ទីក្រុងម៉ានីល ៖ រដ្ឋមន្ត្រីកសិកម្មប្រទេសហ្វ៊ីលីពីនបាននិយាយកាលពីថ្ងៃចន្ទ ដើមសប្ដាហ៍នេះថា លោកបានស្នើឲ្យមានការនាំចូលអង្ករប្រមាណ១៣,២ម៉ឺនតោនបន្ថែមដោយវិស័យឯកជន ដើម្បីដោះស្រាយបញ្ហាកង្វះការផ្គត់ផ្គង់អាហារចាំបាច់ក្នុងខេត្តខាងត្បូងនៃប្រទេស ។ រដ្ឋមន្ត្រីកសិកម្ម Emmanuel Pinol…
ទីក្រុងម៉ានីល ៖ រដ្ឋមន្ត្រីកសិកម្មប្រទេសហ្វ៊ីលីពីនបាននិយាយកាលពីថ្ងៃចន្ទ ដើមសប្ដាហ៍នេះថា លោកបានស្នើឲ្យមានការនាំចូលអង្ករប្រមាណ១៣,២ម៉ឺនតោនបន្ថែមដោយវិស័យឯកជន ដើម្បីដោះស្រាយបញ្ហាកង្វះការផ្គត់ផ្គង់អាហារចាំបាច់ក្នុងខេត្តខាងត្បូងនៃប្រទេស ។
រដ្ឋមន្ត្រីកសិកម្ម Emmanuel Pinol បាននិយាយថា លោកបានស្នើជាផ្លូវការទៅកាន់លោកប្រធានាធិបតី រ៉ូឌ្រីហ្គោ ឌូតឺតេ (Rodrigo Duterte) ឲ្យមានការនាំចូលពិសេស ហើយក្រុមប្រឹក្សាអាជ្ញាធរអាហារជាតិ(NFA) មានកិច្ចប្រជុំនៅថ្ងៃអង្គារ ដើម្បីពិចារណាពីសំណើនេះ។
កំណើនតម្រូវការអង្ករក្នុងប្រទេសហ្វ៊ីលីពីន អាចជួយជំរុញដល់តម្លៃអង្ករនាំចេញក្នុងប្រទេសវៀតណាម និងថៃ ដែលជាអ្នកផ្គត់ផ្គង់ធំៗរបស់ប្រទេសនេះ ។ ប្រទេសទាំងពីរបាននាំចេញអង្ករបានច្រើនជាង១លានតោនទៅហើយក្នុងឆ្នាំនេះ ។
ក្នុងប្រទេសវៀតណាម តម្លៃអង្ករនាំចេញមិនបានកើនឡើងទេក្នុងខែនេះ បន្ទាប់ពីធ្លាក់ចុះយ៉ាងខ្លាំងកាលពីខែមិថុនា និងកក្កដា ប៉ុន្តែពាណិជ្ជករបានរាយការណ៍មកថា អាចនឹងមានការទិញដូរថ្មីៗជាមួយនឹងហ្វ៊ីលីពីន ។
លោក Pinol បាននិយាយថា ប្រជាជនក្នុងខេត្ត Tawi-Tawi, Sulu និង Basilan រួមទាំងក្រុង Zamboanga ភាគខាងត្បូងនៃប្រទេសហ្វ៊ីលីពីនបានជួបប្រទះឧបសគ្គក្នុងការស្វែងរកអ្នកផ្គត់ផ្គង់អង្ករក្នុងរយៈពេលប៉ុន្មានសប្តាហ៍មកនេះ បន្ទាប់ពីមានការចុះចាប់ទំនិញនាំចូលខុសច្បាប់ ។
លោកបានបន្តថា តំបន់នេះពឹងផ្អែកលើការនាំចូលអង្ករខុសច្បាប់អស់ជាច្រើនឆ្នាំមកហើយដែលត្រូវបានគិតថា ត្រូវបាននាំចូលពីវៀតណាមនិងថៃ តាមរយៈរដ្ឋ Sabah នៃប្រទេសម៉ាឡេស៊ី ដែលបង្ខំឲ្យកសិករក្នុងស្រុកឈប់ដាំស្រូវ ។
ប៉ុន្តែកាលពីខែមុន លោកនាយករដ្ឋមន្ត្រីមាហាធា មហាមេដ (Mahathir Mohamad) និងលោកឌូតឺតេ បានជួបគ្នា និងព្រមព្រៀងថាបញ្ឈប់រាល់សកម្មភាពនាំចូលខុសច្បាប់តាមព្រំប្រទល់ប្រទេស ។
លោក Pinol បាននិយាយក្នុងសេចក្តីថ្លែងការណ៍មួយដែលត្រូវបានបង្ហោះលើFacebook ថា ការបញ្ចប់ការនាំចូលខុសច្បាប់ គឺជាជោគជ័យមួយក្នុងយុទ្ធនាការរបស់រដ្ឋាភិបាលប្រឆាំងនឹងសកម្មភាពខុសច្បាប់ ប៉ុន្តែវាបានបង្កឲ្យទៅជាគ្រោះភ័យមួយទៅវិញ ៕
ចែករំលែកព័តមាននេះ