ទីក្រុងប៉េកាំង ៖ បើមិនមានអ្វីប្រែប្រួលទេ សប្តាហ៍ក្រោយនេះនឹងបានឃើញបណ្តាមេដឹកនាំមកពីទូទាំងអាហ្វ្រិកអញ្ជើញមកទីក្រុងប៉េកាំងដើម្បីចូលរួមវេទិកាមួយស្តីពី «កិច្ចសហប្រតិបត្តិការចិន-អាហ្វ្រិក » ។ ប្រធានបទនាអំឡុងកិច្ចប្រជុំកំពូលនោះគឺ «ចិន-អាហ្វ្រិក ៖…
ទីក្រុងប៉េកាំង ៖ បើមិនមានអ្វីប្រែប្រួលទេ សប្តាហ៍ក្រោយនេះនឹងបានឃើញបណ្តាមេដឹកនាំមកពីទូទាំងអាហ្វ្រិកអញ្ជើញមកទីក្រុងប៉េកាំងដើម្បីចូលរួមវេទិកាមួយស្តីពី «កិច្ចសហប្រតិបត្តិការចិន-អាហ្វ្រិក » ។ ប្រធានបទនាអំឡុងកិច្ចប្រជុំកំពូលនោះគឺ «ចិន-អាហ្វ្រិក ៖ ឆ្ពោះទៅរកសហគមន៍មួយកាន់តែខ្លាំងឡើងៗជាមួយអនាគតរួមគ្នា តាមរយៈកិច្ចសហប្រតិបត្តិការឈ្នះ-ឈ្នះ »។ ជាថ្មីម្តងទៀត នឹងនាំយកកិច្ចសហប្រតិបត្តិការចិន-អាហ្វ្រិកដាក់លើរបៀបវារៈអន្តរជាតិ។
សូម្បីមុនពេលការកោះប្រជុំជំនួបកំពូលនេះ បណ្តាញព័ត៌មានលោកខាងលិចបានចាប់ផ្តើមពិនិត្យពិច័យទំនាក់ទំនងចិន-អាហ្វ្រិក ។ ក្នុងអត្ថបទទស្សនៈមួយ ដែលត្រូវបានចេញផ្សាយដោយកាសែត «Financial Times»បានលើកជាទឡ្ហីករណ៍ថា ការភ្ជាប់ទំនាក់ទំនងចិននៅអាហ្វ្រិក និងគំរូសេដ្ឋកិច្ចដែលត្រូវបានជំរុញតាមរយៈការកសាងហេដ្ឋារចនាសម្ព័ន្ធរបស់ចិន កំពុងទទួលភាពបរាជ័យក្នុងទ្វីបមួយនេះ ។
កាលពីប៉ុន្មានឆ្នាំមុន ការភ្ជាប់ទំនាក់ទំនងរបស់ចិននៅអាហ្វ្រិក ទីក្រុងប៉េកាំងបានសង្កត់ធ្ងន់ថា គ្រាន់តែជាការដោះដូរវត្ថុធាតុដើមជាមួយផលិតផលចិនតែប៉ុណ្ណោះ ។ បច្ចុប្បន្ននេះ រឿងនេះ ត្រូវបានបំពេញបន្ថែមតាមរយៈជំនួយ និងគម្រោងវិនិយោគដែលត្រូវដោះស្រាយតម្រូវការរបស់អាហ្វ្រិកតាមរយៈការកសាងហេដ្ឋារចនាសម្ព័ន្ធ ។ រហូតមកទល់ឥឡូវនេះ ចិនគឺជាហិរញ្ញិកឈានមុខគេនៃគម្រោងកសាងហេដ្ឋារចនាសម្ព័ន្ធនៅអាហ្វ្រិក ដែលគិតជាធម្យមការវិនិយោគប្រចាំឆ្នាំមានទឹកប្រាក់រហូតដល់១១,៥ពាន់លានដុល្លារពីឆ្នាំ២០១២-២០១៦ ។
ជំនួយហិរញ្ញវត្ថុ និងការអភិវឌ្ឍរបស់ចិនបានជួយបំពេញកន្លែងទំនេរ ដែលត្រូវបានទុកចោលដោយបណ្តាប្រទេសលោកខាងលិចដែលបានស្វែងរកការប្រើប្រាស់ជំនួយដើម្បីឥទ្ធិពលនយោបាយក្នុងស្រុកនៃប្រជាជាតិអាហ្វ្រិក និងទាញយកជ័យផលនយោបាយទាំងនោះ ។
