ខេត្តកំពង់ឆ្នាំង ៖បន្ទាប់ពីមានវិវាទរវាងគណៈកម្មការ និងចៅអធិកវត្ត ជាមួយនឹងជាងសាងសង់ព្រះវិហារ នៅវត្តព្រែករាំង ភូមិព្រែករាំង ឃុំទឹកហូត ស្រុករលាប្អៀរ អស់រយៈពេលជិតមួយឆ្នាំកន្លងទៅ ។
ពេលនេះការដោះស្រាយត្រូវបានបញ្ចប់ហើយ ដោយមានការសម្របសម្រួលពីលោកជំទាវ អភិបាលរងខេត្ត ប្រធាន មន្ទីរធម្មការ និងសាសនាខេត្ត និងមានការនិមន្តចូលរួមពី ព្រះអនុគណៈស្រុក ព្រះអនុគណៈខេត្ត កាលពីថ្ងៃទី២៨ ខែសីហាកន្លងទៅនេះ ការដោះស្រាយនេះគឺអាចទទួលយកបានទាំងសងខាង ។
កន្លងទៅ កោះសន្តិភាព ធ្លាប់ផ្សាយពីរលើករួចមកហើយ ពីវិវាទរវាងចៅអធិការវត្តជាមួយនឹងជាងសាងសង់វិហារ កាលណោះរហូតដល់មានភាគីម្ខាងប្តឹងសុំដកចៅអធិការវត្តព្រែករាំង ទៀតផង ប៉ុន្តែសម្រាប់ប្រជាពលរដ្ឋជាពុទ្ធបរិស័ទ្ធចំណុះជើងវត្ត គឺមានជាច្រើនភូមិបានផ្តិតមេដៃគាំទ្រចៅអធិការវត្តឱ្យគង់នៅ និងដឹកនាំកសាងវត្តបន្ត ។
គណៈកម្មការ និងអាចារ្យវត្តព្រែករាំង បានផ្ដល់កិច្ចសម្ភាសន៍ថា កាលពីថ្ងៃទី២៨ ខែសីហានេះ ដោយមានការសម្របសម្រួលពីព្រះអនុគណៈស្រុក-ខេត្ត ក៏ដូចជាមន្ទីរធម្មការ និងសាសនាខេត្ត និងដោយមានការចូលរួមពីលោកជំទាវ ប៉ាល់ យឿន អភិបាលរងខេត្តកំពង់ឆ្នាំងផង ការដោះស្រាយត្រូវបានបញ្ចប់ដោយព្រមទទួលបានទាំងអស់គ្នា បើទោះបីក្នុងពេលនោះ ជាងធ្វើព្រះវិហារទារថ្លៃឈ្នួលរហូតទៅដល់៣ម៉ឺន៥ពាន់ដុល្លារក្តី ក៏ប៉ុន្តែវាមិនសក្តិសមនៃតម្លៃដែលជាងធ្វើបានឡើយ ហើយការសម្របសម្រួលរយៈពេលពេញមួយថ្ងៃ ទើបសម្រេចទទួលយកទាំងសងខាង គឺខាងគណៈកម្មការ និងចៅអធិការវត្ត ព្រមសងសំណងទៅជាងចំនួន១ម៉ឺនដុល្លារ ប៉ុន្តែការសងត្រូវចែកជា៤ដំណាក់កាល។
ទី១-សងនៅថ្ងៃទី៦ ខែកញ្ញា ចំនួន២ពាន់ដុល្លារ ,ទី២-សងនៅថ្ងៃភ្ជុំបិណ្ឌ១ពាន់ដុល្លារ ,ទី៣ -សងនៅថ្ងៃកឋិនទាន សង៥ពាន់ដុល្លារ និងទី៤-សងនៅថ្ងៃចូលឆ្នាំបង្ហើយគឺ២ពាន់ដុល្លារ ទៀត សរុប១ម៉ឺនដុល្លារ ។
យ៉ាងនេះក្តី លោកតាអាចារ្យ គណៈកម្មការវត្ត ព្រមទាំងគ្រូចៅអធិការបាន ព្រះនាម អ៊ុក ចាន់ថន បានថ្លែងអំណរគុណយ៉ាងជ្រាលជ្រៅចំពោះលោកជំទាវ ប៉ាល់ យឿន អភិបាលរងខេត្ត ក៏ដូចជាមន្ទីរធម្មការ និងសាសនា និងថ្លែងព្រះអំណរព្រះគុណ ដល់ព្រះអនុគណៈស្រុក-ខេត្ត ដែលបានជួយសម្របសម្រួលបញ្ចប់រឿងនេះដោយអាចទទួលយកបានទាំងសងខាង ។
សូមរំលឹកដែរថា ព្រះភិក្ខុ អ៊ុក ចាន់ថន បានមកគង្គនៅវត្តព្រែករាំង នៅឆ្នាំ២០០៩ចាប់ពីពេលនោះមក ព្រះអង្គបានកសាងវត្ត រីកចំរើនច្រើនណាស់ ដូចជាចាក់ដីរាប់ម៉ឺនដុល្លារ ដើម្បីកសាងព្រះវិហារ កសាងបានសាលាឆាន់ កុដិ និងសមទ្ធិផលមួយចំនួនជាច្រើនទៀត ហេតុនេះហើយទើបធ្វើឱ្យពុទ្ធបរិស័ទ្ធចំណុះជើងវត្ត ស្រឡាញ់ពេញចិត្តគ្រប់ៗគ្នា៕
ចែករំលែកព័តមាននេះ