សារព័ត៌មានបរទេសកាលពីពេល ថ្មីៗកន្លងមកផ្សាយថា លោកថាំង ជនជាតិចិនបាននាំគូស្នេហ៍នាងយ៉ាងដែលសេពគប់គ្នារយៈពេល៣ខែ ទៅហាងលក់រថយន្តមួយនៅក្រុងឈើងទូខេត្តសុីឈួនស្របតាមការសន្យាដែលគេធ្លាប់ប្រាប់ថានឹងទិញរថយន្តទំនើបតម្លៃ៧០០.០០០យាន់ ឬ១សែនដុល្លារប្រគល់ជូននាង ។
មុននេះលោកថាំង បានអួតប្រាប់គូស្នេហ៍ថាគេជាអ្នកជំនួញ និងមានចំណូលល្អ ។ ដើម្បីបង្ហាញថាខ្លួនជាបុរសដើមទ្រូងប្រាំហាត់ ជាបុរសគោរពតាមពាក្យសន្យា ដែលតាមពិតគេគ្មានប្រាក់សោះនោះ ក៏រិះរកវិធីសាស្ត្រនាំគូស្នេហ៍ និងបងប្រុសរបស់នាង២នាក់ទៀតទៅហាងលក់រថយន្តមួយ ។ បន្ទាប់មកគេកុហកថាទៅយកប្រាក់មកប្រគល់ជូន ។ នៅពេលចាកចេញគេក៏សម្តៅទៅផ្សារទំនើបមួយនៅក្បែរនោះ និងបានទិញកាំបិតមួយតម្លៃ១៥យាន់ ឬ២ដុល្លារ ។
ចេញពីផ្សារគេក៏ដើរទៅខាងក្រោយរថយន្តមួយគ្រឿងយកកាំបិតឆូតដៃ ។ រួចហើយក៏ទូរស័ព្ទហៅគូស្នេហ៍ ដោយប្រាប់ថាត្រូវចោរប្លន់ប្រាក់ចំនួន៧៥០.០០០យាន់ ។ ចំណែកគូស្នេហ៍បានឮក៏សម្តៅទៅកន្លែងកើតហេតុជាមួយបងប្រុស និងនាំគេទៅមន្ទីរពេទ្យ ។
តាមការសាកសួររបស់ប៉ូលិសដឹងថាមានលក្ខណៈខុសប្រក្រតីទាំងសំដី និងសកម្មភាពរបស់គេ ។ ដូច្នេះហើយប៉ូលិសមើលវីដេអូឃ្លីបឃើញថាគេបានទិញកាំបិត និងគ្មានចោរប្លន់ទេ ។
លោកថាំងបានសារភាពថាគេជាអ្នកបង្កើតគម្រោងនេះឡើង ហើយក៏ត្រូវប៉ូលិសដាក់គុករយៈពេល១០ថ្ងៃ និងពិន័យប្រាក់៥០០យាន់ ឬ៧២ដុល្លារ ៕
ចែករំលែកព័តមាននេះ