រាជធានីភ្នំពេញ ៖ កម្មការិនីរោងចក្រម្នាក់ បានត្រូវប្រុសព្រានលួងលោមសុំស្នេហ៍តាមហ្វេសប៊ុក ហើយទាក់ទងសុំស្គាល់ផ្ទះជួលស្នាក់នៅបានតែមួយយប់ ព្រឹកឡើងឆបោកយកទូរស័ព្ទទៅបាត់កាលពីជាងមួយអាទិត្យមុន ។ ដោយខឹងពេកក៏ប្តឹងសមត្ថកិច្ចឱ្យឃាត់ខ្លួនបាន កាលពីវេលាម៉ោង៨យប់ថ្ងៃទី២៨ ខែសីហា នៅរង្វង់មូលចោមចៅ ស្ថិតក្នុងសង្កាត់ចោមចៅ៣ ខណ្ឌពោធិ៍សែនជ័យ ។
ជនសង្ស័យជាប្រុសព្រាននេះឈ្មោះ បូ រ៉ាវី អាយុ២១ឆ្នាំ មុខរបរមិនពិតប្រាកដ ស្នាក់នៅក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅក្នុងសង្កាត់ទួលសង្កែ ខណ្ឌឫស្សីកែវ ។ចំណែកនារីរងគ្រោះឈ្មោះ យួន បូរាណ អាយុ២០ឆ្នាំ ស្នាក់នៅបន្ទប់ជួលក្នុងភូមិព្រៃព្រីងខាងជើងសង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅភូមិទួលរកា ឃុំជាងទង ស្រុកត្រាំកក់ ខេត្តតាកែវ ។
ទូរស័ព្ទដែលប្រុសស្នេហ៍ហេងស៊យឆបោកយកទៅនោះម៉ាកអាយហ្វូន៥ កញ្ចក់ខ្មៅ ទើបនឹងទិញតម្លៃ៩០ដុល្លារ ។ កម្មការិនីរូបនេះបាននិយាយប្រាប់អ្នកយកព័ត៌មានថា កាលពីថ្ងៃទី១៩ ខែសីហាកន្លងមកនេះ វេលាម៉ោង៣រសៀល នាងបានទាក់ទងគ្នាតាមហ្វេសប៊ុករាប់គ្នាជាគូស្នេហ៍ ហើយបុរសរូបនេះបានសុំស្គាល់ផ្ទះជួល នាងក៏ឲ្យមកលេងដល់បន្ទប់ជួលរបស់នាង ដែលជួលរួមគ្នាជាមួយមិត្តភក្តិស្រីស្នាក់នៅចំនួន៥នាក់ ។ ខណៈមកលេងដល់បន្ទប់ជួលរបស់នាង ក៏បានហូបបាយជុំគ្នាជាមួយមិត្តភក្ដិរបស់នាងនៅវេលាល្ងាច ហើយបុរសនេះបានសុំនាងស្នាក់នៅក្នុងបន្ទប់ជួលខាងលើជាមួយគ្នាមួយយប់ ។
លុះព្រឹកឡើងថ្ងៃទី២០ ខែសីហា នាងចេញទៅធ្វើការ ហើយប្រុសព្រានស្នេហ៍ខាងលើបានខ្ចីទូរស័ព្ទនាងមើលលេង ។ ដោយសារនឹកថាជាប្រុសស្នេហ៍ទៅហើយ នាងក៏ឱ្យទូរស័ព្ទយកទៅមើលលេងចុះ ។ ចំណែកជនឆបោកជាប្រុសស្នេហ៍នោះ បានសុំសម្រាកបន្តទៀតហើយប្រាប់នាងថា ពេលចេញពីធ្វើការទិញម្ហូបឱ្យហូបផង ហើយនាងក៏ទៅធ្វើការបាត់ទៅ ។
ប្រភពដដែលបន្តទៀតថា លុះនាងចេញពីធ្វើការវិញបានទិញម្ហូបតាមបណ្តាំយកមកហូបជុំគ្នា ។ លុះមកដល់បន្ទប់ ប្រុសស្នេហ៍រូបនេះបានចាក់សោទ្វារបន្ទប់ ហើយយកទូរស័ព្ទរបស់នាងព្រមទាំងឆ្នាំងសាកទៅបាត់ ។ នាងបានទូរស័ព្ទទាក់ទងសុំយកទូរស័ព្ទវិញ តែជននេះមិនត្រឹមតែមិនឱ្យទូរស័ព្ទវិញទេ ថែមទាំងបិទលេខទូរស័ព្ទនាងចោល មិនអាចទាក់ទងចូលទៀត ។
នាងនិយាយថា មុនពេលត្រូវចាប់ខ្លួននេះ នាងបានប្រើល្បិចដោយខ្ចីទូរស័ព្ទមិត្តស្រីម្នាក់ទាក់ទងទៅប្រុសស្នេហ៍ហេងស៊យរូបនេះ ដោយទាក់ទងគ្នាដូចគ្រាដំបូងព្រមទាំងប្រើល្បិចបន្លំជានារីផ្សេងនិយាយផ្អែម ហើយចង់ស្គាល់គ្នាដោយណាត់ជួបនៅរង្វង់មូលចោមចៅ ។ ពេលព្រមព្រៀងគ្នាហើយនោះ នាងលបមើលឃើញជនឆបោកមកដល់រង្វង់មូលចោមចៅតាមការណាត់មែន ក៏បានប្ដឹងទៅសមត្ថកិច្ចឱ្យឃាត់ខ្លួននាំយកទៅប៉ុស្តិ៍ដើម្បីសាកសួរ ។
ជនសង្ស័យសារភាពថា ខ្លួនពិតជាបានលួចទូរស័ព្ទរបស់នាងមែន និងយកទៅលក់ឱ្យបងប្រុសរបស់ខ្លួនបាន២៥ដុល្លារ ។ ចំណែកនារីរងគ្រោះមិនដាក់ពាក្យបណ្ដឹងទេ គ្រាន់តែសុំឱ្យសមត្ថកិច្ចធ្វើការអប់រំនិងហៅបងរបស់ជនរូបនេះយកទូរស័ព្ទឱ្យនាងវិញ ហើយឱ្យបងជាអ្នកធានាប្អូនរបស់ខ្លួននិងឱ្យត្រឡប់ទៅវិញ ។
នាងនិយាយប្រាប់កោះសន្តិភាពទៀតថា រីឯនិស្ស័យស្នេហ៍ដែលឆេះដូចភ្លើងចំបើងនោះ សូមឲ្យចប់គ្នាត្រឹមនេះចុះ ៕
ចែករំលែកព័តមាននេះ