រាជធានីភ្នំពេញ ៖ នារី២នាក់ជាមុខសញ្ញាចែកចាយថ្នាំញៀនយ៉ាងសកម្មនៅមាត់ទន្លេត្រូវបានកម្លាំង
សមត្ថកិច្ចខណ្ឌដូនពេញចាប់ខ្លួនឆែកឆេររកឃើញមានថ្នាំញៀនចំនួន១៧កញ្ចប់តូច។ ហេតុការណ៍នេះបានកើតឡើងកាលពីវេលាម៉ោង១រំលងអាធាត្រឈានចូលថ្ងៃទី២៩ ខែសីហា ឆ្នាំ២០១៨ តាមបណ្តោយផ្លូវព្រះស៊ីសុវត្ថិ នៅចំណុចមាត់ទន្លេកន្លែងលក់ផ្កាក្បែរនឹងក្រសួងទេសចរាចរណ៍ទល់មុខនឹងសាលាឧទ្ធរណ៍ ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
នារីជាជនសង្ស័យទាំង២នាក់ខាងលើ ម្នាក់ឈ្មោះធី ចាន់ថាច អាយុ១៩ឆ្នាំ មានមុខរបរ និងស្នាក់នៅមិនពិតប្រាកដ ដកហូតបានថ្នាំញៀនចំនួន៣កញ្ចប់តូច និងម្នាក់ទៀតឈ្មោះ ស៊ីម ម៉ារីយ៉ា អាយុ១៨ឆ្នាំ មុខរបរនិងស្នាក់នៅមិនពិតប្រាកដ ដកហូតបានថ្នាំញៀនចំនួន១៤កញ្ចប់តូច ។
តាមប្រភពព័ត៌មានពីសមត្ថកិច្ចខណ្ឌដូនពេញបានឱ្យដឹងថា ដោយមានបញ្ជាផ្ទាល់ពីលោក ហួត ចាន់យ៉ារ៉ាន់ អធិការនគរបាលខណ្ឌដូនពេញ បញ្ជាឱ្យលោកគង់ សុភារិទ្ធ អធិការរងខណ្ឌដូនពេញដឹកនាំកម្លាំងដើម្បីចេញល្បាតទប់ស្កាត់រាល់បទល្មើសដូចជាលួចឆក់ប្លន់ជាដើមកុំអោយកើតមាននៅក្នុងមូលដ្ឋាន ជាក់ស្តែងពេលល្បាតមកដល់ចំណុចកើតហេតុខាងលើក៏បានប្រទះឃើញជនសង្ស័យ៣នាក់ ក្នុងនោះប្រុសម្នាក់ និងនារី២នាក់កំពុងតែអង្គុយលេងបៀ ទើបកម្លាំងល្បាតបានធ្វើការត្រួតពិនិត្យ និងឆែកឆេរ ក៏រកឃើញថ្នាំ
ញៀនចំនួនសរុបទាំងអស់១៧កញ្ចប់តូចជាប់នឹងខ្លួននារីជាជនសង្ស័យទាំង២នាក់ខាងលើ រីឯបុរសម្នាក់ទៀតមិនមានជាប់ពាក់ព័ន្ធនោះឡើយ ។
ក្រោយពេលសមត្ថកិច្ចធ្វើការសួរនាំ នារីជាជនសង្ស័យទាំង២នាក់ខាងលើនេះក៏បានឆ្លើយសារភាពថា ថ្នាំញៀនខាងលើពិតជារបស់ពួកខ្លួនពិតមែន ហើយលក់ចេញទៅក្នុងតំលៃ១ម៉ឺនរៀលតែប៉ុណ្ណោះ ។
ក្រោយពេលកើតហេតុ នារីជាជនសង្ស័យទាំង២នាក់ខាងលើនេះត្រូវបានសមត្ថកិច្ចកសាងសំណុំរឿងបញ្ចូនទៅកាន់តុលាការដើម្បីចាត់ការទៅតាមនីតិវិធី ៕
ចែករំលែកព័តមាននេះ