ប្រទេសអ៊ុយក្រែន ៖ វិមានក្រឹមឡាំងកាលពីថ្ងៃទី១ កញ្ញា បានចាត់ទុកការធ្វើឃាតមេដឹកនាំបំបែកខ្លួននិយមស្និទ្ធក្រុងមូស្គូ សំខាន់មួយរូប នាភាគខាងកើតអ៊ុយក្រែន លោកALEXANDRE ZAKHARTCHENKO ថា ជាការបង្កហេតុ ដែលអាចនាំឲ្យភាពតានតឹងកាន់តែធ្ងន់ធ្ងរក្នុងតំបន់។
អ្នកនាំពាក្យវិមានក្រឹមឡាំង លោកឌីមីទ្រីប៉េស្កូវ ថ្លែងទៅកាន់បណ្ដាអ្នកកាសែតថា ពិតណាស់នោះជាការបង្កហេតុមួយ។ ការសម្លាប់លោក ZAKHARTCHENKO នឹងធ្វើឲ្យកាន់តែធ្ងន់ធ្ងរដល់សភាពការណ៍ក្នុងតំបន់ ហើយបំផ្លាញដំណើរការសន្តិភាពតាមរយៈកិច្ចព្រមព្រៀងក្រុងមីនស្ក៍ ចុះហត្ថលេខាកាលពីខែកុម្ភៈ ដោយរុស្ស៊ី អ៊ុយក្រែន បារាំង និងអាល្លឺម៉ង់។
លោក ZAKHARTCHENKO អាយុ៤២ឆ្នាំ ប្រធានាធិបតីនៃសាធារណរដ្ឋ DONETSK ជាឈ្មោះនៃទីក្រុងសំខាន់មួយនាភាគខាងកើតអ៊ុយក្រែន។ លោកត្រូវគេសម្លាប់កាលពីថ្ងៃទី៣១ សីហា តាមរយៈការធ្វើឲ្យផ្ទុះក្នុងហាងកាហ្វេមួយកន្លែង។អង្គរក្សម្នាក់របស់លោកក៏ត្រូវស្លាប់រួចមនុស្ស១២នាក់រងរបួស។
នៅ DONETSK ក្រោយការធ្វើឃាតលោកZAKHARTCHENKO គេបានចេញការប្រកាសអាសន្នក្នុងផ្ទៃកងទ័ពពួកបំបែកខ្លួន រួចមេបញ្ជាការបំបែកខ្លួននិយមលោក EDOUARD BASSOURINE អះអាងថា ក្រុងកៀវគ្រោងបើកការវាយលុកមួយនាពាក់កណ្ដាលខែកញ្ញា ជាការអះអាងដែលអាជ្ញាធរក្រុងកៀវបានបដិសេធ។
អាជ្ញាធរពួកឧទ្ទាម និងក្រុងមូស្គូសង្ស័យថាអ៊ុយក្រែនជាប្រភពនៃការផ្ទុះនេះ ចំណែកអ៊ុយក្រែងថា ការធ្វើឃាតនោះមកពីជម្លោះផ្ទៃក្នុងរបស់ពួកឧទ្ទាម។ចាប់តាំងពីយប់ថ្ងៃទី៣១សីហាមក ប្រធានាធិបតីរុស្ស៊ី លោកវ្ល៉ាឌីមៀរពូទីន បានសម្ដែងការចូលរួមមរណទុក្ខជាមួយប្រជាជន DONETSK ដោយលោកចាត់ទុកលោកZAKHARTCHENKOថា ជាមេដឹកនាំដែលមានប្រជាប្រិយភាពពិតប្រាកដនិងជាមនុស្សអង់អាចក្លាហានហើយមានការតាំងចិត្តខ្ពស់៕
ចែករំលែកព័តមាននេះ