មិនដូចលោកខាងលិច អ្វីដែលចិនបាននិងកំពុងធ្វើនៅអាហ្វ្រិក គឺមិនបាននិយាយត្រឹមតែបបូរមាត់នោះទេ ។ នៅឯវេទិកាមួយឆ្នាំ២០១៥ ក្នុងទីក្រុង Johannesburg ប្រទេសអាហ្វ្រិកខាងត្បូង ប្រធានាធិបតីចិនលោក ស៊ី ជិនពីង បានសន្យាផ្តល់ទឹកប្រាក់ចំនួន៦០ពាន់លានដុល្លារ សម្រាប់ការអភិវឌ្ឍនៅអាហ្វ្រិកក្នុងរយៈពេល៣ឆ្នាំបន្ទាប់ ។
ចិនសង្ឃឹមថា នឹងជួយឱ្យអាហ្វ្រិកទទួលបានការអភិវឌ្ឍកាន់តែល្អប្រសើរតាមរយៈជំនួយក្នុងការកសាងហេដ្ឋារចនាសម្ព័ន្ធ និងឧស្សាហូបនីយកម្ម តាមរយៈការបង្កើតការងារក្នុងស្រុក និងការកៀងគរកម្លាំងពលកម្មរបស់ខ្លួន ។ ចិនមិនចង់ឱ្យបណ្តាប្រជាជាតិនៅអាហ្វ្រិកចម្លងគំរូរបស់ខ្លួនឡើយ ។ ជាងនេះទៅទៀត ចិនឱ្យខ្ចីបទពិសោធន៍ការអភិវឌ្ឍរបស់ខ្លួន ដោយចិនសង្ឃឹមថា បណ្តាប្រជាជាតិទាំងនេះអាចស្វែងរកមាគ៌ាអភិវឌ្ឍន៍ដោយខ្លួនឯង ហើយក្លាយជាក្បាលម៉ាស៊ីនសេដ្ឋកិច្ចពិភពលោកដ៏ក្មេងខ្ចីមួយទៀត និងជារោងចក្រសម្រាប់ពិភពលោក ។
យ៉ាងណាក្ដី គោលបំណងនៃគម្រោងវិនិយោគរបស់ចិននៅអាហ្វ្រិក គឺមិនមែនគិតតែអ្នកដទៃនោះទេ។ ផ្ទុយមកវិញ ការពង្រឹងចំណងទាក់ទងជាមួយទ្វីបនេះ ចិនកំពុងតែសម្លឹងមើលទីផ្សារនាំចូលថ្មីមួយទៀតសម្រាប់ទំនិញ និងពលកម្មការងាររបស់ខ្លួន ព្រមទាំងពិនិត្យមើលស្តង់ដាបច្ចេកវិទ្យាផងដែរ ។
ចេញពីទស្សនវិស័យនេះ ការភ្ជាប់ទំនាក់ទំនងរបស់ចិនជាមួយអាហ្វ្រិក សមនឹងទស្សនៈ នៃកិច្ចសហប្រតិបត្តិការឈ្នះ-ឈ្នះ ដែលចិនបាននិងកំពុងធ្វើការលើរឿងនេះ ដោយហៅថា «កិច្ចសហប្រតិបត្តិការឈ្នះ-ឈ្នះ» នៅពេលដែលប្រទេសទាំងនេះធ្វើការរួមគ្នាសម្រាប់ផលប្រយោជន៍រួមរបស់មនុស្សជាតិ ។ នេះគឺជាប្រធានបទមួយដែលត្រូវដាក់បញ្ចូលក្នុងវេទិកាខាងមុខផងដែរ ។
របៀបដែលអាហ្វ្រិកអាចអភិវឌ្ឍន៍ខ្លួនឯងបាន គឺមិនត្រូវពឹងអាស្រ័យលើមជ្ឈដ្ឋានខាងក្រៅ ដើម្បីធ្វើការសម្រេចនោះឡើយ។ អ្វីដែលត្រូវការ គឺការគាំទ្រចាំបាច់សម្រាប់សម្រួលការអភិវឌ្ឍ ។ កាលពីអតីតកាល លោកខាងលិចបានចាត់ទុកអាហ្វ្រិកជាកន្លែងឆក់ប្លន់ដោយគ្មានការពិចារណាពីការកសាងហេដ្ឋារចនាសម្ព័ន្ធនោះឡើយ ។
បច្ចុប្បន្ននេះ ប្រទេសទាំងនោះមិនអាចផ្តល់ អ្វីដែលចិនកំពុងតែផ្តល់ឱ្យទ្វីបអាហ្វ្រិកនោះឡើយ ។ ដូច្នេះលោកខាងលិច គ្មានហេតុផលសម្រាប់រិះគន់ចិននៅអាហ្វ្រិកឡើយ ។
គួររំលឹកឡើងវិញបន្តិចថា កិច្ចប្រជុំកំពូល (ចិន-អាហ្វ្រិក)តាមគម្រោងនឹងត្រូវប្រារព្ធធ្វើនៅថ្ងៃទី៣-៤ ខែកញ្ញា ឆ្នាំ២០១៨ខាងមុខ ក្នុងទីក្រុងប៉េកាំង ប្រទេសចិន ៕
ចែករំលែកព័តមាននេះ