ខេត្តព្រះវិហារ ៖ នៅថ្ងៃទី៣១ ខែសីហា ឆ្នាំ២០១៨នេះ នៅមន្ទីកសិកម្មរុក្ខាប្រមាញ់ និងនេសាទ ខេត្តព្រះវិហារ មានរៀបចំសិក្ខាសាលា ស្តីពីទស្សនៈទានបច្ចេកវិទ្យាប្លុកឆេន និងការអនុវត្តសាកល្បងប្លុករ៉ាយស៍ ជាមួយខ្សែសង្វាក់ ផលិតកម្មស្រូវសរីរាង្គ ដែលមានការចូលរួមពីមន្ទីរពាណិជ្ជកម្ម មន្ទីរប្រៃសណីយ៍ និងទូរគមនាគមន៍ អង្កការមិនមែន រាជរដ្ឋាភិបាលជាតិ អន្តរជាតិ ដែលកំពុងអនុវត្តគម្រោងកសិកម្ម វិស័យឯកជន ជាពិសេសតំណាងសហគមន៍កសិកម្មទាំង៤២ និងសហភាពសហគមន៍កសិកម្មក្នុងខេត្តព្រះវិហារផងដែរ។
នាឱកាសនោះលោក ពីជូ អាប្រាហាម នាយកកម្មវិធី នៃអង្គការ Ofarm បានលើកឡើងថា ប្រព័ន្ធបច្ចេកវិទ្យានេះ អាចឲ្យពិភពលោកក៏ដូចជាអ្នកបញ្ជាទិញតាមបណ្តាប្រទេសប៉ែកអឺរ៉ុប អាចតាមដាន និងស្គាល់ច្បាស់ពីប្រភពនាំចូលអង្ករ ឬស្រូវសរីរាង តាមរយៈស្មាតហ្វូនបានយ៉ាងងាយស្រួល។ លោកថា នៅពេលដែលអ្នកបញ្ជាទិញ ដឹងច្បាស់ពីអត្តសញ្ញាណនៃស្រូវសរីរាងរបស់កម្ពុជា ដែលជាស្រូវធម្មជាតិ និងមានសារៈសំខាន់ ចំពោះសុខភាពអ្នកបរិភោគ នោះការបញ្ជាទិញនឹងមានការកើនឡើងកាន់តែច្រើន រីឯអ្នកផលិតក៏ នឹងទទួលបានផលប្រយោជន៍កាន់តែច្រើនឡើង ពីការផលិតស្រូវសរីរាងនេះដែរ។
ជាមួយគ្នានេះលោក កាន់ គន្ធី តំណាងក្រុមហ៊ុន អេមរុ រាយស៍ បានលើកឡើងថា មូលហេតុដែលក្រុមហ៊ុន ចាប់យកបច្ចេកវិទ្យាថ្មី ប្លុកឆេននេះ ក្នុង គោលបំណង ដើម្បីបង្ហាញនូវផលិតផលស្រូវសរីរាងរបស់សហគមន៍កសិកម្មខេត្តព្រះវិហារ ដែលបានចុះ កិច្ចសន្យាជាមួយក្រុមហ៊ុន នៅលើប្រព័ន្ធព័ត៌មានវិទ្យាទំនើបលើទីផ្សារពិភពលោក ជាពិសេសនោះបានធ្វើ ឲ្យអ្នកបញ្ជាទិញស្គាល់នូវអត្តសញ្ញាណនៃស្រូវអង្គរ និងអ្នកផលិតទាំងគុណភាពស្តង់ដា និងតម្លៃបានច្បាស់លាស់ត្រឹមត្រូវ។
លោកបន្តថា គម្រោងប្លុករាយស៍ តាមរយៈបច្ចេកវិទ្យា ប្លុកឆេននេះ ចាប់ផ្តើមអនុវត្តសាកល្បងទៅលើកសិករ នៅក្នុងសហគមន៍កសិកម្មរស្មីលើកកម្ពស់ជីវភាពឋិតក្នុងឃុំរស្មី ស្រុករវៀង ខេត្តព្រះវិហារ ចំនួន៥០គ្រួសារ ជំហានដំបូង ដើម្បីធ្វើការវេចខ្ចប់ នូវផលិតផលស្រូវសរីរាងរបស់ពួកគាត់ ដោយមានបញ្ជាក់លេខសម្គាល់ផលិតផល និងឈ្មោះអ្នកផលិត ច្បាស់លាស់ លក់លើទីផ្សារតាមប្រព័ន្ធបច្ចេកវិទ្យា ប្លុកឆេននេះ។ លោកថា ប្រសិនបើការសាកល្បង អនុវត្តន៍បច្ចេកវិទ្យានេះបានជោគជ័យ ក្រុមហ៊ុននឹងបន្តអនុវត្តជាមួយសហគមន៍ជាង៣០សហគមន៍ ដែលបានចុះកិច្ចសន្យាជាមួយក្រុមហ៊ុន កន្លងទៅបន្តទៀត មិនថាតែស្រូវសរីរាងប៉ុណ្ណោះទេ ក្រុមហ៊ុន នឹងឈានទៅអនុវត្តលើផលិតផលដំឡូងមី បន្ថែមទៀត។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ មានប្រសាសន៍ថា សិក្ខាសាលានេះមានគោលបំណង ដើម្បីធ្វើបទបង្ហាញអំពីទស្សនៈទាន បច្ចេកវិទ្យាប្លុកឆេន និងការអនុវត្តសាកល្បងប្លុករ៉ាយស៍ ដើម្បីកត់ត្រាប្រតិបត្តិការរបស់ខ្សែសង្វាក់ផលិតកម្មផ្គត់ផ្គង់ស្រូវសរីរាង របស់កសិករ និងបង្កើនទំនាក់ទំនងសហប្រតិបត្តិការរួមគ្នារវាងភាគីពាក់ព័ន្ធ ជាពិសេសស្ថាប័នរាជរដ្ឋាភិបាល វិស័យឯកជន និងសង្គមស៊ីវិល ក្នុងការអនុវត្តគម្រោងគាំទ្រជីវភាពកសិករខ្នាតតូច ក្នុងការផលិតស្រូវសរីរាងប្រកបដោយនិរន្តរភាព នាពេលអនាគត៕
ចែករំលែកព័តមាននេះ