រាជធានីភ្នំពេញ ៖ ស្ត្រីម្នាក់ក្នុងចំណោមគ្នីគ្នា២នាក់បានជិះម៉ូតូចេញពីហូបអាហារជាមួយមិត្តភក្តិ ហើយគោលបំណងត្រឡប់ទៅផ្ទះវិញលុះធ្វើដំណើរដល់ពាក់កណ្តាលផ្លូវក៏ស្រាប់តែមានជនសង្ស័យម្នាក់បានជិះម៉ូតូមួយគ្រឿងបានឆក់យកកាបូបស្ពាយបានសម្រេច ហើយជិះម៉ូតូរត់គេចខ្លួនបាត់ ហេតុការណ៍នេះដែរកើតឡើងនៅវេលាម៉ោង៨និង២០នាទីយប់ ថ្ងៃទី២៩ ខែសីហា ឆ្នាំ២០១៨ ជិតនឹងស្ពានអាកាសស្ទឹងមានជ័យ តាមផ្លូវព្រះមុនីរ៉េត សង្កាត់បឹងសាឡាង ខណ្ឌទួលគោក ។
ជនរងគ្រោះដែលត្រូវបានចោរឆក់កាបូបមានឈ្មោះ ហេង ចិន្តា ភេទស្រី អាយុ៤៦ឆ្នាំ ស្នាក់នៅភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ចំណែកមិត្តភក្តិម្នាក់ទៀតដែលជាអ្នកឌុប គឺមិនបានឲ្យដឹងឈ្មោះឡើយ ។ សម្ភារដែលបាត់បង់មានលុយដុល្លារ១០០ជាងដុល្លារ លុយខ្មែរ២០ម៉ឺន ទូរស័ព្ទដៃចំនួន២គ្រឿង សៀវភៅធានាគារ១ក្បាល កាត ATM មួយសន្លឹក និងអត្តសញ្ញាណប័ណ្ឌមួយសន្លឹក ។
តាមសម្តីជនរងគ្រោះដែលជាម្ចាស់កាបូបបានឲ្យដឹងថា មុនពេលកើតហេតុរូបគាត់មានគ្នា២នាក់ ស្រីៗបានជិះម៉ូតូឌ្រីមសង់ ស៊េរីឆ្នាំ២០០៣ ពណ៌ខ្មៅ ពាក់ស្លាកលេខព្រះស៊ីហនុ 1A- 4788 ចេញពីហូបអាហារជាមិត្តភក្តិមួយចំនួនទៀតនៅម្តុំផ្សារបឹងកេងកង ហើយគោលបំណងត្រឡប់ទៅផ្ទះវិញនៅម្តុំភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ដោយធ្វើដំណើរតាមផ្លូវព្រះមុនីរ៉េត ក្នុងទិសដៅពីកើតទៅលិច លុះមកដល់ចំណុចកើតហេតុក៏ស្រាប់តែបុរសដែលជាជនសង្ស័យម្នាក់បានជិះម៉ូតូម៉ាក់ឌ្រីមសង់ ពណ៌ខ្មៅមួយគ្រឿង មិនចាំស្លាកលេខបានមកធ្វើសកម្មភាពឆក់យកកាបូបស្ពាយរបស់គាត់ដែលដាក់អោបនៅប្រឡោះកណ្តាលបានសម្រេច ហើយជនសង្ស័យរូបនោះបានបន្ថែមល្បឿនម៉ូតូរត់គេចខ្លួនឡើងទៅផ្លូវ២៧១បាត់ស្រមោលតែម្តង ។
ប្រភពបានឲ្យដឹងថា បន្ទាប់ពីជនសង្ស័យឆក់យកកាបូបបានសម្រេចហើយ រូបគាត់ជាជនរងគ្រោះបានទៅដាក់ពាក្យបណ្តឹងនៅប៉ុស្តិនគរបាលបឹងសាឡាងសុំឲ្យជួយអន្តរាគមន៍តែពេលទៅដល់សមត្ថកិច្ចប៉ុស្តិ៍នគរបាលបឹងសាឡាងបាននាំគាត់មកចង្អុលបង្ហាញកន្លែងកើតហេតុ ព្រោះខ្លាចមិនមែនទឹកដីរបស់ខ្លួន តែពេលទៅដល់កន្លែងកើតហេតុឃើញថា ហេតុការណ៍នេះ បានកើតឡើងនៅនៅទឹកដីរបស់ខ្លួនពិតប្រាកដមែនក៏បាននាំរូបគាត់ជាជនរងគ្រោះយកទៅសាកសួរ និងដាក់ពាក្យបណ្តឹងនៅប៉ុស្តិ៍នគរបាលបឹងសាឡាងវិញ ៕
ចែករំលែកព័តមាននេះ