ខេត្តកោះកុង ៖ ប្រជាជន មន្ត្រីរាជការរាប់ពាន់គ្រួសារនៅខេត្តកោះកុង កំពុងព្រួយបារម្ភដោយសារលំនៅឋានរបស់ពួកគាត់ត្រូវបានដាក់ចូលក្នុងតំបន់ការពារដោយអនុក្រឹត្យ និងលិខិតស.ជ.ណ របស់អាជ្ញាធរខេត្តបានគ្របដណ្តប់យកអស់ហើយជាសម្បត្តិរដ្ឋ ។
ផ្ទៃដីចំនួន១៤៤.២៧៥ហិកតា ត្រូវបានបង្កើតទៅជាដែនជម្រកសត្វព្រៃតាតៃ តាមអនុក្រិត្យលេខ៨០ អនក្រ.បក ចុះថ្ងៃទី៩ ឧសភាឆ្នាំ២០១៦ បានគ្របដណ្តប់និងប៉ះពាល់ទៅលើលំនៅឋាន ដីស្រែចំការ សាលារៀន អគាររដ្ឋបាលស្ថាប័នរដ្ឋ ផ្លូវថ្នល់ ជាពិសេសគឺព្រះរាជដំណាក់ ដែលមានចំនួនសរុបរាប់រយទីតាំងនិងរាប់ពាន់ខ្នង ស្ថិតនៅក្នុងក្រុងស្រុកចំនួន៦គឺស្រុកស្រែអំបិល ស្រុកបុទុមសាគរ ស្រុកគីរីសាគរ ស្រុកថ្មបាំង ស្រុកមណ្ឌលសីមានិង ក្រុងខេមរភូមិន្ទ មួយចំហៀងក្រុងតែម្តង ។
ដោយវិសាលភាពនៃអនុក្រិត្យនេះ ចរាចរលើវិស័យអចលនៈទ្រព្យនិងការអភិវឌ្យន៍ត្រូវបានជាប់គាំងស្ញេញ ធ្វើឱ្យកម្រិតជីវភាពរបស់ប្រជាពលរដ្ឋមានការធ្លាក់ចុះ និងគម្រោងអភិវឌ្ឍន៍របស់អាជ្ញាធរមួយចំនួនក៏ត្រូវរាំងស្ទះដែរ នៅក្នុងអំឡុងពេល២ឆ្នាំចុងក្រោយនេះ ។
សូម្បីតែការផ្តល់កម្មសិទ្ធិលំនៅឋានជូនប្រជាពលរដ្ឋកំពុងរស់នៅយូរអង្វែងតាមលក្ខណៈជាប្រព័ន្ធស្របតាមគោលការរាជរដ្ឋាភិបាលក៏ត្រូវរាំងស្ទះ ។ ជាក់ស្តែងគ្រប់មជ្ឈដ្ឋានដែលកំពុងរស់នៅក្នុងក្រុងខេមរភូមិន្ទ កំពុងជ្រួល និយាយលែងចេញតែម្តង ។
លោក នាម យុង ចៅសង្កាត់ស្មាច់មានជ័យ បានបញ្ជាក់ថា ពលរដ្ឋចំនួន៣ភូមិក្នុងសង្កាត់របស់លោកគឺភូមិបឹងឃុនឆាង ភូមិស្មាច់មានជ័យ និងភូមិ១ ដែលមានចំនួនប្រជាពលរដ្ឋសរុបជាង៥០០គ្រួសារ ត្រូវបានអនុក្រិត្យនេះគ្របដណ្តប់ជិតឈឹងនិយាយលែងចេញ ។
ពលរដ្ឋជាច្រើនបានត្អូញត្អែរថា រឿងចាស់នៅក្តៅគគុកនៅឡើយ ស្រាប់តែថ្មីៗនេះលោកស្រី មិថុនា ភូថង អភិបាលខេត្តកោះកុងបានចេញសេចក្តីជូនដំណឹងថ្មីមួយទៀត ស្តីពីការដកហូតប័ណ្ណសម្គាល់សិទ្ធិកាន់កាប់ ប្រើប្រាស់ដីធ្លី និងការចូលទន្ទ្រានកាន់កាប់ដីព្រៃក្នុងតំបន់ដែនជម្រកសត្វព្រៃពាមក្រសោបថែមទៀត ។
