រាជធានីភ្នំពេញ ៖ គិតមកដល់ពេលនេះ ផែនការតបណ្តាញទឹកស្អាតសម្រាប់ផ្ទះជួលរបស់កម្មករកម្មការិនីសម្រេចបានប្រមាណ១២២.០៧៩១បន្ទប់ហើយ ។ នេះបើតាមការអះអាងពីមន្ត្រីរដ្ឋាករទឹកស្វយ័តក្រុងភ្នំពេញ ។ លោកស្រី ងិន ចន្ទ្រា…
រាជធានីភ្នំពេញ ៖ គិតមកដល់ពេលនេះ ផែនការតបណ្តាញទឹកស្អាតសម្រាប់ផ្ទះជួលរបស់កម្មករកម្មការិនីសម្រេចបានប្រមាណ១២២.០៧៩១បន្ទប់ហើយ ។ នេះបើតាមការអះអាងពីមន្ត្រីរដ្ឋាករទឹកស្វយ័តក្រុងភ្នំពេញ ។
លោកស្រី ងិន ចន្ទ្រា អគ្គនាយករងរដ្ឋាករទឹកស្វយ័តក្រុងភ្នំពេញ បានថ្លែងថា បន្ទប់ស្នាក់នៅរបស់កម្មករកម្មការិនីក្នុងរាជធានីភ្នំពេញភាគច្រើនលើសលប់ទទួលបានការតបណ្តាញទឹកស្អាតសម្រាប់ប្រើប្រាស់ និងបំពេញសេចក្តីត្រូវការរបស់ពួកគាត់ បើទោះបីជាតំបន់មួយចំនួនសម្ពាធទឹកនៅទាបក៏ដោយ ប៉ុន្តែជារួមពួកគាត់អាចប្រើប្រាស់បាន ។ លោកស្រីបានបញ្ជាក់ថា ៖« ចំពោះតម្លៃទឹក គឺយើងកំណត់តម្លៃដដែលសម្រាប់ម្ចាស់ផ្ទះជួលតម្លៃ៧០០រៀលក្នុង១ម៉ែត្រគីប ហើយគាត់លក់បន្តឲ្យកម្មករក្នុងតម្លៃ៨០០រៀលក្នុង១ម៉ែត្រគីប »។
លោកស្រីអះអាងថា ៖« តាមតម្លៃទឹកដែលយើងបានកំណត់នេះ អាចធ្វើឲ្យបងប្អូនកម្មករ កម្មការិនី កាត់បន្ថយបាននូវការចំណាយច្រើនបើប្រៀបធៀបពេលមុន »។ លោកស្រីអគ្គនាយករង ក៏បានឲ្យដឹងទៀតថា កម្មករ-កម្មការិនី បានបង្ហាញនូវក្តីសប្បាយរីករាយយ៉ាងខ្លាំងចំពោះគោលនយោបាយរបស់រាជរដ្ឋាភិបាលក្នុងការបញ្ចុះតម្លៃទឹក សម្រាប់ពួកគាត់ ។ លោកស្រីថា ៖« តាមរយៈនៃការបញ្ចុះតម្លៃទឹកនោះ ធ្វើឲ្យពួកគាត់មានលទ្ធភាពសល់ លុយដើម្បីផ្ញើជូនឪពុកម្តាយឬក្រុមគ្រួសារអាណាព្យាបាលដែលស្ថិតក្នុងបន្ទុក »។
បន្ថែមលើនេះ លោកស្រីបញ្ជាក់ថា ៖« តម្លៃទឹកនេះ អាចនឹងចុះបន្តទៀតស្របតាមគោលនយោបាយរបស់រាជរដ្ឋាភិបាល សំខាន់សម្តេចតេជោ ហ៊ុន សែន ដែលបាននិងកំពុងយកចិត្តទុកដាក់ចំពោះសុខទុក្ខ និងជីវភាពរបស់បងប្អូនកម្មករកម្មការិនី ។ ជាក់ស្តែងថ្មីៗនេះ អគ្គនាយករដ្ឋាករទឹកស្វយ័តក្រុងភ្នំពេញ បានអញ្ជើញមន្ត្រីជំនាញពាក់ព័ន្ធមកពិភាក្សា ដើម្បីរិះរកវិធានការបញ្ចុះតម្លៃទឹកស្អាតបន្តទៀត »។
លោកស្រីក៏បានអំពាវនាវផងដែរដល់បងប្អូនប្រជាពលរដ្ឋ សូមឲ្យមានការសន្សំសំចៃក្នុង ការប្រើប្រាស់ទឹកស្អាតនេះ ព្រោះម្យ៉ាងដើម្បីកាត់បន្ថយការចំណាយផ្ទាល់ខ្លួន និងក្រុមគ្រួសារ ហើយម្យ៉ាងទៀត ដើម្បីចែករំលែកទឹកជូនដល់បងប្អូនប្រជាពលរដ្ឋមួយចំនួនទៀតដែលកំពុងរស់នៅក្នុងតំបន់ដែលមានសម្ពាធទឹកទាប ។
គួររំឭកថា កន្លងមក លោក ស៊ីម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញក៏ធ្លាប់បានអះអាងថា សព្វថ្ងៃការផ្គត់ផ្គង់ទឹកស្អាតនៅរាជធានីភ្នំពេញ មិនទាន់បានគ្រប់គ្រាន់នៅឡើយទេ ព្រោះរដ្ឋាករទឹកស្វយ័តក្រុងភ្នំពេញមានលទ្ធភាពផលិតទឹកបានត្រឹមតែ៥៦ម៉ឺនម៉ែត្រគីបប៉ុណ្ណោះក្នុង១ថ្ងៃ ក៏ប៉ុន្ដែសេចក្ដីត្រូវការទឹកស្អាតប្រើប្រាស់រហូតដល់ប្រមាណ៦០ម៉ឺនគីប ក្នុង១ថ្ងៃ ជាហេតុធ្វើឲ្យខ្វះខាតទឹកប្រើប្រាស់នៅជាយក្រុង ។
លោកបញ្ជាក់ថា ៖« កាលណានៅជាយក្រុងប្រើប្រាស់ទឹកច្រើន បានធ្វើឲ្យសម្ពាធទឹកនៅកណ្ដាលក្រុងភ្នំពេញមានការថយចុះមួយកម្រិត ដោយសាររោងចក្រផលិតទឹកស្អាតនៅរាជធានីភ្នំពេញមានតែ៤កន្លែងប៉ុណ្ណោះ»។ ទោះយ៉ាងនេះក្ដី លោកថា ៖« រដ្ឋាករទឹកស្វយ័តក្រុងភ្នំពេញ មានគម្រោងកសាងរោងចក្រផលិតទឹកស្អាតធំៗបន្ថែមទៀត ដើម្បីឆ្លើយតបទាន់តម្រូវការពលរដ្ឋប្រើនៅរាជធានីភ្នំពេញផងដែរ »៕
ចែករំលែកព័តមាននេះ