ខេត្តកណ្តាល ៖ ជនប្រុសស្រី៤នាក់ មានមុខរបរកោសជប់ម៉ាស្សាស្រឿសរសៃ ត្រូវបាននគរបាលស្រុកមុខកំពូលចាប់វ៉ៃខ្នោះ ខណៈដែលបែកធ្លាយរឿងរួមគំនិតលួចលុយភ្ញៀវ ពេលចូលកោសជប់បានសម្រេចជាច្រើនលើក ។
ហេតុការណ៍នេះ បានកើតឡើងកាលពីថ្ងៃទី១៩ សីហា ម៉ោង២២ និង១០នាទី នៅចំណុចផ្ទះរបស់ឈ្មោះ
ផន វិសាល ហៅតុ ភូមិព្រែកតាបែន ឃុំព្រែកអញ្ចាញ ស្រុកមុខកំពូល និងត្រូវបានឃាត់ខ្លួននៅថ្ងៃទី៣០ ខែសីហា វេលាម៉ោង៨ និង៣០នាទីព្រឹក ។
ជនរងគ្រោះម្ចាស់ប្រាក់ឈ្មោះ សាន រិទ្ធី ភេទប្រុស អាយុ៣៥ឆ្នាំ រស់នៅភូមិក្រោម ឃុំព្រែកអញ្ចាញ ស្រុកមុខកំពូល មុខរបរលក់ដូរ ។ ចំណែកក្រុមជនរួមគំនិតគ្នាលួចលុយមាន១-ឈ្មោះ ទូច ស្រីណា ភេទស្រី អាយុ១៨ឆ្នាំ នៅភូមិគងជ័យ ឃុំគងជ័យ ស្រុកអូរាំងឪ ខេត្តកំពង់ចាម ស្នាក់នៅផ្ទះជួលភូមិព្រែកតាបែន ឃុំព្រែកអញ្ចាញ ស្រុកមុខកំពូលជាអ្នកម៉ាស្សា ។២-ឈ្មោះ ផេង ស្រីណុច ភេទស្រី អាយុ២៦ឆ្នាំ នៅភូមិអណ្ដូងតាសី ឃុំព្រៃធ្លាក់ ស្រុកស្វាយរៀង ខេត្តស្វាយរៀង ស្នាក់នៅផ្ទះជួលភូមិព្រែកតាបែន ឃុំព្រែកអញ្ចាញ ស្រុកមុខកំពូល ជាអ្នកម៉ាស្សាដែរ ។ ៣-ឈ្មោះ តុន មេត្តា ភេទប្រុស អាយុ២១ឆ្នាំ នៅភូមិព្រៃកប្បាស ឃុំព្រៃកប្បាស ស្រុកព្រៃកប្បាស ខេត្តតាកែវ ស្នាក់នៅជួលផ្ទះបើកកន្លែងម៉ាស្សា នៅភូមិព្រែកតាបែន ឃុំព្រែកអញ្ចាញ ស្រុកមុខកំពូល ជាថៅកែម៉ាស្សា ។ ៤-ឈ្មោះ ផន វិសាល ហៅតុ ភេទប្រុស អាយុ២៨ឆ្នាំ នៅភូមិត្រពាំងក្រូច ឃុំព្រៃកប្បាស ស្រុកព្រៃកប្បាស ខេត្តតាកែវ ស្នាក់នៅផ្ទះជួលបើកកន្លែងម៉ាស្សាភូមិព្រែកតាបែន ឃុំព្រែកអញ្ចាញ ស្រុកមុខកំពូល ជាថៅកែម៉ាស្សាដែរ ។
ប្រភពព័ត៌មានបានឱ្យដឹងថា កន្លងមកជនសង្ស័យឈ្មោះ ផន វិសាល ហៅតុ និងឈ្មោះ តុន មេត្តាបានមកជួលផ្ទះឈ្មោះ ផល្លី នៅភូមិព្រែកតាបែន ឃុំព្រែកអញ្ចាញ ស្រុកមុខកំពូល បើកកន្លែងម៉ាស្សា ដោយមានបុគ្គលិកស្រីចំនួន២នាក់គឺឈ្មោះ ផេង ស្រីណុច និងឈ្មោះ ទូច ស្រីណា ឯម្នាក់ទៀតឈ្មោះ ស្រី លក្ខ័ ជាប្រពន្ធរបស់ជនសង្ស័យឈ្មោះ ផន វិសាល ហៅតុ រស់នៅរកសុីកន្លែងនោះដែរ ។
