ប្រទេសអ៊ីរ៉ង់ ៖ ដកស្រង់សម្ដីដោយទីភ្នាក់ងារព័ត៌មានIRNA អ្នកទទួលខុសត្រូវជាន់ខ្ពស់ម្នាក់នៃក្រសួងការពារប្រទេសអ៊ីរ៉ង់ថ្លែងនាថ្ងៃទី១ កញ្ញាថា អ៊ីរ៉ង់នឹងពង្រឹងសមត្ថភាពមីឮស៊ីលបាលីស្ទិកនិងយោធា។
លោកម៉ូហាម៉េដ អាហាឌី អនុរដ្ឋមន្ត្រីការពារប្រទេសអ៊ីរ៉ង់ ទទួលបន្ទុកកិច្ចការអន្តរជាតិថ្លែងថា កែលម្អសមត្ថភាពបាលីស្ទិក ហើយទទួលបានបណ្ដាយន្តហោះប្រដេញជំនាន់ថ្មីៗ បណ្ដានាវាចម្បាំងធំៗ ព្រមទាំងនាវាមុជទឹក ជាមួយសមត្ថភាពគ្រឿងសព្វាវុធផ្សេងៗ ជាផែនការថ្មីរបស់ក្រសួង។
យុទ្ធសាស្ត្រយោធាកាន់តែមានលក្ខណៈវាយលុករបស់អ៊ីរ៉ង់ អាចបង្កើនភាពតានតឹងជាមួយសហរដ្ឋអាមេរិក ដែលមានស្រាប់ចាប់តាំងពីលោកដូណាល់ត្រាំ សម្រេចដកខ្លួនថយពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ហើយធ្វើឲ្យបណ្ដាប្រទេសអឺរ៉ុបខ្វាយខ្វល់រួចខិតខំជួយសង្ក្រោះកិច្ចព្រមព្រៀងនោះ។
យោងតាមប្រភពពួកលោកខាងលិច អ៊ីរ៉ាក់ និងអ៊ីរ៉ង់ថា ក្រុងតេហេរ៉ង់បានផ្ដល់មីស៊ីលបាលីស្ទិកដល់ពួកជីវពលសស៊ីអ៊ីតជាសម្ព័ន្ធមិត្តនៅអ៊ីរ៉ាក់ ហើយជួយអ៊ីរ៉ាក់ក្នុងការពង្រីកសមត្ថភាពផលិតមីស៊ីល ដើម្បីការពារផលប្រយោជន៍របស់ខ្លួនហើយផ្ដល់មធ្យោបាយតបតចំពោះការវាយប្រហារមួយរបស់ពួកសត្រូវក្នុងតំបន់។
ទោះបីយ៉ាងណាអ៊ីរ៉ង់កាលពីថ្ងៃទី១ កញ្ញា បានបដិសេធព័ត៌មាននោះរបស់រ៉យទ័រ ហើយវាយតម្លៃថាជាការនិយាយខុសសំដៅបំផ្លាញទំនាក់ទំនង រវាងក្រុងតេហេរ៉ង់និងបណ្ដាប្រទេសជិតខាង។
អ្នកនាំពាក្យក្រសួងការបរទេសអ៊ីរ៉ង់លោកបាហ៍រ៉ាមកាសឺមីថ្លែងថា ព័ត៌មានខុស និងគួរឲ្យអស់សំណើចបែបនោះ គ្មានគោលបំណងណាក្រៅពីចង់បំផ្លាញទំនាក់ទំនងក្រៅប្រទេសរបស់អ៊ីរ៉ង់ឡើយ។
ចំណែកកាសែត AL MASDAR NEWS រាយការណ៍ថា អ៊ីរ៉ង់ត្រៀមផ្ដល់ឲ្យកងទ័ពស៊ីរីនូវយន្តហោះយោធាថ្មីៗព្រមទាំងប្រព័ន្ធការពារអាកាសដែលខ្លួនផលិត។កាសែតនោះអះអាងដោយយោងទៅតាមប្រភពយោធាមួយនៅក្រុងដាម៉ាស់។ តាមកាសែតនេះអ៊ីរ៉ង់ត្រូវផ្ដល់ឲ្យក្រុងដាម៉ាស់ យន្តហោះប្រដេញផលិតបានដំបូងដោយខ្លួនឯងធុន KOWSAR។ ម្យ៉ាងទៀតអ៊ីរ៉ង់ត្រូវផ្ដល់ឲ្យស៊ីរីនូវប្រព័ន្ធការពារអាកាសដែលខ្លួនផលិតផងដែរ៕
ចែករំលែកព័តមាននេះ