រាជធានីភ្នំពេញ ៖ លោកនុត ពុធដារ៉ា អភិបាលខណ្ឌដង្កោបានដឹកនាំមន្ត្រីក្រោមឱវាទធ្វើពិធីបើកការដ្ឋានស្ថាបនាផ្លូវបេតុង០១ខ្សែ ព្រមទាំងដាក់លូបង្ហូរទឹក១ខ្សែទៀតផងដែរ ដើម្បីបម្រើនិងសម្រួលដល់ការរស់នៅប្រចាំថ្ងៃជូនប្រជាពលរដ្ឋនៅក្នុងមូលដ្ឋាន ។ ពិធីនោះបានប្រព្រឹត្តទៅកាលពីវេលាព្រឹកថ្ងៃទី៣១ ខែសីហា ឆ្នាំ២០១៨ នៅក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
លោក នុត ពុធដារ៉ា អភិបាលខណ្ឌដង្កោបានថ្លែងថា ផ្លូវបេតុង០១ខ្សែខាងលើនោះមាន ប្រវែង១៨៦ម៉ែត្រ ទទឹង៨ម៉ែត្រ ចំណែកលូសម្រាប់បង្ហូររំដោះទឹក០១ខ្សែប្រវែង២៨០ម៉ែត្រ មុខកាត់០,៦ម៉ែត្រ ដែលការស្ថាបនានេះ ដើម្បីបម្រើ និងសម្រួលដល់ការរស់នៅជូនបងប្អូនប្រជាពលរដ្ឋ ស្ថិតនៅក្នុងភូមិសំបួរ សង្កាត់ដង្កោ ។ មិនតែប៉ុណ្ណោះដើម្បីអភិវឌ្ឍន៍មូលដ្ឋានខណ្ឌដង្កោទាំងមូលឲ្យមានការរីកចម្រើនស្របតាមកំណើនសេដ្ឋកិច្ចជាតិ និងការអភិវឌ្ឍន៍រីកចម្រើនរបស់ប្រទេសជាតិក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
នៅក្នុងឱកាសនោះលោកអភិបាលខណ្ឌបានផ្តាំផ្ញើការសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធិបណ្ឌិតជូនដល់បងប្អូនប្រជាពលរដ្ឋទាំងអស់ព្រមទាំងធ្វើការថ្លែងអំណរគុណដល់បងប្អូនប្រជាពលរដ្ឋដែលបានបោះឆ្នោតគាំទ្រគណបក្សប្រជាជនកម្ពុជាឲ្យទទួលបានជ័យជម្នះភ្លូកទឹកភ្លូកដីក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ដើម្បីបន្តជូនសម្តេចតេជោ ហ៊ុន សែន ធ្វើជានាយករដ្ឋមន្ត្រីបន្តថែរក្សាសុខសន្តិភាព និងអភិវឌ្ឍន៍ប្រទេសជាតិឲ្យបានរីកចម្រើនបន្ថែមទៀត ។
លោកអភិបាលបានប្តេជ្ញាអនុវត្តដោះស្រាយបញ្ហានានាដែលបានសន្យាជាមួយប្រជាពលរដ្ឋ មុនបោះឆ្នោតឲ្យបានជោគជ័យ ហើយផ្លូវបេតុងថ្មី និងប្រព័ន្ធលូរំដោះទឹកដែលបើកការដ្ឋានស្ថាបនានៅពេលនេះ គឺដើម្បីឆ្លើយតបនឹងតម្រូវការរបស់បងប្អូនប្រជាពលរដ្ឋក្នុងភូមិសំបួរ ព្រមទាំងជួយសម្រួលដល់ការធ្វើដំណើរ បញ្ជៀសការលិចលង់នៅរដូវវស្សា និងបង្កើនសោភណ្ឌភាព នៃការរស់នៅផងដែរ ។ ជាមួយគ្នា លោក នុត ពុធដារ៉ា ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ចូលរួមសហការក្នុងការស្ថាបនាឲ្យបានឆាប់រួចរាល់ និងចូលរួមថែរក្សាដើម្បីប្រើប្រាស់បានយូរអង្វែង ។
បងប្អូនប្រជាពលរដ្ឋក្នុងភូមិសំបួរបានធ្វើការថ្លែងអំណរគុណយ៉ាងជ្រាលជ្រៅចំពោះអាជ្ញាធរគ្រប់លំដាប់ថ្នាក់ដែលបានគិតគូរដល់ការលំបាករបស់ពួកគាត់ និងជួយសម្រួលដល់ការរស់នៅប្រចាំថ្ងៃផងដែរ ៕
ចែករំលែកព័តមាននេះ