ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា សត្វពស់មួយក្បាលបានចឹកក្មេងប្រុសម្នាក់ពេលដើរឆ្លុះបង្កែបនៅតាមភ្លឺស្រែហើយខំរត់ពីកន្លែងសត្វពស់ចឹកមកផ្ទះ ប៉ុន្តែអកុសលបានស្លាប់បាត់បង់ជីវិតទៅហើយ ហេតុការណ៍នេះកើតឡើងកាលពីម៉ោង៦ដល់ម៉ោង៩យប់ ថ្ងៃទីថ្ងៃទី៣១ ខែសីហា ឆ្នាំ២០១៨ ស្ថិតក្នុងភូមិឱម៉ាល់ចាស់…
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា សត្វពស់មួយក្បាលបានចឹកក្មេងប្រុសម្នាក់ពេលដើរឆ្លុះបង្កែបនៅតាមភ្លឺស្រែហើយខំរត់ពីកន្លែងសត្វពស់ចឹកមកផ្ទះ ប៉ុន្តែអកុសលបានស្លាប់បាត់បង់ជីវិតទៅហើយ ហេតុការណ៍នេះកើតឡើងកាលពីម៉ោង៦ដល់ម៉ោង៩យប់ ថ្ងៃទីថ្ងៃទី៣១ ខែសីហា ឆ្នាំ២០១៨ ស្ថិតក្នុងភូមិឱម៉ាល់ចាស់ (ភូមិបត់ត្រង់) ឃុំប្រាសាទ ស្រុកព្រះនេត្រព្រះ។
ប្រភពព័ត៌មានពីនគរបាលមូលដ្ឋានបានឲ្យដឹងថា ក្មេងប្រុសរងគ្រោះខាងលើឈ្មោះ ឈួត ក្ដៀប អាយុ១៥ឆ្នាំ រស់នៅភូមិ-ឃុំកើតហេតុ។
ប្រភពដដែលបន្តថា មុនកើតហេតុមានក្មេងប្រុសៗពី៣ទៅ៥នាក់នៅភូមិឱម៉ាល់ចាស់បច្ចុប្បន្នភូមិបត់ត្រង់ បាននាំគ្នាចេញពីផ្ទះទៅដើរឆ្លុះកង្កែបក្នុងភូមិ និងតាមភ្លឺស្រែក្បែៗភូមិមួយចំនួនប៉ុណ្ណោះ ប៉ុន្តែការដើរឆ្លុះនេះក្មេងៗទាំងអស់មិនបានដើរជុំគ្នានោះទេ ។
ប្រភពដដែលបញ្ជាក់ថា ចំណែកក្មេងប្រុសរងគ្រោះគឺកំពុងដើរឆ្លុះកង្កែបនៅតាមភ្លឺស្រែ ស្រាប់តែត្រូវពស់ចឹក ហើយក្មេងប្រុសរងគ្រោះព្យាយាមខំរត់ពីកន្លែងសត្វពស់ចឹកមកផ្ទះដែលមានចំងាយប្រហែលជាង១០០ម៉ែត្រ ប៉ុន្តែជាអកុសលពេលរត់មកដល់ក្រោមផ្ទះរបស់ឈ្មោះ ទួន ឈួន ភេទស្រី អាយុ៦៣ឆ្នាំ នៅភូមិជាមួយគ្នាដែលនៅចុងភូមិ ក៏បានដាច់ខ្យល់ស្លាប់បាត់បង់ជីវិតទៅហើយ។
ក្រោយពេលកើតហេតុ តាមការពិនិត្យរបស់សមត្ថកិច្ចជំនាញ និងការបំភ្លឺពីអាណាព្យាបាលក្មេងរងគ្រោះ គឺពិតជាស្លាប់ដោយសារពស់ចឹកពិតប្រាកដមែន ពីព្រោះនៅលើរង្វង់ភ្នែកខាងស្ដាំមានស្នាមចង្កូមពស់ហើយមិនមានស្លាកស្នាមណាមួយពាក់ព័ន្ធនឹងអំពើឃាតកម្មឡើយ៕
ចែករំលែកព័តមាននេះ