ខេត្តកំពង់ឆ្នាំង ៖ ជុំវិញករណីជនសង្ស័យចូលលួចម៉ូតូរបស់ប្រជាពលរដ្ឋអស់ចំនួន៣គ្រឿងនៅភូមិស្ពករាជ្យ ឃុំអណ្ដូងស្នាយ កាលពីយប់ថ្ងៃទី២៨ ឈានចូលថ្ងៃទី២៩ ខែសីហា កន្លងទៅនេះ បន្ទាប់ពីសារព័ត៌មានកោះសន្តិភាពបានចុះផ្សាយថា ម្ចាស់បានភ្លេចចាក់សោទ្វាររបងមុខផ្ទះរួចមក ត្រូវបានម្ចាស់ផ្ទះប្រតិកម្មថា គាត់មិនបានភ្លេចចាក់សោទ្វាររបងនោះទេ ។
ទោះជាយ៉ាងនេះក្តី ភ្នាក់ងារកោះសន្តិភាពបានដកស្រង់សម្ដីរបស់លោកអធិការនគរបាលស្រុករលាប្អៀរ គឺលោកទឹម ចាន់ធី តែប៉ុណ្ណោះ ។
ក្រោយពីមានការប្រតិកម្មនេះមក ភ្នាក់ងារកោះសន្តិភាពក៏បានទូរស័ព្ទទៅកាន់លោកស្នងការរងនគរបាលខេត្តគឺលោកប៉ុល វុទ្ធី ហើយលោកបានបញ្ជាក់ថា ក្រោយពីពិនិត្យ និងធ្វើកោសល្យវិច័យរួចមក គឺបានចាក់សោទ្វាររបងពិតមែន។ ប៉ុន្តែមិនមែនសោសេឡិចនោះទេ គឺជាសោធម្មតាដែលអាចឆ្កិះបាន។ ជាមួយគ្នានេះ លោកបានបញ្ជាក់ថា ថ្វីដ្បិតតែសោធម្មតាមែន ប៉ុន្តែបើគ្មានជំនាញនោះទេ ក៏មិនអាចឆ្កឹះសោនោះបានដែរ។
លោកស្នងការរងនគរបាលខេត្តបានបញ្ជាក់ថា តាមការការសន្និដ្ឋានរបស់សមត្ថកិច្ច ក្រុមជនសង្ស័យបានផ្លោះរបងចូលទៅតាមខាងមុខ ហើយក៏បានលួចកាច់កម៉ូតូទាំង៣គ្រឿង បន្ទាប់មកក៏បានឆ្កឹះសោទ្វាររបងនិងនាំម៉ូតូចេញទៅដោយសុវត្ថិភាព ៕
ចែករំលែកព័តមាននេះ