ប្រភពពីមន្ទីរពេទ្យបានឱ្យដឹងថា មនុស្សយ៉ាងហោចណាស់១២១នាក់ បានស្លាប់បាត់បង់ជីវិត និងជិត៥០នាក់ទៀតរងរបួសក្នុងការផ្ទុះនៅរោងចក្រផលិតគ្រឿងផ្ទុះមួយនាភាគខាងត្បូងប្រទេសយេម៉ែន កាលពីយប់ថ្ងៃទី២៨ មីនា កន្លងមក ។ ប្រភពដដែលឱ្យដឹងទៀតថា ចំនួនអ្នកស្លាប់អាចកើនឡើងថែមទៀត ព្រោះភាគច្រើននៃអ្នករបួសស្ថិតក្នុងស្ថានភាពធ្ងន់ធ្ងរ ។
មន្ត្រីសន្តិសុខមួយរូបនិយាយឱ្យដឹងថា ភាគច្រើននៃអ្នកស្លាប់ជាពលរដ្ឋក្នុងតំបន់ ។ រោងចក្រផលិតគ្រឿងផ្ទុះនោះស្ថិតនៅក្នុងខេត្ត Abyan ភាគខាងត្បូងប្រទេសយេម៉ែន ហើយការផ្ទុះនៅរោងចក្រនេះកើតឡើងក្នុងអំឡុងពេលមានបាតុកម្មប្រឆាំងប្រធានាធិបតីប្រទេសនេះ លោកអាលីអាប់ឌុលឡាហ៍ សាឡេហ៍ ចាប់តាំងពីប៉ុន្មានខែមកហើយ។
ដោយឡែកកាលពីថ្ងៃទី២៧ មីនា កន្លងមក ពួកសកម្មប្រយុទ្ធអ៊ិស្លាមបានបើកការវាយឆ្មក់រោងចក្រនោះចំពេលមានការប៉ះទង្គិចគ្នារវាងពួកបាតុករជាមួយកងកម្លាំងរដ្ឋាភិបាល ។ នៅពេលមានការផ្ទុះក្នុងរោងចក្រ ពលរដ្ឋជាច្រើនលើកគ្នាទៅកាន់ទីនោះដើមលួចគ្រឿងផ្ទុះ ។ មន្ត្រីនានានិយាយឱ្យដឹងថា ភាគច្រើននៃអ្នកស្លាប់ក្នុងការផ្ទុះនោះជាស្ត្រី និងកុមារ ។ ទោះបីជាបែបណា គេមិនទាន់ដឹងច្បាស់ពីមូលហេតុនៃការផ្ទុះនៅឡើយទេ ។ តាមទីភ្នាក់ងារព័ត៌មាន AP ថា រោងចក្រនោះផលិតគ្រឿងផ្ទុះ និងគ្រាប់កាំភ្លើង AK ៕
ចែករំលែកព័តមាននេះ