ខេត្តកំពង់ឆ្នាំង ៖ ជុំវិញករណី លោករួន វិនថន ដែលគ្រប់គ្នាស្គាល់ថា ជាគ្រូសច្ចំនៅភ្នំកាច់ចង្កូតខេត្តពោធិ៍សាត់ បច្ចុប្បន្នរស់នៅភូមិក្បាលថ្នល់ ឃុំផ្សារ ស្រុកបរិបូណ៌ បានចាក់ដីធ្វើលំនៅឋាន បណ្ដាលឲ្យស្ទះផ្លូវ
ទឹកនិងធ្វើឲ្យប្រជាពលរដ្ឋចំនួន១៥គ្រួសាររងគ្រោះដោយផ្ទាល់ និងជាច្រើនគ្រួសារទៀតរងគ្រោះដោយប្រយោល ព្រោះតែលិចលង់ផ្ទះសម្បែង ស្រែ ស្រូវរបស់ពួកគាត់ ព្រោះគ្មានផ្លូវទឹកហូរចេញនោះ រហូត
មក ដល់ពេលនេះនៅតែមិនទាន់ដោះស្រាយចប់សព្វគ្រប់នៅឡើយទេ បើទោះបីជាមានការសម្រប សម្រួលមួយលើកជាពីរលើកយ៉ាងក្តីព្រោះតែ លោក រួន វិនថន មិនគោរពតាមកិច្ចសន្យា។
ជាក់ស្តែង កាលពីថ្ងៃទី២៧ សីហាកន្លងទៅនេះ ប្រជាពលរដ្ឋរងគ្រោះទាំង១៥គ្រួសារ បានដាក់ពាក្យប្តឹងជាថ្មីដល់សាលាឃុំផ្សារ ។ ពេលនោះ លោកមេឃុំ និងលោកអភិបាលស្រុកបរិបូរណ៌ បានចុះទៅពិនិត្យមើលស្ថានភាពទឹកនៅកន្លែងនោះជាថ្មីម្តងទៀត ឃើញថា ប្រជាពលរដ្ឋពិតជារងគ្រោះដោយសារទឹកលិចភូមិឋាន និងស្រែចម្ការរបស់ពួកគាត់មែន ។
បន្ទាប់មក ក៏បានរាយការណ៍និងសុំអន្តរាគមន៍ពីអាជ្ញាធរខេត្ត ទើបនៅព្រឹកថ្ងៃទី២៨ ខែសីហា គេសង្កេតឃើញមានសមត្ថកិច្ចចម្រុះរួមមាន កងរាជអាវុធហត្ថខេត្ត នគរបាលខេត្ត ដឹកនាំដោយលោក ប៉ុល វុទ្ធី ស្នងការរងនគរបាលខេត្ត និងអាជ្ញាធរភូមិ ឃុំ ស្រុក ចុះទៅសម្របសម្រួល ជាមួយនឹងលោក រួន វិនថន ជាថ្មីម្តងទៀត ។
ប៉ុន្តែពេលនោះសាមីខ្លួនជាម្ចាស់ដីភូមិឋានគឺលោក រួន វិនថន មិនបាននៅផ្ទះទេ គឺនៅតែតំណាងរបស់គាត់ប៉ុណ្ណោះ ហើយសមត្ថកិច្ចចម្រុះក្រោយពីពិនិត្យស្ថានភាពជាក់ស្តែងឃើញថាប្រជាពលរដ្ឋទាំង១៥គ្រួសារ បានរងគ្រោះដោយផ្ទាល់លិចលង់ភូមិឋាន និងជាច្រើនគ្រួសារទៀតរងគ្រោះដោយសារទឹកលិចស្រូវ លិច
ស្រែរបស់ពួកគាត់ប្រាកដមែន ។
នៅពេលនោះបានសម្រេចចិត្តសុំធ្វើការសម្របសម្រួលជាមួយតំណាងលោក រួន វិនថន ដោយសុំកាយប្រឡាយដើម្បីរំដោះទឹកចេញសិន ហើយនិងឲ្យលោក រួន វិនថន គោរពកិច្ចសន្យាដែលមានពីមុនមក នៅខែប្រាំងខាងមុខនេះ គឺត្រូវតែដាក់ប្រព័ន្ធលូឲ្យបានត្រឹមត្រូវ ដើម្បីកុំឲ្យលិចលង់ដល់ប្រជាពលរដ្ឋទៀត ។
ប្រជាពលរដ្ឋរងគ្រោះបានសម្ដែងនូវក្តីរីករាយ ប៉ុន្តែក៏នៅតែមានក្តីព្រួយបារម្ភខ្លាំងណាស់ដែរ បើសិនជាលោក រួន វិនថន នៅតែមិនគោរពកិច្ចសន្យាដូចមុនមួយលើកជាពីរលើកកន្លងមកនេះ ។ លោក គង់ ប៊ុនថេត ដែលជាគ្រូបង្រៀននិងជាជនរងគ្រោះម្នាក់ក្នុងចំណោមទាំង១៥ គ្រួសារ និយាយថា ថ្ងៃនេះថ្វីដ្បិតតែសមត្ថកិច្ចចម្រុះបានដោះស្រាយឲ្យមានការបើកប្រព័ន្ធប្រឡាយបង្ហូរទឹកយ៉ាងណាក្តី ក៏ប៉ុន្តែបើ លោក រួន
វិនថន នៅតែមិនគោរពតាមកិច្ចសន្យាទេនោះ ពួកគាត់នឹងត្រូវជួបការលំបាកដដែលជាដដែលទេ ។
ទោះជាយ៉ាងនេះក្តី ពួកគាត់ជាជនរងគ្រោះ សូមថ្លែងអំណរគុណដល់អាជ្ញាធរខេត្ត សមត្ថកិច្ចចម្រុះ និងអាជ្ញាធរមូលដ្ឋាន ដែលបានជួយសម្របសម្រួលក្នុងការងារនេះ ហើយយ៉ាងហោចណាស់ក៏ពួកគាត់បានសុខស្រួលមួយគ្រាដែរ ។
សូមបញ្ជាក់ថា បន្ទាប់ពីមានការជីកប្រឡាយដែលមានមុខកាត់ប្រមាណជាងកន្លះម៉ែត្រ និងជម្រៅជាងកន្លះម៉ែត្ររួចមក ទឹកបានសម្រុកហូរយ៉ាងខ្លាំង ហើយសង្ឃឹមថាតែមួយយប់ទេ ទឹកនឹងហូរអស់ជាមិនខាន បើសិនជាគ្មានឧបសគ្គមករារាំងទេ ៕
ចែករំលែកព័តមាននេះ