ខេត្តបាត់ដំបង ៖ មន្ត្រីជលផលមួយចំនួនត្រូវគេទម្លាយឱ្យដឹង អំពីការប្រព្រឹត្តអំពើពុករលួយយ៉ាងគគ្លើន ជាមួយនិងអ្នកប្រព្រឹត្តបទល្មើសនេសាទ ជាថ្នូរនឹងការបើកដៃឱ្យមានបទល្មើសនេះ ។ នេះបើតាមការបង្ហើបឱ្យដឹងពីអ្នកប្រព្រឹត្តបទល្មើសដោយផ្ទាល់ ដែលកំពុងប្រព្រឹត្តនៅក្នុងភូមិសាស្ត្រស្រុកសង្កែ ។…
ខេត្តបាត់ដំបង ៖ មន្ត្រីជលផលមួយចំនួនត្រូវគេទម្លាយឱ្យដឹង អំពីការប្រព្រឹត្តអំពើពុករលួយយ៉ាងគគ្លើន ជាមួយនិងអ្នកប្រព្រឹត្តបទល្មើសនេសាទ ជាថ្នូរនឹងការបើកដៃឱ្យមានបទល្មើសនេះ ។ នេះបើតាមការបង្ហើបឱ្យដឹងពីអ្នកប្រព្រឹត្តបទល្មើសដោយផ្ទាល់ ដែលកំពុងប្រព្រឹត្តនៅក្នុងភូមិសាស្ត្រស្រុកសង្កែ ។
ប្រភពពីអ្នកនេសាទបានឱ្យដឹងថា បច្ចុប្បន្ននេះ បើនិយាយពីល្មើសនេសាទនៅក្នុងស្រុកសង្កែ គេសង្កេតឃើញកំពុងរីករាលដាលកាន់តែខ្លាំង នៅក្នុងភូមិសាស្ត្រនានា នៅក្នុងឃុំកំពង់ព្រះ ដែលជនទុច្ចរិតកំពុងប្រើឧបករណ៍នេសាទទ្រង់ទ្រាយធំ ។ ជនប្រព្រឹត្តទាំងនោះ សុទ្ធតែបានអះអាងថា ពួកគេតែងបង់លុយឱ្យទៅខាងមន្ត្រីជលផល ដែលគេស្គាល់ថា ជាកូនចៅរបស់លោកជួង សុភា នាយខណ្ឌរដ្ឋបាលជលផលបាត់
ដំបង។
ប្រភពដដែលបានឱ្យដឹងទៀតថា ពេលនេះ «បរណរ៉ាវ» ដែលជាឧបករណ៍នេសាទខុសច្បាប់ដ៏ពេញនិយមជាងគេ ត្រូវបានគេដាក់ពង្រាយមួយខ្សែៗរាប់ពាន់ម៉ែត្រ និងរាប់សិបកន្លែង ពាសពេញតំបន់ហាមឃាត់ នៅក្នុងឃុំកំពង់ព្រះ ស្រុកសង្កែ ។
នាយខណ្ឌរដ្ឋាបាលជនផលបាត់ដំបង លោកជួង សុភា នៅព្រឹកថ្ងៃទី២៩ សីហា មិនអាចទំនាក់ទំនងសុំការបំភ្លឺបានទេ ជុំវិញការចោទប្រកាន់ពីសំណាក់អ្នកប្រព្រឹត្តបទល្មើសនេសាទខាងលើនេះ ។ បើតាមមន្ត្រីជលផលមួយរូប បានបង្ហើបឲ្យដឹងថា «រឿងបទល្មើសនេសាទនេះ ចៀសមិនផុតពីការបង់ប្រាក់សំណូកឲ្យមន្ត្រីជំនាញនោះទេ បើមិនអញ្ចឹងបទល្មើសនេះ មិនអាចកើតឡើងបានឡើយ» ។
មន្ត្រីដែលធ្លាប់ឈរជើងនៅតំបន់ទន្លេសាបរូបនេះ បាននិយាយទៀតថា នៅក្នុងរដូវបិទនេសាទបែបនេះ កុំថាឡើយ នៅក្នុងទឹកដីឃុំកំពង់ព្រះ ស្រុកសង្កែ សូម្បីនៅតាមតំបន់នានាក្នុងស្រុកដទៃទៀត ក្នុងខេត្តបាត់ដំបង ដែលមានភូមិសាស្ត្រជាប់បឹងទន្លេសាប ក៏កំពុងកើតមានបទល្មើសនេសាទនេះ គ្រប់ប្រភេទពេញបន្ទុកដែរ ។
