ចោរជនជាតិចិន គាស់ទ្វាររថយន្តលួចកាបូបលុយម្ចាស់រថយន្តខ្មែរ
- ព្រះសីហនុ
ខេត្តព្រះសីហនុ ៖ សេចក្តីរាយការណ៍បឋមបានឲ្យដឹថា កាលពីវេលាម៉ោង១០ និង៤៥នាទីយប់ ថ្ងៃទី២៨ សីហា នៅចំណុចភូមិ២ សង្កាត់៤ ក្រុង.ខេត្តព្រះសីហនុ…
ខេត្តព្រះសីហនុ ៖ សេចក្តីរាយការណ៍បឋមបានឲ្យដឹថា កាលពីវេលាម៉ោង១០ និង៤៥នាទីយប់ ថ្ងៃទី២៨ សីហា នៅចំណុចភូមិ២ សង្កាត់៤ ក្រុង.ខេត្តព្រះសីហនុ មានករណីចោរលួចគាស់ទ្វាររថយន្ត លួចយកកាបូបប្រាក់ មួយកើតឡើង ដែលជនសង្ស័យជាជនជាតិចិនម្នាក់ មិនស្គាល់អត្តសញ្ញាណ។ ជនរងគ្រោះឈ្មោះ រុន រដ្ឋា ភេទប្រុស អាយុ៣០ឆ្នាំ មុខរបរអាជីវករ ទីលំនៅភូមិ៥ សង្កាត់៤ ក្រុង.ខេត្តព្រះសីហនុ។
សេចក្តីរាយការណ៍បន្តថា នៅវេលាម៉ោងខាងលើ ជនរងគ្រោះចតរថយន្តទុកចោលនៅលើផ្លូវ ហើយទៅញ៉ាំបង្អែមនៅក្បែរនោះ មិនយូរប៉ុន្មាន ស្រាប់តែមានជនសង្ស័យ បានទៅគាស់ទ្វាររថយន្តរបស់ជនរងគ្រោះ ហើយចូលទៅក្នុងរថយន្តលួចយកលុយ។ ខណៈពេលជនសង្ស័យកំពុងធ្វើសកម្មភាពនោះ ជនរងគ្រោះបានក្រឡេកឃើញទាន់ ហើយក៏បានរត់សំដៅទៅ រថយន្ត ដើម្បីចាប់ខ្លួនជនសង្ស័យ តែពេលនោះជនសង្ស័យ ក៏បានចុះពីរថយន្ត និងរត់គេចខ្លួន។ ដោយមានហេតុការណ៍ចោរគាស់ទ្វាររថយន្តបម្រុង លួចយកសម្ភារលុយកាក់យ៉ាងដូច្នោះ ជនរងគ្រោះបានទៅដាក់ ពាក្យបណ្តឹងដល់សមត្ថកិច្ច។
សមត្ថកិច្ចបន្ទាប់ពីទទួលបានបណ្តឹងរបស់ជនរងគ្រោះ ក៏បានប្រើប្រាស់កម្លាំង ជំនាញផែននគរបាលព្រហ្មទណ្ឌ សហការណ៍ជាមួយកម្លាំងអធិការដ្ឋាននគរបាលក្រុង ធ្វើការស្រាវជ្រាវ និង ស៊ើបអង្កេតយ៉ាងយកចិត្តទុកដាក់ រហូតចាប់បានជនសង្ស័យ និងបក្ខពួកម្នាក់សុទ្ធតែជនជាតិចិន។ ជនសង្ស័យម្នាក់ឈ្មោះ XU MENG JIE ភេទប្រុស អាយុ២៦ឆ្នាំ ជនជាតិចិន មុខរបរមិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ (ជនដៃដល់)។ និងម្នាក់ទៀតឈ្មោះ CHEN WEI JIAN ភេទប្រុស អាយុ២៨ឆ្នាំ ជនជាតិចិន មុខរបរអ្នកដូរលុយតាមទូរស័ព្ទដៃ លិខិតឆ្លងដែនលេខៈ EC៩០៧៤៦០១ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ (បក្ខពួក)។
ក្នុងនោះសមត្ថកិច្ចចាប់យកវត្ថុតាង កាបូបយួរដៃ១ ពណ៌សូកូឡា,ទូរស័ព្ទដៃ២គ្រឿង (ម៉ាក IPHONE X ពណ៌ខ្មៅ និងម៉ាក NOKAI ពណ៌ស)។ ក្រោយពីឃាត់ខ្លួនជនសង្ស័យត្រូវបានសមត្ថកិច្ចធ្វើការសាកសួរ ពួកគេបានសារភាពថា កន្លងមកពួកគេធ្លាប់បាន ធ្វើសកម្មភាពគាស់ទ្វាររថយន្តលួចយកសម្ភារលុយកាក់ ចំនួន៣លើកមកហើយ។ លើកទី១នៅថ្ងៃទី ២០ ខែឧសភា ឆ្នាំ២០១៨ នៅចំណុចភូមិ២ សង្កាត់៤ ក្រុង-ខេត្តព្រះសីហនុ បានកាបូប១ មានលុយចំនួន ៣៩,០០០ដុលារអាមេរិក (បីម៉ឺនប្រាំបួនពាន់ដុល្លារ)។
លើកទី២ នៅថ្ងៃទី២៧ ខែសីហា ឆ្នាំ២០១៨ នៅមុខក្រុមហ៊ុន L.G ភូមិ២ សង្កាត់៤ ក្រុង-ខេត្តព្រះសីហនុ លួចបានកាបូប១ មានលុយជាង ១,០០០ដុល្លារអាមេរិក ( មួយពាន់ដុល្លារ)។ លើកទី៣ នៅថ្ងៃទី២៨ ខែសីហា ឆ្នាំ២០១៨ នៅភូមិ២ សង្កាត់៤ ក្រុង-ខេត្តព្រះសីហនុ មិនបានសម្រេច ព្រោះក្នុងពេលធ្វើសកម្មភាពត្រូវម្ចាស់រថយន្តមកទាន់។ ជនសង្ស័យត្រូវបានសមត្ថកិច្ច កសាងសំណុំរឿងបញ្ជូនទៅសាលាដំបូងខេត្តព្រះសីហនុ តាមនីតិវិធី៕
ចែករំលែកព័តមាននេះ