ខេត្តព្រៃវែង ៖ បុរសម្នាក់ត្រូវបានគូទំនាស់នៅក្នុងវង់ផឹកស្ទាក់ចាក់មួយកាំបិតបណ្តាលអោយស្លាប់បាត់បង់ជីវិតនៅពេលកំពុងជិះម៉ូតូត្រឡប់ទៅផ្ទះ ។ ហេតុការណ៍នេះបានកើតឡើងកាលពីវេលាម៉ោង៣និង៥០នាទីរសៀល ថ្ងៃទី២៩ សីហា នៅចំណុចផ្លូវលំមួយកន្លែងដែលស្ថិតក្នុងភូមិត្រពាំងឈូក ឃុំរំចេក ស្រុកព្រះស្តេច…
ខេត្តព្រៃវែង ៖ បុរសម្នាក់ត្រូវបានគូទំនាស់នៅក្នុងវង់ផឹកស្ទាក់ចាក់មួយកាំបិតបណ្តាលអោយស្លាប់បាត់បង់ជីវិតនៅពេលកំពុងជិះម៉ូតូត្រឡប់ទៅផ្ទះ ។ ហេតុការណ៍នេះបានកើតឡើងកាលពីវេលាម៉ោង៣និង៥០នាទីរសៀល ថ្ងៃទី២៩ សីហា នៅចំណុចផ្លូវលំមួយកន្លែងដែលស្ថិតក្នុងភូមិត្រពាំងឈូក ឃុំរំចេក ស្រុកព្រះស្តេច ខេត្តព្រៃវែង ។
ជនរងគ្រោះក្នុងហេតុការណ៌នេះឈ្មោះ ទូច ពេជ្រ អាយុ៣៥ឆ្នាំ មានទីលំនៅក្បែកន្លែងកើតហេតុខាងលើត្រូវបានជនល្មើសចាក់មួយកាំបិតចំដើមទ្រូងផ្នែកខាងឆ្វេងបណ្តាលអោយស្លាប់បាត់បង់ជីវិតភ្លាមៗនៅហ្នឹងកន្លែងកើតហេតុ ។ ចំណែកជនល្មើសមានឈ្មោះ ផៃ ឆាយ ភេទប្រុស អាយុ៣៧ឆ្នាំ ត្រូវសមត្ថកិច្ចឃាត់ខ្លួនបានភ្លាមៗបន្ទាប់ពីកើតហេតុ ។
ប្រភពព័ត៌មានពីសមត្ថកិច្ចបានអោយដឹងថា នៅមុនពេលមានការចាក់សម្លាប់គ្នានេះជនរងគ្រោះ និងជនល្មើសបានទៅផឹកស៊ីជាមួយគ្នានៅផ្ទះលក់ស៊ុបមួយកន្លែងហើយម្ចាស់ផ្ទះក៏ផឹកជាមួយដែរគឺផឹកគ្នា៣នាក់ ។
ប្រភពដដែលនេះបានបន្តថា ក្រោយពេលផឹកស៊ីស្រវឹងទាំងអស់គ្នាហើយនោះ ស្រាប់តែជនរងគ្រោះ និងជនល្មើសទាស់សម្តីគ្នារហូតកើតជាហិង្សាប្រតាយប្រតប់គ្នាតែភ្លាមនោះម្ចាស់ផ្ទះបានជួយចាប់ឃាត់ និងបំបែកអ្នកទាំង២ចេញពីគ្នាហើយក៏បែកផ្លូវទៅផ្ទះរៀងៗខ្លួន ដោយជនល្មើសបានដើរចេញទៅមុនមួយសន្ទុះក្រោយមកទើបជនរងគ្រោះឡើងជិះម៉ូតូពីក្រោយបងថ្លៃស្រីឈ្មោះ ស៊ុ រតនៈ ត្រឡប់ទៅផ្ទះវិញ ។
លុះពេលមកដល់ចំណុចកើតហេតុដែលជាផ្លូវបត់ចូលផ្ទះជនរងគ្រោះ ស្រាប់តែជនល្មើសស្ទុះចេញមកពីក្រោយទាញជនរងគ្រោះទម្លាក់ពីលើម៉ូតូរួចយកកូនកាំបិតចិតបន្លែចាក់ជនរងគ្រោះមួយកាំបិតចំដើមទ្រូងផ្នែកខាងឆ្វេង បណ្តាលអោយជនរងគ្រោះប្រកាច់រហូតស្លាប់បាត់បង់ជីវិតភ្លាមៗនៅហ្នឹងកន្លែងកើតហេតុធ្វើអោយមានការផ្អើលឆោឡោឡើងដឹងដល់សមត្ថកិច្ចចុះមកចាប់ឃាត់ខ្លួនជនល្មើសនាំយកទៅកាន់ប៉ុស្តិ៍រដ្ឋបាលឃុំរំចេកភ្លាមៗផងដែរ ៕
ចែករំលែកព័តមាននេះ