រាជធានីភ្នំពេញ ៖ សាលាដំបូងរាជធានីភ្នំពេញ កាលពីថ្ងៃទី២៧ សីហា បានប្រកាសសាលក្រមផ្តន្ទាទោសជនជាតិរុស្សុី២នាក់ដាក់ពន្ធនាគារក្នុងម្នាក់ៗកំណត់៦ឆ្នាំ លើសំណុំរឿងគាស់ទូATM លួចយកប្រាក់របស់ធនាគារABA និងប្រើប្រាស់សារធាតុញៀន ។…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីថ្ងៃទី២៧ សីហា បានប្រកាសសាលក្រមផ្តន្ទាទោសជនជាតិរុស្សុី២នាក់ដាក់ពន្ធនាគារក្នុងម្នាក់ៗកំណត់៦ឆ្នាំ លើសំណុំរឿងគាស់ទូATM លួចយកប្រាក់របស់ធនាគារABA និងប្រើប្រាស់សារធាតុញៀន ។
សំណុំរឿងនេះ កាលពីព្រឹកថ្ងៃទី១៣ ខែសីហា សាលាដំបូងរាជធានីភ្នំពេញ បានបើកសវនាការជំនំុជម្រះទោសជនជាប់ចោទជាជនជាតិរុស្សុីទាំង២នាក់ ពីបទលួចមានស្ថានទម្ងន់ទោស (លួចប្រាក់តាមទូATM) យោងតាមមាត្រា៣៥៣ និង៣៥៧នៃក្រមព្រហ្មទណ្ឌ និងបទប្រើប្រាស់សារធាតុញៀន យោងតាមមាត្រា៤៥នៃច្បាប់ស្តីពីការត្រួតពិនិត្យគ្រឿងញៀនកម្ពុជា ។
ជនជាប់ចោទទាំង២នាក់នេះ ម្នាក់ឈ្មោះ Zametnya Alexander អាយុ៣១ឆ្នាំ និងម្នាក់ទៀតឈ្មោះ Telenkov Ivan អាយុ៣០ឆ្នាំ ។ អង្គសវនាការដឹកនាំដោយលោក ឃី ឆៃ ចៅក្រមជំនុំជម្រះ និងធ្វើឡើងចំពោះមុខជនត្រូវចោទ និងមេធាវីការពារក្តីផងដែរ ។ ជនត្រូវចោទទាំង២នាក់ បានឆ្លើយសារភាពប្រហាក់ប្រហែលគ្នាថា ខ្លួនមិនមានគំនិតលួចលុយក្នុងទូ ATM នោះទេ តែដោយសារខ្វះខាតលុយកាក់ធ្វើដំណើរទៅស្រុកវិញ ។
ពួកគេបានជួបមនុស្សម្នាក់និយាយប្រាប់ថា បើចង់បានប្រាក់ទៅស្រុកឱ្យពួកគេចូលទៅបើកទូ ATM ហើយថតរូបមកឱ្យគេ គេនឹងឱ្យលុយសមល្មមអាចចាយបាន ។ ដូច្នោះហើយទើបពួកគេទាំង២នាក់ ទៅធ្វើតាមបង្គាប់មនុស្សម្នាក់នោះ ហើយពាក់ព័ន្ធនឹងប្រើប្រាស់គ្រឿងញៀន ពួកគេក៏មិនបានប្រើដែរ ។
សវនាការបានសាកសួរដេញដោលចប់សព្វគ្រប់ លោកចៅក្រមដឹកនាំអង្គជំនុំជម្រះ បានលើកពេលប្រកាសសាលក្រមសំណុំរឿងនេះទៅថ្ងៃទី២៧ ខែសីហា ។ ជនត្រូវចោទ ត្រូវបានអនុរក្សពន្ធនាគារនាំទៅឃុំខ្លួនជាបណ្តោះអាសន្នវិញ ដោយរង់ចាំទទួលទោសតាមការវិនិច្ឆ័យរបស់តុលាការ ។
សូមរំឭកថា ជនត្រូវចោទទាំង២នាក់ ត្រូវបាននគរបាលខណ្ឌដូនពេញ ចាប់ឃាត់ខ្លួនកាលពីវេលាម៉ោង៣ទៀបភ្លឺថ្ងៃទី២ ខែធ្នូ ឆ្នាំ២០១៧បន្ទាប់ពីពួកគេធ្វើសកម្មភាពគាស់ទូ ATM របស់ធនាគារ ABA នៅមុខផ្ទះលេខ៣១ ផ្លូវលេខ២៤០ ភូមិ១១ សង្កាត់ជ័យជំនះ ខណ្ឌដូនពេញ ។
ជាមួយនឹងការឃាត់ខ្លួនជនសង្ស័យនេះ សមត្ថកិច្ចចាប់យកវត្ថុតាងរួមមាន ខ្សែអេឡិចត្រូនិកប្រើឌុយ
USBមួយ កូនកាំបិតចុចមួយ លិខិតឆ្លងដែនមួយលេខ៧២៤៥៨៤០១៦ ម៉ូតូ១គ្រឿងម៉ាកអ៊ែរប្ល៊េដ
ពណ៌ទឹកមាស ពាក់ផ្លាកលេខ ព្រៃវែង១I-៤៥០៥ សក់ពាក់១ដុំ និងទូរស័ព្ទដៃ៣គ្រឿង ៕
ចែករំលែកព័តមាននេះ