ខេត្តក្រចេះ៖ កុងត្រូលជជុះមួយកន្លែងស្ថិតនៅចំណុចនៅក្បាលស្ពានពាមទេរ ក្នុងសង្កាត់រការកណ្តាល ក្រុងក្រចេះ ត្រូវបានអាជ្ញាធរក្រុងក្រចេះ ចុះមានវិធានការបោស សំអាត ក្រោយពីបានរកឃើញថា ទីតាំងកុងត្រូលជជុះដែលបានកើតមានជាច្រើនឆ្នាំមកហើយ នោះ…
ខេត្តក្រចេះ៖ កុងត្រូលជជុះមួយកន្លែងស្ថិតនៅចំណុចនៅក្បាលស្ពានពាមទេរ ក្នុងសង្កាត់រការកណ្តាល ក្រុងក្រចេះ ត្រូវបានអាជ្ញាធរក្រុងក្រចេះ ចុះមានវិធានការបោស សំអាត ក្រោយពីបានរកឃើញថា ទីតាំងកុងត្រូលជជុះដែលបានកើតមានជាច្រើនឆ្នាំមកហើយ នោះ បានបង្កសកម្មភាពប៉ះពាល់ដល់សណ្តាប់ធ្នាប់ក្នុងទីប្រជុំជនយ៉ាងធ្ងន់ធ្ងរ។
ក្រុមអាជ្ញាធរបាននិយាយថា ការចុះបង្ក្រាបទីតាំងកុងត្រូលជជុះអនាធិបតេយ្យដែលភាគច្រើន ជាបណ្តុំរបស់អ្នកកាសែតពីសំណាក់អាជ្ញាធរក្រុងក្រចេះដឹកនាំដោយលោក យិន វណ្ណៈ អភិ បាលក្រុងក្រចេះ ដែលបានធ្វើឡើងនៅថ្ងៃទី៣០ សីហា គឺសមត្ថកិច្ចពុំបានឃាត់ខ្លួនមនុស្សណាម្នាក់ដែលកន្លងមកធ្លាប់បានតាំងខ្លួនថាជាសមត្ថកិច្ច ហើយបង្កើតកុងត្រូលជជុះអនាធិបតេយ្យនេះ ដើម្បីនាំមកធ្វើការអប់រំ និងឱ្យធ្វើកិច្ចសន្យាបញ្ឈប់សកម្មភាពខុសច្បាបមួយនេះ តែមនុស្សមួយក្រុមនោះបានដឹងខ្លួនមុន ហើយគេចខ្លួនបាត់មុនការចុះទៅដល់របស់អាជ្ញាធរ។
កុងត្រូលជជុះមួយកន្លែងនេះ ត្រូវបានគេនិយាយថាបានកើតមានជាច្រើនឆ្នាំមកហើយ។ ដោយក្នុងនោះមានក្រុមសមត្ថកិច្ច ភាគច្រើនមានអ្នកកាសែត បានមកឈរជើងបោះទីតាំង នៅក្បាលស្ពានលើកំណាត់ផ្លូវជាតិ៧៣ ដើម្បីចាំកាក់យកលុយពីរ៉ឺម៉កដឹកឈើ ក៏ដូចជា ម៉ូតូដឹកឈើ និងរថយន្តដឹកឈើជាដើម។
ប្រភពព័ត៌មានពីពលរដ្ឋដែលមានរបរដឹកជញ្ជូនឈើបាននិយាយថា សព្វថ្ងៃបណ្តុំកុងត្រូលជជុះរបស់សមត្ថកិច្ច ក្នុងនោះភាគច្រើនជាអ្នកកាន់កាតកាសែត បាននឹងកំពុងតែបោះទីតាំងយ៉ាងច្រើនស្អេកស្កះពាសពេញផ្លូវជាតិយ៉ាងអនាធិបតេយ្យ។ ការកើតមានកុងត្រូលជជុះខុសច្បាប់ទាំងនេះបានកើតមានឡើងស្របពេលដែលស្ថានភាពដឹកជញ្ជូនឈើរបស់ពលរដ្ឋ និងឈ្មួញមួយចំនួនក៏មានច្រើនសន្ឋឹកសន្ធាប់ច្រើនផងដែរ។
