ខេត្តបាត់ដំបង ៖ អាគារស្នាក់នៅរបស់កងទ័ព១ខ្នងត្រូវបានសម្ពោធដាក់ឲ្យប្រើប្រាស់ នៅតំបន់ជួរភ្នំដងរែកព្រំប្រទល់ជាមួយប្រទេសថៃ ក្នុងខេត្តបន្ទាយមានជ័យ និងខេត្តឧត្តរមានជ័យ នៅថ្ងៃទី៣០ ខែសីហា ឆ្នាំ២០១៨ ។
ដែលជាអំណោយលោក សួន បវរ គណអភិបាលខេត្តបន្ទាយមានជ័យ និងលោកជំទាវ សុង ផល្លីន បវរបានធ្វើដំណើររួមជាមួយលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាយោធភូមិភាគទី៥ និងមេបញ្ជាការកងពលលេខ៥១,៥២ និងលេខ៥៣ មេបញ្ជាការតំបន់ប្រតិបត្តិការសឹករង ពោធិសាត់ បាត់ដំបង ប៉ៃលិន បន្ទាយមានជ័យ មេបញ្ជាការកងការពារព្រំដែនលេខ៥០១,៥០២,៥០៣និង៥០៤ និងនាយទាហានទទួលបន្ទុកជំនាញមួយចំនួនទៀត សរុបចំនួន២១៤នាក់ ដើម្បីធ្វើទស្សនកិច្ចសិក្សារកការរីកចម្រើនលើគ្រប់វិស័យ ទៅកាន់វរសេនាតូចលេខ១ តំបន់ប្រតិបត្តិការសឹករងបន្ទាយមានជ័យ ឈជើងនៅជួរភ្នំដងរែក ស្ថិតនៅភូមិរហាលកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យជាប់ព្រំប្រទល់ជាមួយខេត្តឧត្តរមានជ័យ ដើម្បីធ្វើទស្សនកិច្ចសិក្សាដកពិសោធន៍ការកសាងអង្គភាពរឹងមាំលើគ្រប់វិស័យ ។
លោកវរសេនីយ៍ទោ សយ ច្រឹប មេបញ្ជាការវរៈសេនាតូចលេខ១ បានរាយការណ៍បង្ហាញទីតាំងលក្ខណភូមិសាស្ត្រដែលកំពុងឈរជើង និងការពង្រឹងក្នុងអង្គភាពដែលបានឈរជើងដល់សព្វថ្ងៃនេះមកអំពីការដឹកនាំរបស់ថ្នាក់ដឹកនាំជំរុញឲ្យមានគុណភាពបានល្អប្រសើរ ដែលកងទ័ពយើងអាចធានាបានទាំងផ្នែកជីវភាព និងការស្នាក់នៅកាន់តែមានលទ្ធផលល្អ ។
លោកឧត្តមសេនីយ៍ទោ ភ្លន់ តារា មេបញ្ជាការតំបន់ប្រតិបត្តិការសឹករងបន្ទាយមានជ័យបានថ្លែងថា កម្លាំងឈរជើងនៅចំណុចនេះបានរួមសហការជាមួយនគរបាលការពារព្រំដែនលេខ៨០៧ និងអាជ្ញាធរស្រុកថ្មពួកដោយឃើញមានភាពល្អប្រសើរឡើង រយៈពេល៣ឆ្នាំកន្លងមកនេះ ដោយសារតែមានការធ្វើទស្សនសិក្សាលើគ្រប់វិស័យពីអង្គភាពមួយទៅអង្គភាពមួយទៀត ដែលពីមុនមក ទីនេះជាព្រៃសុទ្ធសាធ ឥឡូវមានអាគារស្នាក់នៅមានផ្ទះបាយ រួមមានការដាំដុះ មានផ្លូវកៅស៊ូជាប់រហូតតាមបណ្តោយខ្សែបន្ទាត់ព្រំដែន ជាភាពងាយស្រួលក្នុងការការពារ កសាងប្រទេសជាតិរកការរីកចម្រើននៅតាមអង្គភាពជាបន្តទៅមុខទៀត ។
