រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាស សម្តេចមានបំណងចុះដោយផ្ទាល់ទៅរោងចក្រដែលមានបងធំបងតូច ឬអ្នកកាងនៅក្នុងរោងចក្រតែម្តង ។ ការប្រកាសនេះ ខណៈដែលសម្តេចឃើញថា នៅរោងចក្រមួយចំនួនមានបងតូចបងធំ ឬអ្នកកាងក្នុងរោងចក្រ ។
ការលើកឡើងរបស់សម្តេចតេជោ ហ៊ុន សែន ក្នុងពិធីសំណេះសំណាលជាមួយកម្មករកម្មការិនី សរុប១៤,៧៩៩នាក់ មកពីរោងចក្រសហគ្រាសចំនួន៦ ក្នុងខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៩ សីហានេះ ។ សម្តេចបន្តថា ដើម្បីរក្សាសន្តិភាពជាតិត្រូវមានការចូលរួមពីបងប្អូនទាំងអស់គ្នា មិនមានតែ សម្តេចតែម្នាក់ទេ ក្នុងការកសាងប្រទេសជាតិឲ្យរីកចម្រើននោះ ។
សម្តចតេជោ បានបញ្ជាក់ថា«រោងចក្រមួយត្រូវតែសហគ្រាសសុខសានមួយ កុំបណ្តែតបណ្តោយឲ្យមានបងតូចបងធំកាប់ចាក់គ្នា ដោយសារដាវ ដោយសារអាវុធ ជម្លោះគ្នាក្នុងរោងចក្រ ។ កុំឲ្យតាមរោងចក្រនីមួយៗមានការជួយដូរគ្រឿងញៀន និងសេពគ្រឿងញៀន កុំឲ្យនៅតាមរោងចក្រមួយៗរីករាលដាលដោយជំងឺអេសដ៍ ឬរីករាលដាលជំងឺផ្សេងៗ» ។
ជាមួយគ្នានោះដែរ សម្តេចតេជោក៏បានស្នើឲ្យបណ្តារោងចក្រទាំងអស់ត្រូវបង្កើតការសប្បាយរីករាយរាល់ថ្ងៃទី១ ឧសភា ផងដែរ ដោយមានការរាំលេងកម្សាន្តជាដើម ។សម្តេចក៏បានលើកឡើងថា កន្លងមកនៅតាមរោងចក្រមួយចំនួនមានជើងកាងដោយបានកៀរកម្មករដែលចង់ធ្វើការឲ្យមកធ្វើកូដកម្មជាមួយខ្លួនដែលករណីនេះមិនអាចអនុញ្ញាតតទៅទៀតទេ ។
សម្តេចតេជោបានគូសបញ្ជាក់ថា«មិនអាចឲ្យបងតូចបងធំរារាំងទេ! អ្នកខ្លះគេចូលរួមធ្វើ បាតុកម្ម អ្នកខ្លះគេចង់ធ្វើការមិនចង់ចូលរួមធ្វើបាតុកម្មទេ ។ កុំឲ្យមានបងតូចបងធំនៅក្នុងរោងចក្រ ហើយប្រសិនបើមានរឿងនេះខ្ញុំក៏ចង់ចុះទៅផ្ទាល់ ។ ថ្ងៃមុនរឿងកើតនៅរោងចក្រខ្វាងទុងតែម្តង» ។ សម្តេចក៏បានលើកឡើងឡើងថា សុខទុក្ខរបស់កម្មករ គឺជាសុខទុក្ខរបស់សម្តេច ។ គ្មានអ្នកចង់ដឹកនាំប្រទេសចង់ក្រីក្រនោះទេ ។ ពូបានដឹកនាំចូលរួមជាមួយជីដូនជាជីតា ឪពុកម្តាយ ក្មួយៗចាប់តាំងពីរជាង៤០ឆ្នាំមុននោះ ដើម្បីផ្តួលរំលំរបបប៉ុលពតជាមួយ ហើយទប់ស្កាត់កុំឲ្យរបបនេះកើតឡើងវិញ ជាមួយពួកគាត់ ហើយបានស្វែងរកសន្តិភាព ដើម្បីប្រជាពលរដ្ឋតាមរយៈបង្រួបបង្រួមជាតិ ហើយចុងក្រោយតាមរយៈនយោបាយឈ្នះឈ្នះ ។
សម្តេចតេ ជោ បន្តថា សម្តេចចង់បាននៅក្នុងរោងចក្រត្រូវជាកន្លែងមួយសុខសាន ដោយ ម្ចាស់រោងចក្រ និងកម្មករត្រូវធ្វើទំនាក់ទំនងគ្នាបានឲ្យល្អ ។ សម្តេចបញ្ជាក់ថា« អ្វីដែលខ្ញុំចង់ បាន គឺទំនាក់ទំនងនៅក្នុងរោងចក្ររបស់យើង ។ រោងចក្រមួយ គឺជាសហគមន៍មួយសុខសាន មួយនោះត្រូវធ្វើយ៉ាងណាទំនាក់ទំនងម្ចាស់រោងចក្រ និងអ្នកគ្រប់គ្រងរោងចក្រ និងកម្មករត្រូវសហការគ្នាឲ្យល្អសាមគ្គីគ្នា ។ មិនអាចយកគ្នាធ្វើជាសត្រូវនោះទេ» ។ សម្តេចបានបន្ថែមទៀតថា ការធ្វើបែបនេះនឹងនាំមកនូវផ្តល់ផលប្រយោជន៍ជូនកម្មករនូវការតម្លើងប្រាក់បៀវត្ស និងអត្ថប្រយោជន៍ជាច្រើនទៀត ។ ថៅ និងកម្មករ គឺជាដៃស្តាំ និងដៃឆ្វេងដែលមិនអាចអត់គ្នាបាននោះទេ ។
ប្រមុខរាជរដ្ឋាភិបាលក៏អំពាវនាវដល់ម្ចាស់សហគ្រាសទាំងអស់ពិនិត្យកែលំអក្នុងរោងចក្ររបស់ខ្លួន កន្លែងណាមិនទាន់មានទីលានដ្ឋានត្រូវឲ្យមានទីលានដ្ឋាន ដើម្បីដោះស្រាយបឋម អ្នកដែលមានជំងឺតិចតួច ហើយឆ្លងតាមនោះ ដើម្បីបញ្ជូនទៅមន្ទីពេទ្យ ។ មិនទាន់មានកន្លែង ហូបបាយត្រូវធ្វើកន្លែងហូបបាយ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