រាជធានីភ្នំពេញ ៖ នៅលើសង្វៀនប៉ុស្តិ៍លេខ៥ ក្រុមអ្នកទស្សនាកីឡាប្រដាល់កម្ពុជា នឹងបានឃើញការប្រកួតប្រយុទ្ធគុនជាទៀងទាត់ ដូចគ្នានឹងការប្រកួតប្រដាល់ក្បាច់គុនបុរាណខ្មែរ ដោយតំណាងជាន់ខ្ពស់ប្រចាំស្ថាប័ននេះ បានបញ្ជាក់ថា នឹងតម្រូវឱ្យមានការប្រកួតខមរហូតដល់២ទៅ៣គូ នៅជារៀងរាល់ថ្ងៃអាទិត្យ និងក្នុងពេលមានការប្រកួតប្រដាល់អន្តរជាតិរបស់ខ្លួនទៀតផង ។ ប៉ុន្តែឆ្លើយតបនឹងការលើកតម្កើងនេះប្រធានសមាគមយុទ្ធគុនខម បែរសម្តែងអារម្មណ៍ភ័យព្រួយទៅវិញ ។
លោកចាន់ ប៊ុនធឿន ព្រឹទ្ធាចារ្យប្រចាំសមាគមយុទ្ធគុនខម បានប្រាប់នៅសាលកីឡា Beeline Arena ឱ្យកោះសន្តិភាពដឹងថា លោកមានសេចក្តីរីករាយណាស់ដែលក្បាច់គុនខម ត្រូវបានប៉ុស្តិ៍លេខ៥ យកមកលើកស្ទួយឱ្យមានការទទួលស្គាល់ឡើងវិញ ។ លោកចាត់ទុកថា នេះជាឱកាសដ៏កម្រមួយក្នុងពេលការប្រកួតត្រូវធ្វើឡើងក្នុងម៉ោងផ្សាយបន្តផ្ទាល់ដែលមិនពិបាកធ្វើឱ្យមនុស្សរាប់ម៉ឺននាក់ ស្គាល់ និងចងចាំកីឡារបស់ខ្មែរមួយនេះ ។ ការលើកស្ទួយរបស់ប៉ុស្តិ៍លេខ៥ មិនត្រឹមតែធ្វើឱ្យកីឡាករខម មានទឹកចិត្ត ហើយងាកមកកាន់សាលាគុនជាថ្មីប៉ុណ្ណោះទេ ប៉ុន្តែក៏កំពុងធ្វើឱ្យអ្នកទទួលការបណ្តុះបណ្តាលទាំងអស់មានទឹកចិត្តក្នុងការអភិរក្ស ក្បាច់គុនខមផងដែរ ។ ជាក់ស្តែងគ្រាន់តែកីឡាករខម ចាប់ផ្តើមមានមុខឡើងរេញនៅប៉ុស្តិ៍លេខ៥ បានទាំងទាញឱ្យកីឡាករប្រដាល់មួយចំនួនងាកមកហ្វឹកហាត់ ដើម្បីទទួលនូវការចាប់អារម្មណ៍ទៀតផង ៕
ចែករំលែកព័តមាននេះ