រាជធានីភ្នំពេញ ៖ សពថៅកែអតីតសណ្ឋាគារ ឆាយ ហុង ដែលមានឈ្មោះ ល្បីបានធ្លាក់ទឹកលិចបាត់រយៈពេល៤ថ្ងៃមកហើយនោះ បានអណ្តែតហើយ កាលពីវេលាម៉ោង៦និ៣០នាទីព្រឹកថ្ងៃទី៣០ ខែសីហា ឆ្នាំ២០១៨ នៅចំណុចភូមិល្វា សង្កាត់កោះដាច់ ខណ្ឌជ្រោយចង្វារ គឺនៅកន្លែងដែលជិះម៉ូតូទឹកក្រឡាប់នោះតែម្តង ។
សពលោក ហុក ប៊ុន ហ៊ុយ ហៅតាហ៊ុយ ភេទប្រុស អាយុប្រមាណ៤៧ឆ្នាំ ជាថៅកែអតីតសណ្ឋាគារឆាយហុង និងបច្ចុប្បន្នជាថៅកែហាងគុយទាវមួយកន្លែង នៅក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វារបានជួបគ្រោះថ្នាក់តាំងពីថ្ងៃទី២៦ ខែសីហានេះនៅចំណុចដងទន្លេមេគង្គក្នុងភូមិល្វា សង្កាត់កោះដាច់ ខណ្ឌជ្រោយចង្វារ ខណៈពេលដែលបើកម៉ូតូទឹក ដែលទិញថ្មីលំហែរកាយតាមដងទន្លេមេគង្គ ។
តាមនគរបាលបានឲ្យដឹងថា នៅវេលាល្ងាចថ្ងៃអាទិត្យថៅកែអតីតសណ្ឋាគាររូបនោះ បានបើកម៉ូតូទឹក ខ្លះហៅថា អូប៊័រ ដែលទើបតែទិញក្នុងតម្លៃជិត២ម៉ឺនដុល្លារ លំហែរកាយតាមដងទន្លេ ។ មិនដឹងជាមូលហេតុអ្វីនោះទេ នៅពេលបើកបរនោះក៏បានក្រឡាប់ធ្លាក់ទឹកលិចបាត់ ហើយម៉ូតូទឹកក៏បានអណ្តែតតាមទឹកចូលខាង ហើយនគរបាលក៏បានរក្សាទុក ។
ក្រោយមកមានការភ្ញាក់ផ្អើលដល់ក្រុមគ្រួសារបាននាំគ្នាជួលទូកជួយរកអស់រយៈពេល៤ថ្ងៃ រកពុំឃើញ ស្រាប់តែមកដល់ថ្ងៃនេះឃើញសពបានអណ្តែតឡើងនៅកន្លែងដែលគ្រោះថ្នាក់នោះ ។ សពត្រូវបានក្រុមគ្រួសារនាំយកទៅធ្វើតាមប្រពៃណីនៅវត្តបាក់ខែង ៕
ចែករំលែកព័តមាននេះ