បន្ទាប់មកចំណាប់អារម្មណ៍ របស់លោកឧត្តមសេនីយ៍ទោ សេង ធារិន មេបញ្ជាការកងពលតូចថ្មើរជើងលេខ៥១ បានជំរុញលើវិន័យ និងសណ្តាប់ធ្នាប់បន្ថែមទៀត ហើយលោក សួន បវរ អភិបាលខេត្តបន្ទាយមានជ័យបានថ្លែងថា លោកបានស្គាល់ពីការលំបាកជីវិតកងទ័ពច្បាស់ណាស់ ព្រោះលោកបានហែលក្នុងភ្នក់ភ្លើងសង្គ្រាមមកស្ទើរពេញមួយជីវិតលោកទៅហើយ តែពេលនេះជាឱកាសមួយដែលលោកអាចយល់បាន ត្រូវតែមានការជួយលើកទឹកចិត្តតាមលទ្ធភាពដែលអាចធ្វើទៅបាន ព្រោះរាល់បញ្ហាដែលតែងតែកើតមានកន្លងមក បើកងទ័ពមិនចេញមុខដោះស្រាយដោយសន្តិវិធីតាមគោលការណ៍របស់សម្តេចតេជោហ៊ុន សែនទេ យើងក៏មិនអាចទទួលបាននូវសុខសន្តិភាពបានរហូតដល់ថ្ងៃនេះដែរ ។ ក្នុងឱកាសនោះលោកអភិបាលខេត្តបានសម្ពោធអាគារស្នាក់នៅមួយខ្នង ដែលជាអំណោយរបស់លោក និងលោកជាទាវ ដោយចំណាយថវិកា១២៥០០ដុល្លារ និងចូលរួមកសាងទីបញ្ជាការ កងអនុសេនាធំលេខ១ ចំនួន៥៥០០ដុល្លារ លើចំនួនសរុប១៥០០០ដុល្លារ និងឧបត្ថម្ភការរៀបចំកម្មវិធី២លានរៀលជាបន្តទៅទៀត ។
ក្រោយមកលោកឧត្តមសេនីយ៍ឯក ប៊ុន សេង បានផ្តាំផ្ញើថា ពេលនេះជាឱកាសល្អមួយដែលយើងជាថ្នាក់ដឹកនាំបានមកជួបជុំគ្នា ដើម្បីពិនិត្យមើលកន្លែងនេះអំពីការរីកចម្រើន ហើយក៏ជាគំរូដល់អង្គភាពផ្សេងៗទៀតដែរ ក្នុងការរៀបចំអង្គភាពឲ្យធានាបានចំពោះការដឹកនាំ កសាងអង្គភាពដែលមានអង្គភាពវរសេនាតូចលេខ៥១៤ ចំណុះឲ្យកងពលលេខ៥១ ជាគំរូគេក្នុងការរីកចម្រើនប្រមាណ៣ឆ្នាំកន្លងមកនេះ ។
លោកឧត្តមសេនីយ៍ឯក បានបន្តទៀតថា ផ្លូវថ្នល់ចាក់កៅស៊ូតាមខ្សែក្រវ៉ាត់ព្រំដែនមានស្ទើរគ្រប់ទាំងស្រុងអស់ហើយ ចាប់ពីខេត្តពោធិសាត់ បាត់ដំបង បន្ទាយមានជ័យ ហើយកំពុងបន្តក្នុងខេត្តប៉ៃលិន ដោយលក្ខណៈភូមិសាស្ត្រសម្បូរព្រៃភ្នំ និងជ្រោះជ្រៅជាច្រើនកន្លែង ទើបជួបការលំបាក ហើយក៏ជាភាពងាយស្រួលដល់អង្គភាពមួយចំនួនឈរជើងតាមព្រំដែនអាចពង្រឹងបានបន្ថែមទៀតដែរ ដូច្នោះសូមគ្រប់កងកម្លាំងទាំងអស់ យកចិត្តទុកដាក់ក្នុងការងារយកស្មារតីឆន្ទៈបម្រើជាតិដោយស្មោះត្រង់ រួបរួមសាមគ្គីផ្ទៃក្នុង គោរពវិន័យ សណ្តាប់ធ្នាប់ បន្តការដាំដុះ ចិញ្ចឹមសត្វ ដើម្បីជួយពង្រឹងជីវភាពក្នុងអង្គភាព និងគ្រួសារ ហើយរួមសហប្រតិបត្តិការពីគ្រប់មជ្ឈដ្ឋានឲ្យបានល្អបន្ថែមទៀត ដើម្បីក្តីសុខរបស់ប្រជាជន និងសង្គមជាតិយើងទាំងមូលដែលកំពុងមានសព្វថ្ងៃនេះ ។
ចុងក្រោយលោកឧត្តមសេនីយ៍ឯកបានជួយឧបត្ថម្ភការកសាងអាគារទីបញ្ជាការកងអនុសេនាធំទី១ ចំនួន១ខ្នង មានតម្លៃ១៥ ០០០ដុល្លារ ទំហ៊ំ១៣ម៉ែត្រគុណ៩ម៉ែត្របន្ថែមទៀត ដោយជួយជាថវិកាចំនួន៥៥០០ដុល្លារ និង២លានរៀលដល់កម្មវិធី លោកសួន បវរ អភិបាលខេត្ត ចំនួន៥៥០០ដុល្លា លោកឧត្តមសេនីយ៍ទោភ្លន់ តារា ចំនួន៣ពាន់ដុល្លារ មេបញ្ជាការតាមកងពល និងកងព្រំដែនចំនួន១១៥០ដុល្លារ ៕
ចែករំលែកព័តមាននេះ