ពលរដ្ឋជាច្រើនបានលើកឡើងថា លិខិតលេខ១៨៥/១៨ សជណ ចុះថ្ងៃទី២០ ខែសីហាឆ្នាំ២០១៨ របស់លោកស្រីអភិបាលខេត្តនេះ ហាក់បីដូចមានទម្រង់គំរាមកំហែងខ្លាំងណាស់មកលើប្រជាពលរដ្ឋខ្លួនឯង ព្រោះនៅក្នុងខ្លឹមសារលិខិតបានប្រើពាក្យដកហូត និងកម្ទេច ។
មិនតែប៉ុណ្ណោះលិខិតនេះក៏មិនបានកំណត់ចំនួនផ្ទៃដីនិងព្រំប្រទល់ឱ្យបានច្បាស់លាស់ដែរ ហេតុនេះអ្នករស់នៅក្នុងក្រុងច្រើនណាស់ ដែលកំពុងប្រកបរបរកសិកម្ម កសិឧស្សាហកម្មនិងអាស្រ័យផលច្រើនឆ្នាំកន្លងមក ស្ថិតនៅក្បែរៗតំបន់ដែនជម្រកសត្វព្រៃពាមក្រសោបនេះ ព្រួយបារម្ភយ៉ាងខ្លាំងលែងធ្វើការអ្វីកើត ។
លោក ឈេង សុវណ្ណដា អភិបាលក្រុងខេមរៈភូមិន្ទបានប្រាប់កោះសន្តិភាពតាមទូរស័ព្ទនារសៀលថ្ងៃទី២៩ សីហានេះថា លោកពុំបានដឹងច្បាស់អំពីផលប៉ះពាល់របស់ប្រជាពលរដ្ឋក្រោមឥទ្ធិពលអនុក្រិត្យលេខ៨០និងលិខិត ស ជ ណ របស់អាជ្ញាធរខេត្តយ៉ាងណានោះទេ ។ លោកអភិបាលក្រុងបញ្ជាក់ទៀតថាលោកបានស្នើសុំទិន្ន័យអំពីផលប៉ះពាល់នេះទៅមន្ទីរបរិស្ថានខេត្តជាច្រើនលើកហើយ ប៉ុន្តែខាងបរិស្ថានមិនឱ្យ ។
កោះសន្តិភាពបានព្យាយាមទាក់ទងទូរស័ព្ទទៅលោក ម៉ម ផល្លា ប្រធានមន្ទីរបរិស្ថានខេត្តជាច្រើនលើកដែរ តែទូរស័ព្ទមិនអាចទាក់ទងបាន ។
ទាំងប្រជាពលរដ្ឋនិងមន្ត្រីរាជការមេឃុំចៅសង្កាត់ជាច្រើន ក្នុងខេត្តកោះកុងបានសំណូមពរថា សុំឱ្យប្រមុខរាជរដ្ឋាភិបាល និងក្រសួងបរិស្ថាន មេត្តាដាក់ការពិចារណាជាថ្មីទៅលើយាមការក្នុងផែនទីមួយចំនួន ដែលបានកំណត់យកភូមិដ្ឋាន អគាររដ្ឋបាលរបស់ស្ថាប័នរដ្ឋ សាលារៀន ផ្លូវថ្នល់ ឆ្នេរសមុទ្រ វត្តអារាម ព្រះរាជដំណាក់ ជាពិសេសសូម្បីតែផ្ទះលោក ប៊ុន លើត អតីតអភិបាលខេត្ត និងផ្ទះសម្បែងរាប់ពាន់ខ្នងទៀត គឺត្រូវបានអនុក្រិត្យទើបតែបង្កើតនៅឆ្នាំ២០១៦នេះគ្របដណ្តប់ជិតឈឹងទាំងអស់ ។ ដល់អុីចឹងទៅគ្មានអ្នកលក់ គ្មានអ្នកទិញ គ្មានកេរ គ្មានហ៊ានសាងសង់អ្វីទាំងអស់ ព្រោះខុសច្បាប់ ៕
ចែករំលែកព័តមាននេះ