រាជធានីភ្នំពេញ ៖ ប្រតិភូកីឡាតេក្វាន់ដូស្ទីល ITF កម្ពុជាបានវិលត្រឡប់មកដល់មាតុប្រទេសវិញហើយកាលពីថ្ងៃទី២៩ សីហាកន្លងមកនេះ ដោយបាននាំមកជាមួយនូវមេដាយចំនួន២គ្រឿង(ប្រាក់១គ្រឿង និងសំរឹទ្ធ១គ្រឿង) ពីព្រឹត្តិការណ៍ប្រកួតជ្រើសរើសជើងឯកពិភពលោកនៅប្រទេសបេឡារុសមកជូនជាតិ។
លោក កែវ រ៉េមី ប្រធានសហព័ន្ធកីឡាតេក្វាន់ដូអាស៊ីអាគ្នេយ៍ និងជាប្រធានសហព័ន្ធកីឡាតេក្វាន់ដូកម្ពុជាបានឱ្យដឹងថា សម្រាប់ការប្រកួតនេះមានជាង៦០ប្រទេសនៅលើពិភពលោកចូលរួម ។ ចំពោះកម្ពុជាវិញ នេះគឺជាលើកទី២ហើយដែលយើងបានបញ្ជូនអត្តពលិករបស់ខ្លួនទៅចូលរួមប្រកួតក្នុងព្រឹត្តិការណ៍ដ៏ធំបែបនេះ ។
លើកនេះអត្តពលិកកម្ពុជាបាននាំយកមេដាយចំនួន២គ្រឿងមកជូនជាតិ ។ ក្នុងនោះអ្វីដែលជាមោទនភាពបំផុតនោះ គឺកីឡាករវ័យក្មេង បួន ច័ន្ទថារ៉ា ដែលទើបតែមានអាយុ១៥ឆ្នាំប៉ុណ្ណោះ ដណ្ដើមបានមេដាយប្រាក់លើវិញ្ញាសាប្រយុទ្ធក្នុងប្រភេទទម្ងន់៤៥គីឡូក្រាមដោយកីឡាកររូបនេះបានយកឈ្នះកីឡាករអេស្តូនី ក្រិកជប៉ុន អាហ្សង់ទីន កាហ្សាក់ស្ថាន និងអ៊ុយក្រែន ប៉ុន្តែគួរឱ្យស្ដាយប្អូនបែរជាចាញ់កីឡាកររុស្ស៊ីនៅវគ្គផ្ដាច់ព្រ័ត្រ។
ចំណែកមេដាយសំរឹទ្ធវិញដណ្ដើមបានពីការប្រកួតជាក្រុមលើវិញ្ញាសាសម្ដែង ដែលមានកីឡាករ ប៊ុន ឡុង, សុខ ស៊ូណាម, ចេង រោងរាជ និងសេង ម៉េងហៀង ។ ការប្រកួតលើវិញ្ញាសានេះអត្តពលិកកម្ពុជាយើងចាញ់អត្តពលិកកូរ៉េខាងជើងដែលជាម្ចាស់ក្បាច់គុន បន្ទាប់មកចាញ់រុស្ស៊ី ។
គួររំលឹកថា ប្រតិភូកីឡាកម្ពុជាដែលបានទៅចូលរួមប្រកួតលើកនេះ មានចំនួន៧រូបដឹកនាំដោយលោក បួនហ៊ីង សុធីយ៉ា ជាគ្រូបង្វឹក។ រីឯការប្រកួតធ្វើឡើងនៅចន្លោះថ្ងៃទី២៥ដល់២៧សីហា៕
ចែករំលែកព័តមាននេះ