រាជធានីភ្នំពេញ ៖ បច្ចុប្បន្ន ស្របពេលបច្ចេកវិទ្យាកាន់តែរីកចម្រើន គេសង្កេតឃើញបណ្តាញទំនាក់ទំនងសង្គមកាន់តែច្រើនបានបង្ហាញខ្លួនជាបន្ដបន្ទាប់ ដែលផ្តល់ឱកាសឲ្យអ្នកប្រើប្រាស់កាន់តែងាយស្រួលក្នុងការទាក់ទងគ្នាទៅវិញទៅមក ពិសេសគឺសារជាសំណេរ និងសំឡេងជាដើម ប៉ុន្តែការសន្ទនារបស់អ្នកប្រើប្រាស់មួយចំនួន តែងត្រូវបានបែកធ្លាយទៅដល់អ្នកផ្សេងទៀត ដោយសារតែអ្នកប្រើប្រាស់មិនបានអនុវត្តនូវវិធីដើម្បីការពារខ្លួន ឬចំណេះដឹងទាក់ទងនឹងបច្ចេកវិទ្យានៅមានកម្រិត ។ ក្នុងនោះ អ្នកជំនាញផ្នែកសន្ដិសុខបច្ចេកវិទ្យាបានបង្ហាញថា មាន៧ចំណុចដែលការពារគណនីរបស់អ្នកពីក្រុម Hacker បាន ។
លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាននៃក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា ការប្រើប្រាស់បណ្ដាញទំនាក់ទំនងសង្គម ពិសេសហ្វេសប៊ុក ពិតជាផ្ដល់ប្រយោជន៍ច្រើននៅក្នុងសង្គមបច្ចុប្បន្ន ដែលអាចកសាងទំនាក់ទំនង, បង្កើតធុរកិច្ច ឬពាណិជ្ជកម្មសព្វបែបយ៉ាង ប៉ុន្ដែភាគច្រើននៃការបែកធ្លាយនូវការសន្ទនា គឺបណ្តាលមកពីអ្នកប្រើប្រាស់ផ្ទាល់ដែលមិនបានអនុវត្តនូវវិធីដើម្បីការពារខ្លួន កុំឲ្យចាញ់បោក និងផ្តល់ព័ត៌មានទៅឱ្យហេឃ័រ (Hacker) ។
លោកថា ៖« មានចំណុចល្អៗដែលអ្នកប្រើប្រាស់បណ្តាញសង្គមហ្វេសប៊ុកគួរអនុវត្ត ដើម្បីការពារគណនីរបស់យើង »។ ចំណុចសំខាន់ៗដែលលោកប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មានរូបនេះបានលើកឡើងរួមមាន ៖
១-ប្រើប្រាស់ពាក្យសម្ងាត់ដែលខ្លាំង ចាប់ពី ៨តួអក្សរឡើង ដែលរួមបញ្ចូលតួអក្សរ លេខ និមិត្តសញ្ញារួមបញ្ចូលគ្នា ។
២-ដាក់ដំណើរការមុខងារផ្ទៀងផ្ទាត់ពីរស្រទាប់ (2 Factor Authentication) ។
៣-មិនត្រូវចុចទៅលើតំណរភ្ជាប់ (link) ឬព័ត៌មានណាដែលគួរឱ្យសង្ស័យ ឬមានប្រភពមិនច្បាស់លាស់ ។
៤-ត្រួតពិនិត្យទៅលើសារដែលផ្ញើមកតាម Facebook Messengerឱ្យបានច្បាស់លាស់ ឬបើអាច សូមធ្វើការផ្ទៀងផ្ទាត់ជាមួយអ្នកដែលបានផ្ញើអ្វីមកជាមុនសិន ។
៥-សូមគិតឱ្យបានពីរឬបីដង មុននឹងចុចទៅលើអ្វីមួយ ។
៦-សូមធ្វើការត្រួតពិនិត្យរកប្រភពព័ត៌មានជាមុនសិន ឬសាកសួរអ្នកជំនាញផ្នែកនេះដើម្បីជៀសវាងការបាត់បង់ដោយប្រការណាមួយ ។
៧-សូមរាយការណ៍ទៅកាន់ incident@camcert.gov.kh នៅពេលដែលអ្នកជួបបញ្ហា ។
យោងតាមរបាយការណ៍ក្រសួងប្រៃសណីយ៍ គិតត្រឹមដើមឆ្នាំនេះ ប្រជាពលរដ្ឋកម្ពុជាដែលប្រើប្រាស់បណ្ដាញសង្គមហ្វេសប៊ុកមានចំនួនប្រមាណ៧លាននាក់ ក្នុងនោះ៨១%ប្រើប្រាស់តាមទូរស័ព្ទ ខណៈអ្នកប្រើប្រាស់អុីនធើរណេតទូទាំងប្រទេសមានប្រមាណ១០លាននាក់ ស្មើនឹង៦៧%នៃប្រជាពលរដ្ឋសរុប និងអ្នកចុះឈ្មោះប្រើប្រាស់ស៊ីមកាតសព្វថ្ងៃ មានប្រមាណ២០លានស៊ីម ខណៈប្រជាពលរដ្ឋសរុបមានតែប្រមាណ១៦លាននាក់ប៉ុណ្ណោះ ។
បើទោះបីជាចំនួនអ្នកប្រើប្រាស់បណ្តាញទំនាក់ទំនងសង្គមហ្វេសប៊ុកច្រើនក្ដី ប៉ុន្តែចំណេះដឹងទាក់ទងនឹងព័ត៌មានឯកជនភាពរបស់ពួកគេនៅមានកម្រិតនៅឡើយ ៕
ចែករំលែកព័តមាននេះ