ខេត្តកំពង់ស្ពឺ ៖ មានការភ្ញាក់ផ្អើលមួយបានកើតឡើងបន្ទាប់ពីប្តីប្រពន្ធមួយគូនាំគ្នាដើរបេះបន្លែយកទៅស្ល ស្រាប់តែធុំក្លិនស្អុយក៏នាំគ្នាដើររកមើលក៏ប្រទះឃើញសពមើលមិនស្គាល់ហើមស្អុយ និងរលួយនៅក្នុងបន្ទប់ទឹកផ្ទះគេទុកចោល ហេតុការណ៍នេះកើតឡើងកាលពីម៉ោង៣និង៣៤នាទីរសៀល ថ្ងៃទី២៩ ខែសីហា ឆ្នាំ២០១៨ ស្ថិតក្នុងភូមិវាលធំ ឃុំត្រែងត្រយឹង ស្រុកភ្នំស្រួច។
ក្រោយពីប្រទះឃើញប្តីប្រពន្ធទាំង២ក៏រាយការណ៍មកសមត្ថកិច្ចឱ្យចុះទៅពិនិត្យរកការពិតថា តើនារីរងគ្រោះស្លាប់ដោយសារអ្វី? សពជនរងគ្រោះនៅមិនទាន់ស្គាល់អត្តសញ្ញាណនោះទេ នាព្រឹកថ្ងៃទី៣០ សីហានេះ ហើយសមត្ថកិច្ចជំនាញកំពុងត្រួតពិនិត្យ។
ប្រភពពីនគរបាលស្រុកភ្នំស្រួចឱ្យដឹងថា ប្តីប្រពន្ធ២នាក់ ១-ឈ្មោះទឹង ពៅ អាយុ៤៥ឆ្នាំ និងប្តីឈ្មោះស ហន អាយុ៥៥ឆ្នាំ រស់នៅភូមិវាលធំ ឃុំត្រែងត្រយឹង បានរាយការណ៍មកថា ប្រទះឃើញសពនារីមិនស្គាល់អត្តសញ្ញាណម្នាក់អាយុប្រហែល២៥ឆ្នាំដេកស្លាប់ក្នុងអាងបន្ទប់ទឹក ដោយមានសភាពស្អុយរលួយ ស្ថិតក្នុងដីចំការរបស់ឈ្មោះ សំ ប៊ុនណ្ណារិទ្ធ (អភិបាលរងខេត្តស្វាយរៀង ផ្ទះទុកចោល) នៅភូមិវាលធំ ឃុំត្រែងត្រយឹ ងស្រុកភ្នំស្រួច។
ប្រភពបន្តថា មុនប្រទះឃើញគាត់ទាំង២នាក់ប្តីប្រពន្ធនាំគ្នាដើររកបេះបន្លែយកទៅស្ល ពេលដល់ជិតបន្ទប់ទឹកក្នុងដីខាងលើ ស្រាប់តែធុំក្លិនស្អុយខុសពីធម្មតាគាត់ក៏នាំគ្នាដើរតាមរកក្លិននោះ ។ ពេលចូលទៅជិតដល់បន្ទប់ទឹកក្លិនកាន់តែស្អុយឡើងៗ ក៏បើកទ្វារបន្ទប់ទឹកនោះមើលធ្វើឱ្យពួកគាត់ភ័យលស់ព្រលឹងរត់មកក្រៅ រួចរាយការណ៍ទៅសមត្ថកិច្ចតែម្តង។ លុះនៅព្រឹកថ្ងៃទី៣០ សីហានេះ សមត្ថកិច្ចបានធ្វើការត្រួតពិនិត្យសពនារីរងគ្រោះ។
សូមបញ្ជាក់ថា សពនារីរងគ្រោះខាងលើត្រូវបានប្រទះឃើញនៅក្នុងបន្ទប់ទឹកខាងក្រោយផ្ទះរបស់ឈ្មោះ សំ ប៊ុនណ្ណារិទ្ធ អភិបាលរងខេត្តស្វាយរៀង ដែលជាផ្ទះទុកចោលមិនមានមនុស្សស្នាក់នៅឡើយ។ ហើយបច្ចុប្បន្ននេះ នៅមិនទាន់អាចបញ្ជាក់អំពីមូលហេតុនៃការស្លាប់របស់ជនរងគ្រោះបានឡើយ ដោយពេលនេះសមត្ថកិច្ចកំពុងធ្វើការត្រួតពិនិត្យ ។ នេះយោងតាមការបញ្ជាក់របស់លោកសម សាមួន ស្នងការនគរបាលខេត្តកំពង់ស្ពឺ៕
ចែករំលែកព័តមាននេះ