ប្រភពដដែលនេះ បាននិយាយត្រង់ៗថា ជាធម្មតាជនប្រព្រឹត្តបទល្មើស និងកម្លាំងជំនាញចុះបង្ក្រាប គឺពួកគេមានទំនាក់ទំនងគ្នាល្អណាស់ ។ ពួកគេតែងសន្យាផ្ដល់ដំណឹងឱ្យគ្នាទៅវិញទៅមក នៅពេលមានហេតុ
ការណ៍អ្វីកើតឡើង ។ ជាពិសេស ពេលមានផែនការណ៍ ចុះបង្ក្រាបបទល្មើសនេសាទនេះម្ដងៗ ។
កិច្ចប្រតិបត្តិការដោយកម្លាំងចម្រុះនេះ តែងបែកធ្លាយដំណឹងជាមុន ដល់ក្រុមជនទុច្ចរិតប្រព្រឹត្តបទល្មើស ដែលធ្វើឲ្យកិច្ចប្រតិបត្តិការនេះបរាជ័យ ឬបង្ក្រាបបានតិចតួចបំផុត ។ មន្ត្រីរូបនេះ បានទម្លាយអំពីទង្វើទុច្ចរិតរបស់មន្ត្រីខិលខូចជាមួយជនទុច្ចរិតដូច្នេះថា មន្ត្រីពុករលួយទាំងនោះ តែងផ្ដល់ដំណឹងជាមុនឲ្យជនល្មើសរួសរើបទល្មើស ឬឱ្យពន្លិចឧកបករណ៍បទល្មើសចូលក្នុងទឹកជ្រៅ ឬមន្ត្រីទុច្ចរិតទាំងនោះនាំក្រុមកម្លាំងចម្រុះ ដែលចុះបង្ក្រាបជិះកាណូតពង្វៀងទីតាំង ដែលសំបូរបទល្មើស ដូច្នេះហើយទើបការបង្ក្រាបកន្លងមកមិនសូវទទូលបានជោគជ័យ ។
ពាក់ព័ន្ធនឹងបទល្មើសនេសាទ ដែលកំពុងកើតមានព្រោងព្រាត នៅក្នុងភូមិសាស្ត្រឃុំកំពង់ព្រះ ស្រុកសង្កែខាងលើនេះ បើតាមមន្ត្រីរដ្ឋបាលឃុំកំពង់ព្រះបានឲ្យដឹងថា ទីតាំងដែលកំពុងកើតមានបទល្មើសនេសាទសព្វថ្ងៃនេះមានដូចជានៅ ចំណុចព្រះគន្លង ចំណុចដំណាក់ដំរី ចំណុចអន្លក់ផ្កាត្រស់ និងចំណុចជំទាវម៉ៅ
។ល។
មន្ត្រីដដែលបានបញ្ជាក់ថា បើតាមការទម្លាយឲ្យដឹងពីអ្នកនេសាទនាប៉ុន្មានថ្ងៃមុននេះ ដែលអាជ្ញាធរបានចុះទៅសួរនាំពួកគេបានប្រាប់ថា មន្ត្រីជលផលបានពង្រាយកម្លាំងដើរប្រមូលលុយសំណូកពីអ្នកប្រព្រឹត្តបទល្មើសស្ទើរគ្រប់ទីកន្លែង មិនមែនតែនៅក្នុងឃុំកំពង់ព្រះទេ ។
មន្ត្រីឃុំកំពង់ព្រះបាននិយាយថា បើយោងលើទំហំនៃបទល្មើសនេសាទខាងលើនេះ សមត្ថកិច្ចនិងអាជ្ញាធរដែនដីមិនមានលទ្ធភាពទប់ស្កាត់ ឬចុះបង្ក្រាបបានឡើយ ព្រោះជនប្រព្រឹត្តមួយចំនួនអាងខ្សែអាងអំណាច ហើយថែមទាំងស្និទ្ធិជាមួយនឹងមន្ត្រីជំនាញទៀតផង។ ដូច្នេះហើយ ទើបមន្ត្រីមូលដ្ឋានជួបការលំបាកក្នុងការទប់ស្កាត់ ឬចុះបង្ក្រាប ។
ចែករំលែកព័តមាននេះ