រាជធានីភ្នំពេញ ៖ កាលពីថ្ងៃទី៣១ សីហា ស្ថានីយទូរទស្សន៍អាស៊ីអាគ្នេយ៍ បានប្រកាសឱ្យដឹងពីការបើករេញឱ្យកីឡាករកម្ពុជា និងថៃ ៨នាក់ក្នុងប្រភេទទម្ងន់៦០គីឡូក្រាមឱ្យឡើងប្រកួតគ្នាយកតំណែងជើងឯក ដែលទទួលបានខ្សែក្រវាត់អន្តរជាតិ អមដោយទឹកប្រាក់៥ពាន់ដុល្លារ។
កីឡាករកម្ពុជា៤រូប បានបង្ហាញមហិច្ឆតា ចង់បានតំណែងនេះយ៉ាងខ្លាំង ខណៈដែលភាគីខាងកីឡាករថៃក៏ត្រូវគេដឹងថា ប្រកាសចង់បានដែរ។ ការប្រកួតដែលបានប្រកាសធ្វើឡើងនៅរៀងរាល់សៅរ៍ វេលាម៉ោង២រសៀលនេះ នឹងកំណត់ឱ្យកីឡាករកម្ពុជា៤រូបស្ថិតនៅមួយពូល ហើយកីឡាករថៃ ស្ថិតនៅមួយពូល ។
ដោយកីឡាករម្នាក់ត្រូវប្រកួតជាមួយកីឡាករខ្វែងពូលឱ្យគ្រប់៤នាក់ ដើម្បីជ្រើសយកអ្នកលេខ១ ក្នុងពូលកម្ពុជា និងអ្នកលេខ១ ក្នុងពូលថៃឱ្យឡើងប្រកួតគ្នាយកខ្សែក្រវាត់តែម្ដង។
លោក ញាណ សុធី អ្នករៀបចំការប្រកួតបានអះអាងថា ការប្រកួតនៅក្នុងព្រឹត្តិការណ៍ដណ្ដើមជើងឯកអន្តរជាតិ រដូវកាលទី៧ ក្នុងប្រភេទទម្ងន់៦០គីឡូក្រាមនេះ នឹងមិនភ័យរឿងមិនមានកីឡាករថៃ ឬមិនមានកីឡាករកម្ពុជា ឡើងប្រកួតយកខ្សែក្រវាត់នោះទេ ដោយសារតែខាងកម្ពុជាបានសម្រេចលុបចោលការប្រកួតក្នុងវគ្គពាក់កណ្ដាលផ្ដាច់ព្រ័ត្ររវាងកីឡាករ៤នាក់ ដែល២នាក់មកពីពូលកម្ពុជា និង២នាក់មកពីពូលថៃ ហើយជ្រើសតែអ្នកខ្លាំងតំណែងពូលម្ខាងៗ ឱ្យឡើងប្រកួតគ្នាយកខ្សែក្រវាត់។
លោកថា អ្នករៀបចំកម្មវិធីនឹងផ្ដល់ទឹកប្រាក់៥ពាន់ដុល្លារឱ្យអ្នកជាប់ខ្សែក្រវាត់ និងទឹកប្រាក់៣ពាន់ដុល្លារឱ្យអ្នកលេខ២ ដោយមិនទាន់បញ្ចូលការផ្ដល់នូវតម្លៃខ្លួនរាល់ពេលកីឡាករម្នាក់ឡើងប្រកួតសន្សំពិន្ទុផង។
កីឡាករដែលត្រូវបានប្រកាសថា មានឈ្មោះចូលរួមប្រកួតរួមមាន ៖ កីឡាករឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ កីឡាករសុខ សាវិន មកពីក្លិបឆ្មា-សសែនសុខគុនខ្មែរ កីឡាករ លី ភា មកពីក្លិបសំរោងកោងខេត្តបាត់ដំបង និងកីឡាករ សូត្រ ប៊ុនធី មកពីក្លិបបក្សាស្លាបដែក ខណៈដែលសមាសភាពរបស់កីឡាករថៃ រួមមានកីឡាករ Phat Chhayak Phum កីឡាករ Phat Maha កីឡាករ Phat Ngenthong និងកីឡាករ Phat Thana ដោយការប្រកួតទាំងមូលនឹងបញ្ចប់នៅអំឡុងចុងឆ្នាំ២០១៨៕
ចែករំលែកព័តមាននេះ