រាជធានីភ្នំពេញ ៖ ស្ត្រីម្នាក់បានសុំឱ្យនគរបាលជួយនាំខ្លួនប្ដីនាង ទៅសាកសួរនិងអប់រំនិងឱ្យធ្វើកិច្ចសន្យា ដោយនាងអះអាងថា ចាប់តាំងពីពេលរៀបការរួច រហូតមកទល់ពេលនេះ ប្ដីនាងមិនបានរកស៊ីចញ្ចឹមនាងទេ ។
ផ្ទុយទៅវិញ ថែមទាំងបានប្រើហិង្សាវាយធ្វើបាបនាងជាបន្តបន្ទាប់ ហើយនៅថ្ងៃចុងក្រោយនេះ ប្រុងអារ.កសម្លាប់នាងថែមទៀត ។ ប៉ុន្តែក្រោយមក ដោយសារគិតពីមនោសញ្ចេតនារបស់ប្ដី ទើបនាងសុំត្រឹមឱ្យនគរបាលជួយអប់រំណែនាំទៅវិញ ។
ហេតុការណ៍នេះ បានកើតឡើងកាលពីវេលាម៉ោង០៦ព្រឹកថ្ងៃទី៣០ សីហា នេះ ស្ថិតនៅក្នុងបន្ទប់លេខ៤២ ផ្ទះជួលមួយកន្លែង ក្នុងភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
ប្រភពឱ្យដឹងថា ស្ត្រីជាប្រពន្ធឈ្នោះ ប៊ូ ហុង អាយុ២២ឆ្នាំ ជាកម្មការិនីរោងចក្រកាត់ដេរ ស្នាក់នៅបន្ទប់ជួលដែលជាកន្លែងកើតហេតុខាងលើ ។ រីឯប្ដីឈ្មោះ ឆៃ ចន្តា អាយុ២៣ឆ្នាំ គ្មានមុខរបរ គឺនៅតែផ្ទះឱ្យនាងរកស៊ីចិញ្ចឹម មានស្រុកកំណើតនៅក្នុងភូមិចំការលើ ឃុំស្វាយទាប ស្រុកចំការលើ ខេត្តកំពង់ចាម ។ រូបនាងនិងប្ដីបានរៀបការជាមួយគ្នា៤ឆ្នាំកន្លងមកហើយ ហើយបង្កើតបានកូនស្រីតូចម្នាក់ ។
ស្ត្រីរូបនោះបាននិយាយបន្តទៀតថា ចាប់តាំងពីរៀបការរួចរយៈពេល៤ឆ្នាំនេះនាងគ្មានសេចក្ដីសប្បាយរីករាយម្ដងណាឡើយគឺស្គាល់តែភាពគ្រាំគ្រាចិត្តរហូតមកដោយសារតែលោកប្ដីរូបនេះធ្វើបាបទាំងផ្លូវចិត្តនិងផ្លូវកាយ។ដោយមិនគិតការងាររកស៊ីទេនៅតែផ្ទះ ហើយនាងជាអ្នកចេញធ្វើការរោងចក្រកាត់ដេររកប្រាក់ដើម្បីផ្គត់ផ្គង់គ្រួសារទៅវិញ មិនតែប៉ុណ្ណោះលោកប្ដីបានវាយដំរូបនាងជាបន្តបន្ទាប់ស្ទើររាល់ថ្ងៃថែមទៀត។
ប្រភពខាងលើបានបន្តថា ដោយឡែក នៅមុនពេលកើតហេតុ ម៉ោងប្រមាណ០៦ព្រឹក ខណៈនាងកំពុងតែដេកនៅក្នុងបន្ទប់ជាមួយប្តីខាងលើ រួមជាមួយនិងកូនស្រីតូចម្នាក់ទៀតនោះ បានមមើរ ហើយបានវាយនាង១ដៃចំខ្នង ធ្វើឱ្យនាងភ្ញាក់ពីដំណេក ។ ហើយដោយសារងឿងឆ្ងល់នាងសួរថា «ហេតុអ្វីបានវាយខ្ញុំ?»។
ភ្លាមៗនោះ លោកប្ដីមិនបានឆ្លើយតបទេ ស្រាប់តែប្តីស្ទុះក្រោក រត់វឹងទៅយកកាំបិត ចែត១ និងកាំបិតបុ័ងតោ១ គំរាមអារ.កនាងចោល និងនិយាយថា«អញឱ្យនាងឯងងាប់ពេលណា ងាប់ពេលហ្នឹង» ។
ដោយសារតែមានការភិតភ័យខ្លាំងពេក ម្យ៉ាងនៅក្នុងបន្ទប់មានទាំងកូនតូចៀង ខ្លាចប្ដីសម្លាប់នោះ ទើបនាងរៀបប្រាប់អ្នកជិតខាងឱ្យជួយរាយការណ៍ដល់នគរបាលចុះទៅឃាត់ខ្លួនប្ដី និងដកហូតយកវត្ថុតាង គឺកាំបិតទៅកាន់ប៉ុស្តិ៍នគរបាលរដ្ឋបាលចោមចៅ២ ដើម្បីសួរនាំតែម្តង ។
ចែករំលែកព័តមាននេះ