់ទំនងរវាងកម្ពុជានិងចិន ដែលមានជាយូរមកហើយ ។ អ្វីដែលពិសេសនោះ គឺដើម្បីបង្ហាញទៅកាន់ពិភពលោកពីតំបន់ទេសចរណ៍ល្បីៗ និងវប្បធម៌របស់ប្រទេសកម្ពុជា ព្រោះរឿងដែលផលិតឡើងនេះ ក៏នឹងយកទៅដាក់ប្រកួតជានៅរដ្ឋឡូសអ៊ែនជីឡេស សហរដ្ឋអាមេរិកផងដែរ ។
លោកបន្តថា រឿងនេះនឹងត្រូវចំណាយប្រាក់២លានដុល្លារអាមេរិកដើម្បីផលិតឡើង ហើយនឹងត្រូវថតនៅរាជធានីភ្នំពេញ ខេត្តព្រះសីហនុ ខេត្តសៀមរាប និងខេត្តកំពត ដែលសុទ្ធសឹងជាតំបន់ទេសចរណ៍ល្បីៗ និងជាគោលដៅទេសចរណ៍សម្រាប់ភ្ញៀវអន្តរជាតិ ។ លោកនិយាយថា ៖« ក្រៅពីថតនៅប្រទេសកម្ពុជា រឿងនេះក៏នឹងត្រូវថតនៅទឹកដីនៃប្រទេសចិនមួយចំនួនផងដែរ ព្រោះដោយសារតែវាមានទំនាក់ទំនងរវាងចិន និងកម្ពុជា »។
រដ្ឋមន្ត្រីក្រសួងទេសចរណ៍កម្ពុជា លោកបណ្ឌិត ថោង ខុន បានមានប្រសាសន៍ថា តាមរយៈខ្សែភាពយន្តដែលវិនិយោគិនចិនថតនៅក្នុងប្រទេសកម្ពុជានេះ នឹងរួមចំណែកដល់ការផ្សព្វផ្សាយតំបន់ទេសចរណ៍របស់កម្ពុជាទៅកាន់ពិភពលោកដើម្បីទាក់ទាញភ្ញៀវទេសចរអន្តរជាតិបន្ថែមទៀតមកទស្សនានៅក្នុងប្រទេសកម្ពុជា ។ លោកថ្លែងថា ៖« វិស័យទេសចរណ៍បានសម្រេចលទ្ធផលគួរជាទីមោទន ដោយមានកំណើនពីរខ្ទង់ជាប់ៗគ្នាក្នុងរយៈពេលប៉ុន្មានឆ្នាំចុងក្រោយនេះ។ ជាក់ស្ដែងក្នុងឆ្នាំ២០១៧កន្លងទៅ កម្ពុជាសម្រេចបាននូវកំណើនទេសចរអត្រា១១,៨% ជាមួយនឹងការមកដល់នៃភ្ញៀវអន្តរជាតិជាង៥,៦លាននាក់ និងនាំមកនូវប្រាក់ចំណូលប្រមាណ៣.៤០០លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ ដែលបានរួមចំណែកក្នុង GDP ប្រមាណ១៣% » ។
លោកបន្តថា ក្នុងឆ្នាំ២០១៨នេះ កម្ពុជារំពឹងទទួលបានភ្ញៀវទេសចរអន្តរជាតិចំនួន៦,២លាននាក់ និងប្រមាណ៧លាននាក់ក្នុងឆ្នាំ២០២០ និងនាំមកនូវប្រាក់ចំណូលប្រមាណ៥ពាន់លានដុល្លារអាមេរិក ចាក់បញ្ចូលក្នុងសេដ្ឋកិច្ច ដែលបង្កើតឱកាសការងារបានប្រមាណ១លាននាក់ ហើយក្នុងឆ្នាំ២០៣០ កម្ពុជារំពឹងថាភ្ញៀវទេសចរមកទស្សនាក្នុងតំបន់ផ្សេងៗប្រមាណ១៥លាននាក់បង្កើតការងារបានប្រមាណ២លាននាក់ និងនាំប្រាក់ចំណូលបានប្រមាណ១០ពាន់លានដុល្លារអាមេរិក ក្នុងនោះក្រសួងបានព្យាយាមកែច្នៃតំបន់ទេសចរណ៍ដែលមានស្រាប់ ដើម្បីធ្វើឲ្យទាក់ទាញដល់ភ្ញៀវទេសចរអន្តរជាតិ ។
លោកបន្ថែមថា ៖« ខេត្តព្រះសីហនុ គឺជាគោលដៅទេសចរណ៍ដ៏សំខាន់មួយ ក្នុងនោះក្រសួងទេសចរណ៍ និងស្ថាប័នពាក់ព័ន្ធ ក៏បាននិងកំពុងយកចិត្តទុកដាក់លើគម្រោងកោះគំរូ ជាគោលដៅអេកូទេសចរណ៍លំដាប់ខ្ពស់ និងជាគោលដៅទេសចរណ៍បៃតងគ្មានថង់ប្លាស្ទិកឲ្យបានមុនឆ្នាំ២០២០ ដោយបន្តខិតខំគ្រប់គ្រងឆ្នេរខ្សាច់ឲ្យបានស្អាត និងបៃតង ខិតខំអភិវឌ្ឍន៍ឆ្នេរសមុទ្រកម្ពុជាយើងប្រាកដដោយនិរន្តរភាព »។
លោករដ្ឋមន្ត្រីបញ្ជាក់ថា សម្រាប់គោលដៅទេសចរណ៍ផ្សេងៗទៀតនៅក្នុងប្រទេសកម្ពុជា ដូចជារមណីយដ្ឋានតំបន់អង្គរ ប្រាសាទសំបូរព្រៃគុក និងតំបន់ទេសចរណ៍ល្បីជាច្រើនទៀត ក៏មានគម្រោងអភិវឌ្ឍន៍ កែច្នៃឲ្យល្អប្រសើរដែរ ដើម្បីឲ្យភ្ញៀវទេសចរអន្តរជាតិបានស្នាក់នៅយូរក្នុងទឹកដីប្រទេសកម្ពុជា ៕
ចែករំលែកព័តមាននេះ