រាជធានីភ្នំពេញ ៖ យុវជនម្នាក់ទំនងជារូបគេបានប្រើប្រាស់ថ្នាំញៀនច្រើនហួសកម្រិតពេកបានធ្វើឱ្យរូបគេមានអាការបែកថ្នាំយ៉ាងខ្លាំង ដោយបានប្រើប្រាស់ដុំថ្មដើរគប់ និងវាយរថយន្តរបស់អ្នកដំណើរតាមផ្លូវសាធារណៈបង្កឱ្យមានការភ្ញាក់ផ្អើលយ៉ាងខ្លាំងទៅដល់កម្លាំងមានសមត្ថកិច្ចចុះមកដល់ និងចាប់ចងបញ្ជូនយកទៅកាន់មន្ទីរសង្គមកិច្ច ។
ហេតុការណ៍នេះកើតឡើងនៅវេលាម៉ោង៩ព្រឹក ថ្ងៃទី៣១ ខែសីហានេះ នៅចំណុចចំណតរថយន្តក្រុងខាងមុខក្រសួងសង្គមកិច្ចអតីតយុទ្ធជន ផ្លូវព្រះមុនីវង្ស ក្នុងសង្កាត់បឹងត្របែក ខណ្ឌចំការមន ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុគេបានឃើញយុវជនម្នាក់ដែលមានអាយុប្រមាណជាជាង២០ឆ្នាំ ដោយមានសំលៀកបំពាក់ស្អាតបាត ត្រឹមត្រូវដើរចុះឡើងៗនៅតាមបណ្តោយផ្លូវ ព្រះមុនីវង្សនៅចំណុចខាងលើនេះ ជាធម្មតាដូចគេដូចឯង ។ លុះបន្តិចក្រោយមក ទំនងជារូបគេបានប្រើប្រាស់ថ្នាំញៀនច្រើនហួសកម្រិតនោះក៏ស្រាប់តែរូបគេដើរបណ្តើរ និងធ្វើកាយវិការច្រង៉េងច្រង៉ាងបណ្តើរ មិនតែប៉ុណ្ណោះក៏បានយកដុំថ្ម មួយដុំទៅដើរវាយទៅលើរថយន្ត និងអ្នកតំណើរតាមផ្លូវ ធ្វើឲ្យគេមានការភិតភ័យគ្រប់ៗគ្នា និងមានការភ្ញាក់ផ្អើលកើតឡើងតែម្តង ។
តាមប្រភពដដែលបានប្រាប់បន្តទៀតថា ក្រោយពីយុវជនម្នាក់ខាងលើមានអាការបែកថ្នាំ ហើយយកដុំថ្ម ដើរវាយគេឯងតាមផ្លូវនោះកម្លាំងមានសមត្ថកិច្ចក៏បានចុះមកដល់កន្លែងកើតហេតុចាប់យកទៅដាក់លើចិញ្ចើមផ្លូវ និងយកខ្សែចាប់ចងរូបគេទុកមួយកន្លែងផងដែរ ។ ក្នុងហេតុការណ៍យុវជនម្នាក់ខាងលើបែកថ្នាំ និងយកដុំថ្មដេញគប់ និងវាយទៅលើរថយន្តរបស់អ្នកដំណើរតាមផ្លូវនេះដែរ គឺមិនបានបង្កឲ្យមានរថយន្តរបស់អ្នកដំណើរណាម្នាក់រងការខូចខាត ឬបង្កឲ្យមានអ្នកណាម្នាក់ រងគ្រោះថ្នាក់ឡើយ ។
ក្រោយពីកម្លាំងមានសមត្ថកិច្ចបានធ្វើការចាប់ចងទៅលើយុវជនបែកថ្នាំម្នាក់ខាងលើទុកមួយកន្លែង រួចហើយក៏បានធ្វើការទាក់ទងទៅកាន់មន្ទីរសង្គមកិច្ចរាជធានីភ្នំពេញឲ្យមកទទួលយកទៅរក្សាទុក ដើម្បីធ្វើការព្យាបាល និងបន្សាបថ្នាំញៀនបាត់ទៅ ដើម្បីកុំឲ្យនៅបន្តដើរអុកឡុកដល់គេឯងបែបនេះតទៀត ៕
ចែករំលែកព័តមាននេះ