តាមចម្លើយសារភាពពីជនសង្ស័យឈ្មោះ ផេង ស្រីណុច ថាខ្លួនបានទទួលការណែនាំពីឈ្មោះ ផន វិសាល ហៅតុ និងឈ្មោះ តុន មេត្តា ជាថៅកែឱ្យធ្វើតាមពួកគេត្រូវឱ្យភ្ញៀវដោះសំលៀកបំពាក់ចេញ ទុកតែខោលីអូ និងឱ្យស្លៀកកន្សែងពោះគោ ហើយឱ្យភ្ញៀវដេកផ្គាប់មុខ ដើម្បីធ្វើម៉ាស្សា ។ ចំណែកខោអាវភ្ញៀវ ត្រូវយកទៅទុកនៅលើទូផ្ដៅចុងជើងជិតបង្អួចលួចលាក់សម្ងាត់ ដែលជនសង្ស័យធ្វើសំរាប់តែលួចលុយរបស់ភ្ញៀវ ។
កន្លងមកផ្ទះម៉ាស្សានេះធ្លាប់ធ្វើសកម្មភាពលួចប្រាក់ភ្ញៀវចំនួន១០លើកមកហើយ ។ លុះដល់ថ្ងៃទី២៩ ខែសីហា វេលាម៉ោង២២និង១០នាទី ពេលឈ្មោះ ផន វិសាល ហៅតុ កំពុងអង្គុយក្នុងបន្ទប់ជាមួយប្រពន្ធក៏ឃើញភ្ញៀវប្រុសម្នាក់ ជិះម៉ូតូម៉ាកហ្សូមមុឺអុិច ចូលមកម៉ាស្សាដោយហៅស្ត្រីឈ្មោះ ទូច ស្រីណា អាយុ១៨ឆ្នាំ ឱ្យម៉ាស្សានៅជិតបន្ទប់ឈ្មោះ ផន វិសាល ហៅតុ ។
ឃើញដូចនេះឈ្មោះ ផន វិសាល និងឈ្មោះ តុន មេត្តាបានធ្វើសកម្មភាពលួចយកសោម៉ូតូជនរងគ្រោះ ដែលទុកក្នុងហោប៉ៅខោលើទូផ្ដៅតាមបង្អួចលួចលាក់ ដែលជនសង្ស័យបានធ្វើទុកសម្រាប់លួចនោះមកចាក់កែបម៉ូតូរបស់ភ្ញៀវដែលចូលម៉ាស្សា រួចលួចយកលុយចំនួន៨០០ដុល្លារ និងប្រាក់រៀលចំនួន២.៨០០.០០០រៀល ។ បន្ទាប់មកជនទាំងពីរនាក់បានយកសោម៉ូតូទៅទុកក្នុងហោប៉ៅខោភ្ញៀវនោះវិញ ។
មួយសន្ទុះក្រោយមកភ្ញៀវរូបនោះបានចេញពីបន្ទប់ម៉ាស្សា រួចជិះម៉ូតូទៅបាត់ ។ ដោយសារបាត់លុយក្រោមកែបម៉ូតូ នៅព្រឹកថ្ងៃទី៣០ ខែសីហា វេលាម៉ោង០៨និង៣០នាទី ភ្ញៀវរូបនោះបានមកប្តឹងសមត្ថកិច្ចប៉ុស្តិ៍ព្រែកអញ្ចាញ រួចចុះទៅដល់កន្លែងកើតហេតុ ទើបឈ្មោះ ផនវិសាល និងឈ្មោះ តុន មេត្តាបានយកប្រាក់ចំនួន៩០០ដុល្លារ និងប្រាក់រៀលចំនួន៣.០០០.០០០រៀល គឺជាប្រាក់ដែលលួចបានថ្មី និងប្រាក់ដែលលួចបានពីមុនសល់ពីការចាយវាយខ្លះៗមកប្រគល់ឱ្យសមត្ថកិច្ច ។
ក្រោយអន្តរាគមន៍ពីសមត្ថកិច្ចភ្ញៀវដែលត្រូវគេលួចលុយនេះក៏បានទទួលប្រាក់តាមចំនួនដែលបាត់បង់ រីឯប្រាក់នៅសល់សមត្ថកិច្ចត្រៀមផ្តល់ឱ្យម្ចាស់លុយដែលបាត់ពីមុននេះហើយ ។ នៅថ្ងៃដដែលវេលាម៉ោង៩ព្រឹក សមត្ថកិច្ចបាននាំខ្លួនជនសង្ស័យទាំង៤នាក់បញ្ជូនមកអធិការដ្ឋាននគរបាលស្រុកមុខកំពូល ដើម្បីបន្ដចាត់ការតាមនីតិវិធី ៕
ចែករំលែកព័តមាននេះ