ប្រភពដដែលសុំមិនបញ្ចេញឈ្មោះនេះបានអះអាងទៀតថា កុងត្រូលជជុះទាំងនោះ តែងតែធ្វើសកម្មភាពកាក់រ៉ឺម៉ក ឬរថយន្តដើម្បីត្រួតពិនិត្យខុសច្បាប់ ក្រោយសង្ស័យថា រ៉ឺម៉ក ឬរថយន្តទាំងនោះមានលួចដឹកឈើតែមិនបង់លុយឲ្យទៅពួកគេ។ មិនត្រឹមតែប៉ុណ្ណោះ ពួកក្រុមទាំងនោះ បានតម្រៀបក្បាលឡានរបស់ពួកគេចេញមកផ្លូវជាតិ តែងតែបង្កសកម្មភាព ប្រដេញដើម្បីកាក់រថយន្ត ឬរ៉ឺម៉កគ្រប់ប្រភេទយ៉ាងអនាធិបតេយ្យ។
ជាមួយនិងសកម្មភាពរបស់លោកយិន វណ្ណៈ អភិបាលក្រុងលើការមានវិធានការបោស សំអាតកុងត្រូលជជុះដែលជាទីតាំងដុះស្លែមួយកន្លែងនេះ គឺទទួលបានការសាទរជាខ្លាំង ពីមជ្ឈដ្ឋានសាធារណជននានាក្នុងខេត្ត ក៏ដូចជាក្រៅខេត្ត ដែលមិនពេញចិត្តនិងការបង្កើត ទីតាំងកុងត្រូលជជុះយ៉ាងអនាធិបតេយ្យមួយនេះ។ ក៏ព្រោះតែរយៈពេលកន្លមកប៉ុស្តិ៍ជជុះនេះ មិនធ្លាប់មានការ ចុះបង្ក្រាបពីអាជ្ញាធរណាមួយណានោះទេ។
ពលរដ្ឋនិងមជ្ឈដ្ឋាននានាបានអំពាវនាវឲ្យអាជ្ញាធរនៅមូលដ្ឋានផ្សេងទៀត គួរមាន វិធានការក្តៅបែបនេះជាមួយនឹងក្រុមកុងត្រូលនៅតំបន់គោលដៅផ្សេងទៀត ដោយពួកគាត់ លើកឡើងថា កុងត្រូលខុសច្បាប់ទាំងនេះ តែងតែបង្កភាពអសន្តិសុខធ្វើឲ្យពួកគាត់ក្នុង មូល ដ្ឋានរស់នៅដោយមានការព្រួយបារម្ភ។
ជុំវិញការចុបង្ក្រាបទីតាំងកុងត្រូលជជុះនៅក្បាលស្ពាននេះ អភិបាលក្រុងក្រចេះលោក យិន វណ្ណៈ បានថ្លែងប្រាប់ឲ្យដឹងថា សកម្មភាពនេះគឺជាការចុះរៀបចំសណ្តាប់ធ្នាប់ក្នុងមូលដ្ឋានរបស់លោក ដោយលោកបានអះអាងថា សកម្មភាពនេះក៏នឹងបន្តធ្វើឡើងជាប់ជាប្រចាំផងដែរ។
លោកអភិបាលក្រុងបានលើកឡើងថា ការបង្កើតកុងត្រូលត្រួតពិនិត្យដោយមិនមានគណៈបញ្ជាការឯកភាពខេត្ត ស្រុក គឺត្រូវចាត់ទុកថាជាកុងត្រូលត្រួតពិនិត្យខុសច្បាប់ ហើយអាជ្ញាធរនឹងមានវិធានការ ដើម្បីលើកកំពស់សន្តិសុខសណ្តាប់ធ្នាប់ដល់ពលរដ្ឋក្នុងមូលដ្ឋាន៕
ចែករំលែកព័តមាននេះ