ឥណ្ឌា ៖ តាមប្រភពព័ត៌មាន Metro បានឲ្យដឹងថា បុរសម្នាក់បានដាំដើមឈើមួយដើមជារៀងរាល់ថ្ងៃ អស់រយៈពេល៤០ឆ្នាំ រហូតទាល់តែអាចកែប្រែវាលខ្សាច់ទៅជាព្រៃក្រាស់។
កាលពីឆ្នាំ១៩៧៩ លោក Jadav Payeng គឺជាយុវជនម្នាក់ ដែលយកចិត្តទុកដាក់លើការហូរច្រោះដី ដោយសារតែបែបនេះ លោកក៏ចាប់ផ្តើមដាំដើមឈើ ដើម្បីជួយឲ្យវាទប់ដីមិនឲ្យហូរ។
វាលខ្សាច់ដែលលោកបានកែប្រែប្រើរយៈពេល៤០ឆ្នាំនេះ គឺស្ថិតនៅលើកោះ Majuli នៅភាគខាងជើងនៅប្រទេសឥណ្ឌា ដែលពេលនេះព្រៃមានទំហំធំជាឧទ្យាននៅទីក្រុងញ៉ូវយកទៅទៀត។
អ្នកផ្តល់កំណើតឲ្យព្រៃរូបនេះបាននិយាយថា៖ «តំបន់នេះមានសុទ្ធតែព្រៃ។ ទាំងអស់ហ្នឹងសុទ្ធតែខ្ញុំជាអ្នកដាំ។ ដំបូងឡើងការដាំពិតជាស៊ីពេលច្រើនណាស់។ តែពេលនេះគឺស្រួលជាងមុន ដោយសារតែខ្ញុំបានគ្រាប់ពីដើមឈើទាំងអស់នោះស្រាប់»។
នាពេលនេះ មានសត្វដំរី សត្វខ្លា និង សត្វរមាសជាច្រើនក្បាល បានយកព្រៃ Majuli ដែលធ្លាប់តែជាវាលខ្សាច់ធ្វើជាផ្ទះ។ ទំហំរបស់ព្រៃទាំងមូលនាពេលបច្ចុប្បន្នមានទំហំដល់ទៅ៥៥០ហិចតា ដែលធំជាងឧទ្យានទីក្រុងញ៉ូវយកដែលមានទំហំត្រឹម៣៤១ហិចតា៕ វីដេអូដកស្រង់ចេញពី ៖ William D McMaster
ចែករំលែកព័តមាននេះ