រាជធានីភ្នំពេញ ៖ ដ្បិតថា បានវិវត្តន៍ខ្លួនក្លាយជាតួឯកស្រីយ៉ាងលេចធ្លោក្នុងភាពយន្តភាគមួយដែលត្រូវគេដឹងថា មានរហូតដល់ជាង១០០ភាគជាប់ជាភាពយន្តភាគទូរទស្សន៍វែងជាងគេនៅកម្ពុជា ដែលម្នាក់ៗរំពឹងថា តារាចម្រៀងធ្លាប់គ្រងតំណែងល្បីល្បាញក្នុងពិភពចម្រៀង កញ្ញា តាក់ម៉ា បានអះអាងថា ខ្លួនមិនចោលអាជីពចាស់ឡើយ។
នាងបានទាំងរៀបរាប់ឱ្យដឹងពីការវិត្តន៍របស់ខ្លួនដោយប្រកាន់ជំហរថា នឹងត្រៀមបញ្ចេញបទចម្រៀងឱ្យខ្លាំងឡើងវិញនាពេលខាងមុខ ហើយកញ្ញា តាក់ម៉ា បានថ្លែងប្រាប់ថា ក្នុងរឿងប្រអប់សំបុត្រចោលទុក្ខដ្បិតថា មានអ្នកនិពន្ធរហូតដល់១០រូប ប៉ុន្តែក្នុងនោះក៏មាននាងចូលរួមគំនិតផងដែរ ក្រៅពីនាងដើរតួជាផលិតករនៅក្នុងភាពយន្តនេះ។
មានភាពខុសប្លែកគ្នាពីអាជីពចម្រៀងយ៉ាងខ្លាំង ដោយនាងបញ្ជាក់ថា គឺជារឿងលំបាកខ្លាំងដែលនាងធ្លាប់តែច្រៀង ស្រាប់តែមកធ្វើជាអ្នកដឹកនាំសម្ដែងហើយថែមទាំងសម្ដែងតួឯកខ្លួនទៅទៀត ដែលធ្វើឱ្យនាងពិបាកបត់បែនអារម្មណ៍។
យ៉ាងណាមិញ នាងថា មិនរាថយក្រោយនោះទេ ដោយនាងគ្រោងផលិតភាពយន្តដដែលនេះក្នុងវគ្គផ្សេងទៀត ដើម្បីឱ្យរឿងប្រអប់ចោលទុក្ខមានវគ្គកាន់តែច្រើន ក្រោយពីសាច់រឿង៤វគ្គត្រូវបានបញ្ចប់ ។ កញ្ញារំពឹងយ៉ាងខ្លាំងថា ភាពយន្តជាង១០០ភាគជាលើកដំបូងនៅកម្ពុជានេះ នឹងទទួលបានជោគជ័យដោយសារតែសាច់រឿងក្នុងវគ្គនីមួយៗសុទ្ធតែសម្ដែងដោយតួអង្គផ្សេងគ្នា ។
នៅក្នុងពិធីនោះ គេឃើញតារាស្ទើរទាំងអស់ស្លៀកឈុតពណ៌ក្រហម ហើយរំលេចសម្រស់យ៉ាងស្រស់សង្ហារ និងស្រស់ផូរផង់តែម្ដង ជាពិសេសកញ្ញា តាក់ម៉ា ដែលជាតារាចម្រៀងមួយរូប លោកហេង នរៈកក្កដា តារាសម្ដែង, កញ្ញា ភីយ៉ា តារាសម្ដែង, លោកស៊ិន សុធារិទ្ធិ តារាសម្ដែង, កញ្ញា ជេស៊ីកា តារាសម្ដែង, លោកយន សុភ័ក្រ តារាសម្ដែង, កញ្ញា ម៉ា នីកា តារាសម្ដែង,លោក ខាត់ សម្បត្តិកិត្យា តារាសម្ដែង, លោក តេង វាសនា តារាសម្ដែង, កញ្ញាមុតា តារាសម្ដែង និងតារាកុះករជាច្រើនផ្សេងទៀត ។ ក្នុងនោះក៏បានតម្រូវឱ្យតារាសិល្បៈ និងភ្ញៀវកិត្តិយសសរសេរពីទុក្ខសោករបស់ខ្លួនទម្លាក់ចូលក្នុងប្រអប់ ដើម្បីយករឿងមិនសប្បាយចិត្តទៅបន្ធូរចោលក្នុងប្រអប់សំបុត្រ៕
ចែករំលែកព័តមាននេះ