រាជធានីភ្នំពេញ ៖ ដោយសារតែស្ថានភាពរបួសធ្ងន់ធ្ងរពេក លោក ហ៊ិន រតនា ដែលត្រូវបានគេស្គាល់ថា ជាគ្រូបង្វឹកសុនខដ៏ល្បីឈ្មោះមួយរូប ត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យមន្ទីរពេទ្យបំរ៉ុងរ៉ាត់ (Bumrungrad International Hospital) នៅទីក្រុងបាងកក ប្រទេសថៃ កាលពីរាត្រីថ្ងៃទី៣១ ខែសីហា ឆ្នាំ២០១៨ កន្លងទៅនេះ ។
លោក ហ៊ិន រតនា នាពេលបច្ចុប្បន្នកំពុងតែស្ថិតក្នុងបន្ទប់សង្គ្រោះបន្ទាន់ (ICU) នៅមន្ទីរពេទ្យ បំរ៉ុងរ៉ាត ដែលតម្លៃបន្ទប់គឺជាង ៣០០០ ដុល្លារសហរដ្ឋអាមេរិក សម្រាប់ការសង្គ្រោះជីវិតរបស់លោក ដែលជួបបានជួបគ្រោះថ្នាក់ចរាចរណ៍ដោយសារឡានដែលបើកបរដោយជនជាតិចិនមកបុកពីក្រោយ រួចហើយថយមកកិន បណ្តាលឱ្យគាត់បាក់ឆ្អឹងខ្នង ខ្ទេចសាច់ដុំស្លាបប្រចៀវ និងប៉ះពាល់ដល់សួត ដែលធ្វើឱ្យក្នុងខ្លួនគាត់លែងផលិតឈាម ។ មុនពេលបញ្ជួនទៅប្រទេសថៃ លោក ហ៊ិន រតនា ត្រូវបានសង្គ្រោះ និងព្យាបាលមួយរយៈនៅក្នុងមន្ទីរពេទ្យកាល់ម៉ែត ។
យោងតាមគណនីហ្វេសប៊ុកឈ្មោះ Sovothy Oeun បានបង្ហោះសារលើហ្វេសប៊ុករបស់ លោកដែលមានខ្លឹមសារថា «សំណង ២០.០០០ ដុល្លារ ជីវិត Him Rattana ក្រោមសំបកកងរថយន្តបើកបុកថយកិនដោយជនជាតិចិន នៅខាងក្រោយខ្នងរបស់ខ្ញុំ គឺជាសំរាមជនជាតិចិននៅកម្ពុជា កំពង់សោមថ្ងៃនេះកែវភ្នែករបស់ខ្ញុំមើលឃើញ ជនជាតិចិនទាំងអស់នេះជាសត្វចង្រៃដែលបង្កគ្រោះថ្នាក់នៅថ្ងៃអនាគត លើទឹកដីមាតុភូមិខ្មែរ»។
គណនីដដែលបានអំពាវនាវឲ្យលោកអ្នកសប្បុរជនឲ្យរូបលោក ហ៊ិន រតនា ដោយសារតែ «ប្លង់ផ្ទះក៏ត្រូវដាក់បញ្ចាំ ដើម្បីសង្គ្រោះជីវិតគ្រួសារអស់លទ្ធភាពហើយ»។ ជាមួយគ្នានោះផងដែរ ហ្វេសប៊ុករបស់ជនរងគ្រោះផ្ទាល់ក៏បានសរសេរបង្ហោះសុំជំនួយពីសប្បុរជនដោយបញ្ជាក់ថា រូបលោកនៅព្យាបាលនៅមន្ទីរពេទ្យបំរុងរ៉ាត់ និងសូមអធិដ្ឋាន និងផ្ញើការបរិច្ចាគទៅគណនីវីង USD 00543601 ឬគណនីរៀល 00564145 ។ សារដដែលបានបញ្ជាក់ថា រូបលោកឥឡូវនេះសុខភាពមិនសូវល្អទេ ដោយសារតែបញ្ហាសួត។
