រាជធានីភ្នំពេញ ៖ កញ្ញា មុន្នី ពិសី ក្នុងវ័យ២០ឆ្នាំ ដោយសារតែមាននិស្ស័យស្រលាញ់សិល្បៈសម្ដែងតាំងពីកំណើតមកបានបណ្ដែតជីវិតចូលប្រឡូកក្នុងពិភពសិល្បៈនេះតាំងពីឆ្នាំ២០០៧មក ។ កន្លងមកក្រៅពីចូលរួមសម្ដែងកាយវិការខារ៉ាអូខេ នាងធ្លាប់ចូលរួមសម្ដែងក្នុងខ្សែភាពយន្ដបានមួយរឿងគឺរឿង “អព្ភូតហេតុមឈូសកែវ” ដោយអ្នកដឹកនាំរឿងតម្រូវឱ្យនាងសម្ដែងជាតួម្ដាយរបស់តួអង្គប្រុស ។ ចំពោះការសំដែងកាយវិការខារ៉ាអូខេ នាងត្រូវបានផលិតកម្មក្រៅប្រទេស និងក្នុងប្រទេសមួយចំនួនហៅឱ្យចូលរួមសម្ដែងជាបន្ដបន្ទាប់ ជាពិសេសថ្មីៗនេះនាងបានចូលរួមសម្ដែងកាយវិការខារ៉ាអូខេសំរាប់ចេញលក់ថ្ងៃបុណ្យចូលឆ្នាំប្រពៃណីជាតិឱ្យផលិតកម្មសាន់ដេ។
ថ្មីៗនេះមានស្ថានីយទូរទស្សន៍មួយចង់ឱ្យនាងឡើងច្រៀងជាកិត្ដិយសនៅលើឆាកប្រគំតន្ដ្រីចុងសបា្ដហ៍ដែរ ប៉ុន្ដែដោយសារតែនាងជាតារាសម្ដែងមិនចេះច្រៀង ដូច្នេះនាងបានបដិសេធមិនទទួលទេ ។ ទោះជាងយ៉ាងណាក្ដី នាងតាំងចិត្ដខិតខំប្រឹងប្រែងហាត់រៀនច្រៀង ហើយនៅពេលចេះច្រៀងហើយនោះនាងនឹងឡើងច្រៀងជាកិត្ដិយសតាមកម្មវិធីប្រគំតន្ដ្រីរបស់ស្ថានីយទូរទស្សន៍មិនខាន ។
ពិសីនិយាយថា ដើម្បីមានឈ្មោះល្បីក្នុងពិភពសិល្បៈសម្ដែង ទោះបីអ្នកដឹកនាំរឿងតម្រូវឱ្យនាងសម្ដែងជាតួអង្គអ្វីក៏សម្ដែងដែរ មិនថាជាតួឯក ឬតួរង តួម្ដាយ ឬតួកាចឆ្នាសឆ្នើម ឬតួអង្គឆ្កួតនោះទេ គឺឱ្យតែគេផ្ដល់ឱកាសនាងសម្ដែងជូនទាំងអស់ ។ ទោះបីជាបែបណាក្ដី នាងមិនចង់មានរឿងស្នេហាអាស្រូវចូលមកពាក់ព័ន្ធក្នុងអាជីពសិល្បៈទេ ។ ពេលនេះនាងតាំងចិត្ដថា នឹងរកឱកាសហាត់រៀនច្រៀងដើម្បីចាប់អាជីពនេះផងដែរ ។
កញ្ញាមុន្នី ពិសី មានស្រុកកំណើតនៅភូមិ ព្រែកតាតន់ ឃុំព្រែកព្រះស្ដេច ស្រុកបាត់ដំបង ខេត្ដបាត់ដំបង ។ ឪពុករបស់នាងឈ្មោះ ទេព មុន្នី ម្ដាយឈ្មោះយ៉ាង លឿត ។ នាងមានបងប្អូន៤នាក់ក្នុងនោះស្រី២នាក់ ចំណែកនាងជាកូនទី២ នៅថ្ងៃអនាគតនាងមានបំណងចង់បើកហាងលក់សំលៀកបំពាក់ទាន់សម័យ និងចង់ក្លាយជាតារាភាពយន្ដ និងតារាចំរៀងមានកេរ្ដ្ដិ៍ឈ្មោះល្បី ៕
ចែករំលែកព័តមាននេះ