ខេត្តបន្ទាយមានជ័យ ៖ កម្លាំងកងរាជអាវុធហត្ថបានឃាត់ខ្លួនជនសង្ស័យម្នាក់ជួញដូរគ្រឿងញៀនប្រភេទមេតំហ្វេតាមីន ហៅយ៉ាម៉ាចំនួន១.០០៧គ្រាប់ នៅជាប់ជាយដែនកម្ពុជា-ថៃត្រូវបានបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី២៩ ខែសីហា ឆ្នាំ២០១៨។
ជនសង្ស័យដែលត្រូវឃាត់ខ្លួនខាងលើឈ្មោះ ជឹម ជឿន ភេទប្រុស អាយុ៤៧ឆ្នាំ មុខរបរមិនពិតប្រាកដ រស់នៅភូមិថ្មី ឃុំម៉ាឡៃ ស្រុកម៉ាឡៃ។
លោកវរសេនីយ៍ត្រី តាំង សុខហេង មេបញ្ជាការកងរាជអាវុធហត្ថស្រុកម៉ាឡៃបានប្រាប់ថា៖នៅពេលឃាត់ខ្លួនជនសង្ស័យគឺកម្លាំងកងរាជអាវុធហត្ថស្រុកម៉ាឡៃបានធ្វើការស្រាវជ្រាវហើយកំណត់មុខសញ្ញា និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យបានបង្ក្រាប និងឃាត់ខ្លួនជនសង្ស័យម្នាក់ និងដកហូតវត្ថុតាងគ្រឿងញៀនប្រភេទមេតំហ្វេតាមីនហៅយ៉ាម៉ាចំនួន១.០០៧គ្រាប់ និងមធ្យោបាយមានម៉ូតូ១គ្រឿង និងទូរស័ព្ទដៃ១គ្រឿងកាលពីវេលាម៉ោង៧និង៣០នាទីព្រឹកថ្ងៃទី២៨ ខែសីហា ឆ្នាំ២០១៨ នៅតាមផ្លូវជាតិលេខ៥៩ ស្ថិតភូមិអូរស្អំ ឃុំអូរសំព័រ ស្រុកម៉ាឡៃ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យបានបញ្ជាក់ប្រាប់ថា នៅពេលកម្លាំងកងរាជអាវុធហត្ថឃាត់ខ្លួនជនសង្ស័យ និងដកហូតវត្ថុតាងគ្រឿងញៀនត្រូវបាននាំយកមកសាកសួរនៅទីបញ្ជាការដ្ឋានការកងរាជអាវុធហត្ថខេត្តបន្ទាយមានជ័យ ។
តាមចម្លើយសារភាពរបស់ជនសង្ស័យ ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់ ហើយលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានដាក់វិធានការស្រាវជ្រាវមុខសញ្ញាជួញដូរនិងចែកចាយគ្រឿងញៀនដើម្បីលុបបំបាត់បទល្មើសគ្រឿងញៀនតាមការណែនាំពីលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន៕
ចែករំលែកព័តមាននេះ