ខេត្តរតនគិរី ៖ បុរសម្នាក់បានបាត់ខ្លួន មិនដឹងទៅណា បន្ទាប់ពីមានជម្លោះពាក្យសម្តីជាមួយប្រពន្ធហើយនាំឆ្កែ២ក្បាលចូលព្រៃបាត់ និងក្រោយមកឃើញតែឆ្កែត្រឡប់មកផ្ទះវិញ បាត់តែបុរសនេះសូន្យឈឹង ។ បើគិតមកដល់ថ្ងៃទី៣០ ខែសីហា…
ខេត្តរតនគិរី ៖ បុរសម្នាក់បានបាត់ខ្លួន មិនដឹងទៅណា បន្ទាប់ពីមានជម្លោះពាក្យសម្តីជាមួយប្រពន្ធហើយនាំឆ្កែ២ក្បាលចូលព្រៃបាត់ និងក្រោយមកឃើញតែឆ្កែត្រឡប់មកផ្ទះវិញ បាត់តែបុរសនេះសូន្យឈឹង ។ បើគិតមកដល់ថ្ងៃទី៣០ ខែសីហា គឺមានរយៈពេល១០ថ្ងៃហើយ មិនឃើញបុរសនេះត្រឡប់មកផ្ទះវិញឡើយ ធ្វើឱ្យស្ត្រីជាប្រពន្ធនឹកប្តីដេកយំរាល់យប់ ។
បើតាមរបាយការណ៍របស់នគរបាលប៉ុស្តិ៍ និងស្រុក បានឱ្យដឹងថា បុរសដែលបាត់ខ្លួននេះឈ្មោះនី មុល អាយុ២៧ឆ្នាំ ជាកសិករ និងមានមុខរបរបន្ទាប់បន្សំ២ទៀតគឺ ដើររកដើមផ្កាអ័រគីដេ និងបណ្តើរឆ្កែប្រមាញ់សត្វព្រៃ មានប្រពន្ធ និងកូនប្រុសម្នាក់អាយុ៦ឆ្នាំ រស់នៅក្នុងភូមិស្រែពកធំ ឃុំសេរីមង្គល ស្រុកកូនមុំ។
សមត្ថកិច្ចបានឲ្យដឹងថា បើតាមការរៀបរាប់របស់ប្រពន្ធប្រាប់សមត្ថកិច្ចថា ប្តីរបស់នាងបានចេញពីផ្ទះកាលពីថ្ងៃទី២០ ខែសីហា វេលាម៉ោងប្រហែល៩ព្រឹក ដោយនាំឆ្កែដែលធ្លាប់បណ្តើរ ប្រមាញ់សត្វចំនួន២ក្បាលទៅជាមួយផង ។
ក្រោយពីទៅបាត់១ថ្ងៃ១យប់ ក៏ឃើញឆ្កែទាំង២ក្បាលត្រឡប់មកផ្ទះវិញ ប៉ុន្តែអត់ឃើញប្តីនាងមកវិញទេ ធ្វើឱ្យបងប្អូននិងសាច់ញាតិមានការឆោឡោទៅប្តឹងនគរបាលប៉ុស្តិ៍ និងស្រុក ឱ្យជួយរុករកនៅតំបន់ព្រៃដែលប្តីនាងធ្លាប់បណ្តើរឆ្កែរកសត្វព្រៃ នៅចម្ងាយពីផ្ទះប្រហែលជាង១គីឡូម៉ែត្រ ។
ក្នុងការរុករកនេះ មានទាំងអ្នកភូមិនិងនគរបាលជាច្រើននាក់ ដើររកតាំងពីថ្ងៃទី២៣រហូតដល់ថ្ងៃទី២៩ ខែសីហា គ្រប់ច្រកល្ហកទាំងអស់នៅតែមិនឃើញ ហើយពេលនេះសាច់ញាតិ និងសមត្ថកិច្ចអស់លទ្ធភាពរកក្នុងព្រៃនោះហើយ ។
ស្ត្រីជាប្រពន្ធប្រាប់សមត្ថកិច្ចថា មុនពេលប្តីចេញពីផ្ទះ គឺបានទាស់ពាក្យសម្តីជាមួយនាងរឿងកូនតូចដើរលេងផ្ទះគេ ហើយប្តីចោទនាងថាអត់មើលកូនក៏កើតជាជម្លោះទៅ ។ ស្ត្រីជាប្រពន្ធ ក៏ដូចជានគរបាលស្រុកកូនមុំ សំណូមពរដល់សារព័ត៌មានកោះសន្តិភាព សូមចុះផ្សាយឱ្យសាធារណជននិងបុរសជាប្តីបានដឹង ត្រឡប់មកផ្ទះវិញផង ៕
ចែករំលែកព័តមាននេះ