ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានឱ្យដឹងថា កម្លាំងនគរបាលបានឃាត់ខ្លួនជនជាតិចិន៣នាក់ ពាក់ព័ន្ធនឹងបទល្មើសគ្រឿងញៀន២ករណីផ្សេងគ្នានៅក្នុងថ្ងៃតែ
មួយ ។
លោកស្នងការបញ្ជាក់ថា ករណីទី១-បានឃាត់ខ្លួនជនសង្ស័យជាជនជាតិចិន២នាក់ កាលពីវេលាម៉ោង៣និង២០នាទីរសៀលថ្ងៃទី២៧ ខែសីហា នៅពេលកម្លាំងចម្រុះចុះត្រួតពិនិត្យឆែកឆេររកអាវុធជាតិផ្ទុះនៅវិថីឯករាជ្យ ចំណុចទល់មុខមន្ទីរពេទ្យបង្អែកខេត្ត ក្នុងសង្កាត់លេខ៤ក្រុងព្រះសីហនុ ។
ជនជាតិចិនទាំង២នាក់នេះ ម្នាក់ឈ្មោះ Yang Ren Chen ភេទប្រុស អាយុ៣២ឆ្នាំ ស្នាក់នៅសណ្ឋាគារខ្សាច់ស ពុំមានលិខិតឆ្លងដែនជាប់នឹងខ្លួនទេ និងម្នាក់ទៀតឈ្មោះ Jiang Liu Yan ភេទស្រី អាយុ២៦ឆ្នាំ ជាអ្នកទេសចរ និងជាអ្នករួមដំណើរ កាន់លិខិតឆ្លងដែនលេខG៦១០៤៧០៨៣ ។
វត្ថុតាងដកហូតមាន ម្សៅក្រាមពណ៌ស សង្ស័យជាសារធាតុញៀនចំនួន៤៣កញ្ចប់(១កញ្ចប់ធំនិង៤២កញ្ចប់តូច) បំពង់សឺរ៉ាំងចំនួន១៤ ទូរស័ព្ទ១គ្រឿង និងរថយន្ត១គ្រឿងម៉ាក ឡិចសុីស RX៣៣០ ។
ករណីទី២-នៅវេលាម៉ោងជាង៣រសៀលថ្ងៃដដែល សមត្ថកិច្ចឃាត់ខ្លួនជនជាតិចិនម្នាក់ឈ្មោះ Cui Yan Fei ភេទប្រុស អាយុ៣៣ឆ្នាំ កាន់លិខិតឆ្លងដែនលេខ EB៥៥៣៧៨៩៤ ជាអាជីវករ ។
ការឃាត់ខ្លួនជនជាតិចិនរូបនេះគឺពេលរូបគេទៅយករថយន្តនៅក្លិបខារ៉ាអូខេ ស៊ីងតុហ្វាង ទីតាំងដែលបានបង្ក្រាបករណីគ្រឿងញៀន កាលពីយប់ថ្ងៃទី២៦ ខែសីហា កន្លងមក ខណៈរថយន្តចតទុកក្បែរទីតាំងខាងលើ ស្ថិតក្នុងសង្កាត់លេខ៣ ក្រុងព្រះសីហនុ។
នៅពេលឆែកឆេរក្នុងរថយន្តបានរកឃើញ ម្សៅក្រាមពណ៌សថ្លាសង្ស័យជាសារធាតុញៀនចំនួន៤កញ្ចប់តូច កាហ្វេចំនួន២កញ្ចប់ដែលសង្ស័យជាសារធាតុញៀន ជញ្ជីងថ្លឹង១ និងថង់សម្រាប់វេចខ្ចប់គ្រឿងញៀនមួយចំនួន ៕
ចែករំលែកព័តមាននេះ