តាមការឲ្យដឹងពីក្រុមសាច់ញាតិ និងមិត្តភក្តិ គ្រោះថ្នាក់ចរាចរណ៍នេះបានកើតនាថ្ងៃទី ២៥ ខែសីហា ដោយជនរងគ្រោះត្រូវរថយន្តរបស់ជនជាតិចិនបុក ហើយត្រឡប់មកកិនបន្ថែមទៀតនោះ បណ្តាលឲ្យរងរបួសយ៉ាងធ្ងន់ធ្ងរ រហូតបាក់ឆ្អឹងខ្នង ឆ្អឹងស្លាបប្រចៀវឆ្អឹង ជំនីជាច្រើនកន្លែង។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ក៏បានបង្ហោះសារលើគណនីហ្វេសប៊ុករបស់លោកថា «ខ្ញុំនិងក្រុមជំនាញសុនខស៊ីម៉ាក់ទាំងអស់ មានការសោកស្តាយ និងក្តុកក្តួលចិត្តក្រៃលែង ដោយលោក ហ៊ិន រតនា ជាអ្នកជំនាញសុនខយ៉ាងពិសេស មួយរូបមានគ្រោះថ្នាក់ចរាចរណ៍រងរបួសធ្ងន់ធ្ងរ។ ខ្ញុំធ្លាប់សន្ទនាជាមួយគាត់ជាភាសាខែ្មរខ្លះ ជាភាសាអង់គ្លេសខ្លះ ព្រោះលោកបានរស់នៅ និងធ្វើការយូរនៅសហរដ្ឋអាមេរិក នឹងមានសមត្ថភាពប្រើប្រាស់ភាសាទាំង២! លោកជាអ្នកជំនាញសុនខកំរិតអន្តរជាតិ។ សូមឱ្យលោកហ៊ីន រតនា បានជាសះស្បើយ និងរឹងមាំឡើងវិញបានឆាប់រហ័ស។ ពួកយើងនឹងចូលរួមចែករំលែកធនធានផ្ទាល់ខ្លួន ចូលរួមជាមួយគ្រួសារលោក ហ៊ិន រតនា!» ។
យោងតាមគណនីហ្វេសប៊ុកឈ្មោះ Yulia Khouri បានបង្ហោះសារជាភាសាអង់គ្លេសបញ្ជាក់ពីស្ថានភាពរបស់លោក ហ៊ិន រតនា ថា វីរបុរសបង្ហាត់សុនខដ៏ល្បីកំពុងសង្គ្រោះបន្ទាន់នៅក្នុងបន្ទប់ ICU នៅឯមន្ទីរពេទ្យមួយនាក្រុងបាងកក។ គណនីហ្វេសប៊ុកឈ្មោះ Yulia Khouri បន្ថែមថា «អ្វីដែលគួរឲ្យរន្ធត់នោះ គឺការឆ្លងមេរោគថ្មីមួយទៀតត្រូវបានគេរកឃើញ នោះគឺកន្លែងដែលត្រូវការវះកាត់ឆ្អឹងខ្នងត្រូវបានធ្វើ។ ដូច្នេះក្រៅពីការឆ្លងមេរោគសួត គាត់កំពុងប្រយុទ្ធប្រឆាំងនឹងនឹងការវះកាត់នៃការឆ្លងនេះ»។
មហាជនក្រៅពីការបង្ហាញការអាណិត និងបួងសួងឲ្យរូបលោកជាសះស្បើយ ក៏បានទាមទារឲ្យបង្ហាញនូវអត្តសញ្ញាណជនជាតិចិនដែលបង្កហេតុ ដោយចោទជាសំណួរថា តើពេលនេះអ្នកបើកបរនៅឯណា ហើយមិនត្រូវបញ្ចប់ត្រឹមសំណងនោះទេ ?
លោក ហ៊ិន រតនា ត្រូវបានគេស្គាល់ថា ជាអ្នកជំនាញបង្ហាត់សុនខខ្មែរដ៏ល្បីដែលត្រូវបានទទួលស្គាល់ដោយស្ថាប័នជាតិ និងអន្តរជាតិ ហើយលោកធ្លាប់បង្ហាញវត្តមានក្នុងកម្មវិធីមួយរបស់ស្ថានីយទូរទស្សន៍ National Geography និងបណ្តាញព័ត៌មានអន្តរជាតិផ្សេងទៀតផង ៕
ចែករំលែកព័តមាននេះ